ينفراقۇرىلىمدى دامىتۋ-مەملەكەت باسشىسى ق.توقايەۆتىڭ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى جولداۋىندا ايقىندالعان مىندەتتىڭ ءبىرى. بۇل تۇرعىدا پرەزيدەنت «ەلىمىزدىڭ ءار ايماعىنىڭ تۇرعىندارىنىڭ تازا اۋىز سۋعا، تابيعي گازعا، كولىك ينفراقۇرىلىمىنا قول جەتكىزۋ دەڭگەيى بىركەلكى ەمەس ەكەنى بەلگىلى.

وسى تەڭسىزدىكتى جويۋ ءۇشىن جۇمىستى جانداندىرۋ قاجەت.

ەلباسىنىڭ تاپسىرماسى بويىنشا «سارىارقا» گاز قۇبىرىنىڭ ماگيسترالدى جەلىسىنىڭ ءبىرىنشى كەزەكتەگى قۇرىلىسى اياقتالىپ كەلەدى.

كەلەسى جىلى نۇر-سۇلتان قالاسىندا جانە قاراعاندى، سودان سوڭ اقمولا مەن سولتۇستىك قازاقستان وبلىستارىندا تاراتۋ جەلىلەرىن سالۋ جۇمىستارى باستالادى.

مەملەكەت وسى ماقساتقا سايكەس 56 ميلليارد تەڭگە ءبولىپ وتىر. ناتيجەسىندە 2،7 ميلليوننان استام ادام تابيعي گازبەن قامتاماسىز ەتىلەتىن بولادى.

الداعى ءۇش جىل ىشىندە تۇرعىنداردى تازا اۋىز سۋمەن جانە سۋ جەتكىزۋمەن قامتاماسىز ەتۋگە شامامەن 250 ميلليارد تەڭگە بولىنەدى» دەپ اتاپ كورسەتكەن بولاتىن.

بۇل باعىتتا جامبىل وبلىسىندا دا ناقتى جۇمىستار اتقارىلىپ، ناتيجەسىن بەرۋدە. بيىل قالا ماڭىنداعى 7 ەلدى مەكەن ورتالىقتاندىرىلعان اۋىز سۋ جۇيەسىنە قوسىلادى دەپ جوسپارلانۋدا. قازىرگى تاڭدا ول بويىنشا جوبالىق سمەتالىق قۇجاتتار دايىندالىپ جاتىر. وبلىس اكىمدىگىنىڭ ەنەرگەتيكا جانە ءتۇرعىن-ۇي كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆتىڭ ايتۋىنشا، جۇيەلى جۇمىستار كوپ ۇزاماي ءوز جەمىسىن بەرەدى.

ستاتيستيكالىق مالىمەتتەرگە سۇيەنسەك، بۇگىندە تاراز تۇرعىندارىنىڭ توقسان پايىزى تازا اۋىز سۋدى پايدالانىپ وتىر. جىل سوڭىنا دەيىن جوسپارلانعان جەتى ەلدى مەكەندەگى قۇرىلىس اياقتالسا، قالا تولىق تازا اۋىز سۋمەن قامتىلادى. وسى جۇمىستاردىڭ ناتيجەسىمەن رەسپۋبليكا رەيتينگىسىندە ءوڭىر كورسەتكىشىن كوتەرۋگە دە مۇمكىندىك تۋماق.

جالپى، وبلىس بويىنشا ورتالىقتاندىرىلعان اۋىز سۋمەن قامتىلعان 199 ەلدى مەكەن بار. ال ونداعى 130 مىڭ وتباسى ءالى دە سۋدى سىرتتان تاسىمالداپ وتىر. وسى ورايدا ايماق باسشىسى اسقار مىرزاحمەتوۆ بۇل تۇرعىنداردى 100 پايىز تولىعىمەن جۇيەگە قوسۋ كەرەكتىگىن باسا ايتىپ، ناقتى تاپسىرمالار جۇكتەگەن بولاتىن. بۇگىندە بۇل باعىتتا ىلگەرىلەۋ بار. سونىمەن قاتار جولداۋ جۇكتەگەن مىندەتتەرگە سايكەس، جاڭا جوبالار دا جاندانعالى تۇر.