مەملەكەت باسشىسى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك»،– دەپ اتاپ كورسەتكەن بولاتىن.

بۇگىندە جامبىل وبلىسىندا ءوز ءىسىن اشىپ، جەكە كاسىپكە بەت بۇرعانداردىڭ قاتارى كوبەيىپ كەلەدى. سولاردىڭ ءبىرى- شۋ قالاسىنىڭ تۇرعىنى، «بىرجان-نۇرداۋلەت» جاۋاپكەرشىلىگى سەرىكتەستىگىنىڭ ديرەكتورى ساۋلە قوجابەكوۆا. ول وسىدان ەكى جىل بۇرىن بالاباقشا اشىپ، قازىرگى تاڭدا 25 ادامدى تۇراقتى جۇمىسپەن قامتىپ وتىر.

ساۋلە سانسىزباي قىزى تابىس تاۋىپ، اسىپ-تاسىپ ءومىر ءسۇرۋدىڭ قامىن كۇيتتەپ جۇرگەن جان ەمەس. ارينە، پايدا دا كەرەك. دەگەنمەن دە كەيىپكەرىمىزدىڭ بالاباقشا اشۋداعى ەڭ باستى ماقساتى-ىزگىلىك پەن پاراساتتىلىققا جول كورسەتەر ىرگەلى ورىندا ەلىمىزدىڭ تىرەگى بولىپ تابىلاتىن جاس ۇرپاققا ءتالىمدى تاربيە بەرىپ، ساپالى بىلىممەن قارۋلاندىرۋ.

–ەل ءۇشىن يگىلىگى بار ءىستىڭ ۇلكەن-كىشىسى بولمايدى. راس، ەگەر وزگە سالاداعى ىستەر­ءدى دە قولىما السام، ءۇيىرىپ كەتۋگە ءبىلىمىم دە، ىشكى قۋاتىم دا جەتەر ەدى. ال مەن ەڭ ۇلكەن، ەڭ يگىلىكتى ءىس - بالا تاربيەسى دەپ بىلەمىن. زاڭعار جازۋشى مۇحتار اۋەزوۆ «ەل بولامىن دەسەڭ-بەسىگىڭدى تۇزە» دەگەن جوق پا ەدى؟ ۇلى ادام بۇل جەردە بالا تاربيەسىن باستى ماسەلە ەتىپ كوتەرىپ وتىر. ءبىزدىڭ تاۋەلسىز ەلىمىزدىڭ ءتىلى دە، ءدىلى دە بالاباقشادان باستالادى. جاس شىبىقتى قالاي يسەڭ، سولاي وسەدى ەمەس پە؟

مەن ءاۋ باستان وسى ءىستى جۇرەكپەن قالادىم. كوپجىلدىق ارمانىما 2017 جىلى قول جەتكىزدىم. «دامۋ» قورى ارقىلى 2017 جىلدىڭ جەلتوقسان ايىندا 10 ميلليون تەڭگە الدىق. العاش اشىلعاندا 75 بالا قامتىلعان بولاتىن. ال قازىرگى تاڭدا 100 ءبۇلدىرشىن كاۋسار»، «سەزىم»، «ەركەجان، «ادەمى» توپتارىنا ءبولىنىپ، بالاباقشادا ءتالىم الۋدا. بىزدە بالالارعا بارلىق جاعداي جاسالعان. ءوز قازاندىعىمىز بار. سونىمەن قاتار اۋداندا بالالاردى بالاباقشاعا تاسىمالداۋدى العاش بولىپ ءبىز باستادىق.

الداعى ۋاقىتتا بۇل باعىتتاعى جۇمىسىمىزدى ودان ارمەن كەڭەيتۋدى جوسپارلاپ وتىرمىز. سەبەبى بالاباقشا ورنالاسقان اۋماققا حالىق كەيىنگى جىلدارى كوپ قونىستانۋدا. سوعان ساي سۇرانىس ارتا تۇسۋدە، –دەيدى س. سانسىزباي قىزى.

بۇل ساۋلە سانسىزباي قىزىنىڭ كاسىپكەرلىك سالاسىنداعى العاشقى قادامى ەمەس. 2007 جىلى «بالاپان» باعدارلاماسى اياسىندا شۋ اۋدانى، اقتوبە اۋىلىندا «اقەركە» بالاباقشاسىن اشىپ، كوپكە ۇلگى بولارلىق ءىس جاساعان. ەندى كاسىپكەر انا جۇرگىزىپ وتىرعان كاسىبىن كەڭەيتۋ ماقساتىندا ەكىنشى دەڭگەيلى بانكتەر ارقىلى جەڭىلدەتىلگەن نەسيە الۋدى جوسپارلاپ وتىر. ايتۋىنشا ەكىنشى دەڭگەيلى بانكتەن 8 ميلليون تەڭگە كەلىسىم كەلگەن. سونىمەن قاتار سەرىكتەستىك باسشىلارى بالاباقشا جانىنان جىلىجاي سالۋدى، سول ارقىلى بۇلدىرشىندەردى باقشا ونىمدەرىمەن قامتاماسىز ەتۋدى دە كوزدەپ وتىر.