2025 جىلدان قازاقستاندا لاتىن گرافيكاسىنا نەگىزدەلگەن قازاق ءتىلى ءالىپبيى قولدانىلا باستايدى. تۇڭعىش پرەزيدەنت پارمەن بەرگەن تاپسىرمانى تياناقتى ورىنداۋدان جامبىلدىقتار ايانىپ قالمايدى. وبلىستا لاتىن گرافيكاسىنا نەگىزدەلگەن قازاق ءتىلى ءالىپبيىن حالىققا وڭايىراق ۇيرەتۋ جۇمىستارى ءوز دەڭگەيىندە قولعا الىنعان، دەپ جازادى Qamshy.kz اقپارات اگەنتتىگى.
وبلىس اكىمدىگىنىڭ تىلدەردى دامىتۋ باسقارماسىنىڭ «لاتىننەگىزدى جاڭا ءالىپبي جانە جازۋ رەفورماسى» الەۋمەتتىك جوباسى اياسىندا كوممەرسيالىق 77TV تەلەارناسىنان «LatynLIVE» تەلەباعدارلاماسى ايىنا 2 رەت ەفيرگە شىعادى. بۇگىنگى كۇنگە دەيىن وبلىس تۇرعىندارىنىڭ نازارىنا باعدارلامانىڭ 6 شىعارىلىمى ۇسىنىلدى. ءوز كەزەگىندە 77TV تەلەارناسىنداعى بۇل تەلەباعدارلاما وبلىس تۇرعىندارىنىڭ 67،2 پايىزىن قامتيدى.
جالپى جىل باسىنان بەرى لاتىننەگىزدى ءالىپبيدى ءوڭىر تۇرعىندارىنا ءتۇسىندىرۋ ماقساتىندا 399 ءىس-شارا وتكىزىلىپ، وعان 198 555 ادام قامتىلعان. وبلىس اكىمدىگى مەن قازاقستان رەسپۋبليكاسى مادەنيەت جانە سپورت مينيسترلىگىنىڭ ءتىل ساياساتى كوميتەتى بىرلەسە وتىرىپ رەسپۋبليكادا العاش رەت قازاق ءتىلى ءالىپبيىن لاتىن گرافيكاسىنا كەزەڭ-كەزەڭىمەن كوشىرۋگە بايلانىستى اقپاراتتىق-ناسيحاتتاۋ اپتالىعىن ۇيىمداستىردى. اپتالىق قورىتىندىسى بويىنشا وبلىس اكىمدىگىنىڭ تىلدەردى دامىتۋ باسقارماسى «ەڭ ۇزدىك ينتەرنەت باعدارلاما»، «ەڭ ۇزدىك لاتىن كابينەتى»، «ەڭ ۇزدىك ادىسكەر» نوميناسيالارىمەن ماراپاتتالدى.
قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا ماقۇلداعان جاڭا ءالىپبي نەگىزىندەگى قازاق ءتىلى ەملەسىنىڭ ەرەجەلەرىن ءتۇسىندىرۋ جانە Qazalipbi.kz ونلاين باعدارلاماسىن تانىستىرۋ ماقساتىندا اۋداندار مەن تاراز قالاسى تۇرعىندارىنا ارنالعان كوشپەلى سەمينار-ترەنينگتەر ۇيىمداستىرىلسا، تاراز قالاسىندا ورنالاسقان 42 مەكەمەدە ۇيرەتۋ كۋرستارى جۇرگىزىلىپ، 800-دەن اسا ادام قامتىلدى.
وسىدان ەكى جىل بۇرىن بەكىتىلگەن لاتىن گرافيكاسىنا نەگىزدەلگەن قازاق ءتىلى ءالىپبيى ءالى دە جەتىلدىرۋدى قاجەت ەتەدى. بۇل جايىندا جاقىندا عانا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ تانىمال الەۋمەتتىك جەلىلەردىڭ بىرىندە قالدىرعان جازباسىندا ايتتى. سايكەسىنشە بۇل باعىتتاعى جۇمىستى جۇيەلەندىرە ءتۇسۋ مەملەكەت باسشىسىنىڭ بۇيرىعىمەن قازاقستان رەسپۋبليكاسى مادەنيەت جانە سپورت ءمينيسترى اقتوتى رايىمقۇلوۆانىڭ تىكەلەي باقىلاۋىن بولماق.
