ەلباسى-قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ بۇعان دەيىن قازاقستاندىقتاردىڭ 30 پايىزىن بۇقارالىق سپورتپەن قامتۋ تۋرالى مەجە قويعان بولاتىن. ماڭىزدى مىندەت ءوز وزەكتىلىگىن جويعان جوق. وسى ورايدا بارلىق ەلدى مەكەندەردە جاڭا سپورت الاڭدارى بوي كوتەرىپ، شەبەرلىكتى شىڭداۋعا باعىتتالعان جارىستاردىڭ قاتارى ارتۋدا. بۇل ارينە، قۇپتارلىق قادام. ويتكەنى، دانا حالقىمىزدىڭ «شىنىقساڭ شىمىر بولاسىڭ» دەگەن ماتەلىندە ايتىلعانداي بۇقارالىق سپورتپەن اينالىسقان ادامنىڭ جانى تازا، ءتانى سۇلۋ بولىپ بولىپ قالىپتاساتىندىعى بەلگىلى.

مەملەكەت باسشىسى قاسىم-جومارت توقايەۆ تا بۇگىندە سپورت سالاسىن دامىتۋعا ۇلكەن كوڭىل بولۋدە. پرەزيدەنت وتانداستارىمىزدى سوزبەن جىگەرلەندىرىپ قانا قويماي، تەننيس ويىنىن جەتىك مەڭگەرگەن تۇلعا رەتىندە كوپكە ۇلگى كورسەتە بىلۋدە. سونىمەن قاتار سپورت سالاسىن ودان ءارى جەتىلدىرۋگە باعىتتالعان تىڭ تاپسىرمالار جۇكتەۋدە.

بۇگىندە ەلباسى مەن مەملەكەت باسشىسى العا قويعان مىندەتتەر جامبىل وبلىسىندا دا ءوز جەمىسىن بەرىپ وتىر. بۇل تۇرعىدا اۋليەاتا وڭىرىندەگى ءاربىر اۋداندا دا جارقىن مىسالدار جەتەرلىك. اسىرەسە، تەمىرجول سالاسىندا ءتۇرلى جارىستار وتكىزىپ، سول ارقىلى سالا ماماندارىن سپورتتى سەرىك ەتۋگە شاقىرۋ يگى داستۇرگە اينالعان.

جۋىردا تاراز تەمىر جول ستانساسىندا توراپتىق سايىستار ءوتتى. تارازدىق تەمىرجولشىلار بۇل كۇنى الاڭدا شاعىن فۋتبولدان دوپ تەۋىپ، ارقان تارتىستى.

جامبىل بولىمشەسىنە قاراستى مەكەمەلەردەن قۇرالعان 10 توپ سايىستىڭ كوركىن قىزدىرىپ، بارىنشا كۇشتەرىن سىناپ باقتى. تارتىستى وتكەن باسەكەگە قازىلىق جاساۋ دا وڭاي بولعان جوق. تۇلا بويلارى بۇلا كۇشكە تولى تەمىرجولشى جىگىتتەر بىرىنەن ءبىرى وزا شاۋىپ، جۇلدەنى بەرمەۋگە تىرىستى.

سپورتتىق سايىستىڭ سوڭىندا ارقان تارتۋدان ءبىرىنشى ورىن «دس تاراز» كومانداسىنا بۇيىرسا، ەكىنشى ورىندى «جرس» ج ش س ەنشىلەدى. ال، ءۇشىنشى ورىن «تكە-31» كومانداسىنا بۇيىردى.

شاعىن فۋتبول ويىنىنىڭ جەڭىمپازدارىنا كەلەر بولساق، ءبىرىنشى ورىن تۇعىرىنان «دجدو»، ەكىنشى ورىننان «دس تاراز»، ءۇشىنشى ورىننان «جامبىلترانستەلەكوم» كوماندالارى كورىندى.

كوتەرىڭكى كوڭىل-كۇي سىيلاپ قانا قويماي، ۇجىم اراسىنداعى اۋىزبىرشىلىك پەن ىنتىماقتى ارتتىرا تۇسكەن بۇل شارادا جەڭىمپازدار ارنايى كۋبوكتارمەن، گراموتالارمەن جانە ەستەلىك سىيلىقتارمەن ماراپاتتالدى.