ەلىمىزدە سوڭعى جىلدارى جاستاردى الەۋمەتتەندىرۋ سالاسىنا ايرىقشا باسىمدىق بەرىلىپ كەلەدى. قازاقستان رەسپۋبليكاسى پرەزيدەنت قاسىم-جومارت توقايەۆتىڭ حالقىنا ارناعان جولداۋىندا دا جاستار جۇمىسسىزدىعى ولاردىڭ بەلسەندىلىگى ماسەلەسىنە ءمان بەرىلىپ، كورسەتكىشتەر مەن ءتيىستى جۇمىستاردى ىلگەرىلەتۋگە ناقتى تاپسىرمالار بەرىلگەنى ءمالىم. جامبىل وبلىسىندا دا جاستاردى الەۋمەتتەندىرۋ ىسىندە سالالىق ۆەدومستۆولىق ورگاندارمەن جانە تاراز قالاسى مەن اۋدان اكىمدەرى اراسىندا ناقتى مەجەلەر ايقىندالعان 11 ينديكاتورلىق كورسەتكىشتەر بەلگىلەندى. مۇنداعى 7 كورسەتكىش جاستاردى جۇمىسپەن قامتۋدىڭ بەلسەندى شارالارىنا تارتۋعا باعىتتالعان، دەپ جازادى Qamshy.kz اقپارات اگەنتتىگى. 

اعىمداعى جىلى وڭىردەگى جاستار اراسىنداعى جۇمىسسىزدىق دەڭگەيى 2،4 پايىزعا ازايدى. ال رەسپۋبليكا بويىنشا بۇل كورسەتكىش 3،7 پايىز ەكەنىن ەسكەرسەك، جامبىلداعى جاستار جۇمىسسىزدىعىن جويۋعا باعىتتالعان شارالاردىڭ ناتيجەلىگىن اتاپ وتۋگە بولادى. وبلىستا اعىمداعى جىلدىڭ العاشقى ءىىى توقسانىندا NEET ساناتىنا جاتاتىن جاستاردىڭ ۇلەسى 7،7 پايىزدى قۇراپ، وتكەن جىلمەن سالىستىرعاندا 1،5 پايىزعا كەمىدى.

–جالپى بيىل جامبىلدا 11 مىڭ جاس جۇمىسپەن قامتۋدىڭ بەلسەندى شارالارىنا تارتۋ كوزدەلگەن. ال اعىمداعى جىلدىڭ قازانىنا دەيىن 12 780 جاس جۇمىسپەن قامتۋدىڭ بەلسەندى شارالارىنا تارتىلىپ ۇلگەردى. ولاردىڭ 5940-ى ۆاكانتتىق بوس جۇمىس ورىندارىنا ورنالاسسا، 1337ء-ى قىسقا مەرزىمدى كاسىبي وقىتۋعا، 770 جاس كاسىبي وقىتۋعا جىبەرىلدى. سونىمەن قاتار 2297 تۇلەك جاستار تاجىريبەسىنە، 302ء-ى الەۋمەتتىك جۇمىس ورىندارىنا، ال 1064ء-ى اقىلى قوعامدىق جۇمىستارعا جولداندى. مۇنان وزگە 483 جاس «بيزنەس باستاۋ» جوباسىمەن كاسىپكەرلىك نەگىزدەرىنە وقىتىلدى. كاسىپكەرلىك نەگىزدەرى بويىنشا تەوريالىق ءبىلىم العان 227 جاس 976 ميلليون 100 مىڭ تەڭگەگە شاعىن نەسيە الدى. بۇل جاستاردىڭ كاسىپكەرلىكتەگى قازىرگى جەتىستىكتەرى كوڭىل قۋانتادى. ولار وسى كاسىپ ارقىلى وزدەرىن جۇمىسىن قامتىپ، ارماندارىنا قول جەتكىزىپ قانا قويماي تالاي جاندى جۇمىسپەن قامتي الدى. جاس كاسىپكەرلەر وندىرگەن ءونىمنىڭ نارىقتا ۇلكەن سۇرانىسقا يە بولعانىندا اتاپ ءوتىپ كەرەك، –دەيدى وبلىس اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا.

جاستار جۇمىسسىزدىعىن جويۋدىڭ كەلەسى ءبىر باعىتى قايتارىمسىز گرانتتار بەرۋدەن كورىنەدى. ماسەلەن «ەڭبەك» مەملەكەتتىك باعدارلاماسىنىڭ ءىى باعىتى شەڭبەرىندە جاستاردىڭ جاڭا بيزنەس-يدەيالارىن دامىتۋعا 200 ايلىق ەسەپتىك كورسەتكىش مولشەرىندە 1129 جاسقا قايتارىمسىز گرانت تاعايىندالدى. بۇل ىسكە 570 ميلليون 100 مىڭ تەڭگە قارجى قاراستىرىلدى. ال 360 جاس 181 مييليون 800 مىڭ تەڭگە قايتارىمسىز گرانت الدى.