قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا سىبايلاس جەمقورلىقپەن كۇرەس ماسەلەسى دە قامتىلعانى بەلگىلى. راسىندا دا جەڭ ۇشىنان جالعاسقان جەمقورلىق تولىققاندى جويىلماي، قارقى دامۋ بولمايتىندىعى ءسوزسىز. سوندىقتان دا بۇل باعىتتا زاڭ تالاپتارى قاتاڭداتىلىپ، الدىن الۋ شارالارى دا كەڭ كولەمدە جۇرگىزىلۋدە. اسىرەسە، ءبىلىم بەرۋ ۇيىمدارىندا وتكىزىلگەن شارالاردىڭ ماڭىزى تەرەڭ. ويتكەنى، ەگەمەن ەگىمىزدىڭ ەرتەڭگى سەنىمدى تىرەكتەرى بۇگىنگى مەكتەپ پارتاسىندا وتىر. سول سەبەپتەن دە وسكەلەڭ ۇرپاققا سىبايلاس جەمقورلىقتىڭ زارداپتارى تۋرالى ۇنەمى ايتىلۋى كەرەك.

تاراز تەمىرجول كولىك جانە كوممۋنيكاسيا كوللەدجىنىڭ ءماجىلىس زالىندا جانە وقۋ كابينەتتەرىندە ستۋدەنتتەرگە ارنالعان "ادالدىق ساعاتى" ءوتتى. سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن، ءبىلىم جانە عىلىم مينيسترلىگىنىڭ قولداۋىمەن ۇيىمداستىرىلعان شاراعا وقىتۋشىلار قۇرامى دا بەلسەنە قاتىستى.

باسقوسۋدا ارناۋلى ءبىلىم وشاعىنىڭ ديرەكتورى ۇ.كەنجەبايەۆا بايانداما جاساپ، ۇتىمدى ويلارىن ورتاعا سالدى. «بۇل وقۋ ورداسىن ءتامامداعان بىلىمگەرلەردىڭ بارلىعى – ەرتەڭگى تەمىرجولشىلار. جەردىڭ ءبىر نۇكتەسىنەن ەكىنشى نۇكتەسىنە باراتىن سان مىڭداعان جولاۋشىنىڭ سول مەزەتتەگى تاعدىرى – وسى ماماندىق يەلەرىنىڭ قولىندا. سوندىقتان بۇل ماماندىق كيەسى ادالدىق پەن ادامگەرشىلىكتەن وزگەنى كوتەرمەيدى. ياعني، تەمىرجولشى تەمىردەي تارتىپكە باعىنىپ، ىسىنە جاۋاپكەرشىلىكپەن قاراۋى ءتيىس»، - دەدى كوللەدج جەتەكشىسى.

جيىنعا تەمىر جول كوللەدىنىڭ ارداگەر ۇستازى ە.گوستيەۆ پەن 1966 جىلعى تۇلەگى جانە جامبىل وبلىسىنىڭ قۇرمەتتى ازاماتى ف.كليمەنكو دا قاتىسىپ، ءسوز سويلەدى. ولار ادالدىق، پاراساتتىلىق، ادىلدىك جانە سەنىم قۇندىلىقتارى تاقىرىبىندا وي قوزعاپ، پىكىرلەرىن ءبىلدىردى. ارداگەرلەر وزدەرىنىڭ ەڭبەك جولدارىمەن ستۋدەنتتەردى تانىستىرىپ، ادالدىقتىڭ بيىك شىڭى – اقىلدىلىق پەن ءبىلىمپازدىق، مادەنيەتتىلىك پەن كورەگەندىلىك ەكەندىگىن اتاپ ءوتتى.

«بۇل ءبىلىم ورداسىنان كوپتەگەن سالا ماماندارى تۇلەپ ۇشقان. ولاردىڭ دەنى ماماندىعىنىڭ ماقتانىشىنا اينالىپ، ۇزاق جىلدار تەمىر جول بويىندا تەر توكتى. ءتىپتى، كەيبىرى ءوز كاسىبىن ۇلىنا اماناتتاپ، اتادان بالاعا جالعاستىرعانى دا بار. سوندىقتان دا بۇل كاسىپتى قاستەرلى دەۋىمىز كەرەك. كوپتەگەن ادامداردىڭ باراتىن جەرىنە جەتكىزۋدى موينىنا الاتىن بۇل كاسىپ سوندىقتان دا ادالدىقتى سۇيەدى»، دەدى قارت ۇستاز.

باسقوسۋ سوڭىندا ستۋدەنتتەر قوناقتارعا كوكەيلەرىندەگى ساۋالدارىن قويىپ، جان-جاقتى جاۋاپتارىن الدى.