الماتى قالاسى اكىمىنىڭ ورىنباسارى ەرجان باباقۇماروۆ قالا يمامدارىمەن كەزدەستى. جيىندا قوعامدىق كەلىسىم مەن كونفەسسياارالىق ديالوگتى ساقتاۋ ماسەلەلەرى تالقىلاندى، دەپ حابارلايدى اكىمدىكتىڭ باسپا ءسوز قىزمەتى.
الماتىنىڭ باس يمامى ەركىنبەك شوقايمەن جانە اۋدانداردىڭ باس يمامدارىمەن بولعان كەزدەسۋ كەزىندە جاستارمەن جۇمىس جۇرگىزۋدىڭ ەرەكشە ماڭىزى جانە جاۋاپكەرشىلىگى جونىندە ءسوز بولدى.
مەملەكەتتىڭ ورنىقتى دامۋىنىڭ نەگىزى بولىپ تابىلاتىن قوعامنىڭ تۇراقتىلىعىن، كەلىسىم مەن ءوزارا تۇسىنىستىكتى ساقتاۋدا قالا مەشىتتەرى قىزمەتكەرلەرىنىڭ ماڭىزدى ءرول اتقاراتىنى اتالىپ ءوتتى.
– قازاقستاندا ءتۇرلى ءدىن وكىلدەرى بەيبىتشىلىك پەن كەلىسىمدە ءومىر سۇرۋدە، ءبىز سول ءۇشىن ماقتانا الامىز. قازاقستان مۇسىلماندارىنىڭ ءدىني باسقارماسى وسىناۋ تەڭگەرىمدى ساقتاۋعا ايتارلىقتاي ۇلەس قوسۋدا، – دەپ اتاپ ءوتتى ەرجان باباقۇماروۆ.
ال الماتى قالاسىنىڭ باس يمامى ەركىنبەك شوقاي ءوز سوزىندە مەشىتتەردىڭ قالا ءومىرىنىڭ تۇراقتىلىعىنا، قوعامنىڭ تىنىشتىعىنا قوسىپ جاتقان ۇلەستەرى مەن مەشىت قىزمەتكەرلەرىنىڭ ۇنەمى جاماعاتقا وتانسۇيگىشتىك پەن بەيبىتشىلىكتى قادىرلەۋگە باعىتتالعان ۋاعىز-ناسيحاتتارىن جۇرگىزىپ جاتقانىن تىلگە تيەك ەتتى.
سونداي-اق، مەشىتتەر تاراپىنان رامازان ايى مەن ەكى ايت مەرەكەلەرىندە جانە باسقا دا اتاۋلى كۇندەردە جاسالىپ جاتقان قايىرىمدىلىق جۇمىستارىنا توقتالدى. ەڭ باستىسى، مەشىت ىستەرىنىڭ جۇرۋىنە قولداۋ ءبىلدىرىپ وتىرعان قالا اكىمشىلىگى مەن قالا اكىمى باقىتجان ساعىنتايەۆقا العىس ءبىلدىردى.
الماتىدا 17 كونفەسسيا ەنەتىن 180 ءدىني بىرلەستىك، ونىڭ ىشىندە قازاقستان مۇسىلماندارى ءدىني باسقارماسىنىڭ 50 مەشىتى بار.
