ستراتەگيالىق نىسان سانالاتىن تەمىرجول بويىنداعى قاۋىپسىزدىك قاشاندا قىراعى كۇزەتتە. بيىلعى جىلى الماتى وبلىسى، اقسەڭگىر-شامالعان تەمىرجول وتكەلىندەگى جاعدايدان كەيىن بولات جولدىڭ بويىنداعى ءتارتىپ تىپتەن كۇشەيە تۇسكەن. بۇگىنگى كۇنى «قازاقستان تەمىر جولى» ۇق» اق-ى فيليالى - جۇك تاسىمالى – جامبىل بولىمشەسى مەن جامبىل ماگيسترالدى جەلى بولىمشەسىنە قاراستى وڭىردە 74 تەمىر جول وتكەلى بار ەكەن.
«جوعارىدا اتاپ وتكەن وتكەلدەردىڭ قاتارىندا بۋرىل-جاڭاتاس جانە جامبىل-شۋ تەلىمىندەگى تەمىر جول وتكەلدەرىندە كۇزەت جوق. تەك جامبىل وبلىسى ورتالىعىنداعى ەكى-ۇش وتكەلدە عانا كۇزەت بار. ولار وتكەل كۇزەتۋشىسى-كەزەكشى جانە «»اسكەريلەنگەن تەمىر جول كۇزەتى» اق-ى جامبىل فيليالىنىڭ ساربازدارىمەن كۇزەتىلەدى. تاراز قالاسىندا كولىك جۇرگىزۋشىلەرى ءۇشىن ۇلكەن ماسەلە تۋدىرىپ وتىرعان «قاراتاۋ وتكەلى»، 5 شاقىرىم – «اۋىل بەرەكە» بازارى مەن 11 شاقىرىمداعى اسقاروۆ كوشەسىنىڭ سوڭىنداعى ورتالىق بازارعا باراتىن وتكەلدەر مەن تاراز قالاسىنىڭ ىرگەسىندەگى جامبىل اۋدانىنىڭ ورتالىعى اسا اۋىلىنداعى وتكەل كۇزەتىلمەيدى. سونداي-اق، 28 شاقىرىمداعى جامبىل-تالاس باعىتىنداعى وتكەل مەن قانت زاۋىتىنا باراتىن وتكەل كۇزەتىلەدى. بۇل وتكەلدەردەگى ۇلكەن ماسەلە – ادامي فاكتور. جاياۋ جۇرگىنشىلەر كوپ. سول جاعىن دا ەسكەرىپ وتىرمىز. ال وسى ماسەلە بويىنشا «قازاقستان تەمىر جولى» ۇق» اق-ى باسشىلىعى مەن جامبىل وبلىسىنىڭ اكىمدىگىنە بىرنەشە رەت حات تۇسىردىك. ءالى تۇششىمدى جاۋاپ بولماي وتىر»، – دەيدى جامبىل ماگيسترالدى جەلى بولىمشەسى جول ءبولىمىنىڭ باسشىسى ەرمەك مۇسابەكوۆ.
وتكەن جىلى عانا جۇك تاسىمالى – جامبىل بولىمشەسىنىڭ ديرەكتورى بەرىك اقشالوۆتىڭ باستاماسىمەن جەرگىلىكتى جول پوتۋرلدىك پوليسياسىنىڭ قىزمەتكەرلەرى كۇز ايلارىندا بىرنەشە رەت رەيد وتكىزدى. سول جولى «قاراتاۋ وتكەلى»، 5 شاقىرىمداعى «اۋىل بەرەكە» بازارى مەن اسقاروۆ كوشەسىنىڭ سوڭىنداعى 11 شىقارىمداعى وتكەلدەردە جۇرگىزۋشىلەرگە جول ەرەجەسىن بۇزعانى ءۇشىن بىرنەشە حاتتاما تولتىرىلعان.
يا، زاڭنىڭ اتى-زاڭ. وسى ورايدا باۋىرجان مومىش ۇلىنىڭ «تارتىپكە باس يگەن قۇل بولمايدى، ءتارتىپسىز ەل بولمايدى» دەگەن ءسوزى ويعا ورالادى. ەڭ باستىسى بەكىتىلگەن ەرەجەنى قاتاڭ ساقتاعان ابزال. ال تەمىر جول سالاسىنىڭ جاۋاپتى ماماندارى بۇل باعىتتاعى باقىلاۋ شارالارىنىڭ ۇنەمى باستى نازاردا بولاتىندىعىن ايتىپ وتىر.
