اگروسەكتور ەكونوميكانىڭ جاڭا درايۆەرى. ۇلان-عايىر القاپتى جايلاعان قازاقستان ءۇشىن اۋىل شارۋاشىلىعى ەكونوميكالىق ءوسىمدى قامتاماسىز ەتۋشى بىردەن-بىرى سالا سانالاۋى بەكەر ەمەس. بۇل ورايدا، مەملەكەت باسشىسى قاسىم-جومارت توقايەۆ تا ءوز جولداۋىندا اۋىل شارۋاشىلىعى قازاقستاندىقتاردىڭ نەگىزگى رەسۋرسى ەكەنىنە باسا نازار اۋدارىپ، ونىڭ الەۋەتىن تولىق پايدالانۋعا شاقىردى. ءوز كەزەگىندە ءاۋ باستان اۋىل شارۋاشىلىعىنا ماماندانىپ، حالىقتىڭ كوبى اتا كاسىپكە بەيىم جامبىل وڭىرىندە پرەزيدەنتتىڭ بۇل تاپسىرماسىن ورىنداۋدا تياناقتىلىق بايقالادى، دەپ جازادى Qamshy.kz اقپارات اگەنتتىگى. 

اسىرەسە كەزىندە قويشىلار مارشالى اتانعان جازىلبەك قۋانىشبايەۆقا سوسياليستىك ەڭبەك ەرى اتاعىن الىپ بەرگەن مويىنقۇم دالاسىندا مال شارۋاشىلىعىنا ايرىقشا ءمان بەرىلۋدە. بۇگىندە اۋدان شارۋالارى 40 مىڭعا جۋىق ءمۇيىزدى ءىرى قارا، 180 مىڭعا جۋىق قوي-ەشكى، 8 مىڭنان اسا جىلقى، 1500 باسقا جۋىق تۇيە ءوسىرىپ جاتىر. جاز-اتانىڭ ءىزباسارلارى اۋداندا مالدىڭ باسىن ءوسىرىپ، ودان مول ءونىم الۋدا ناتيجەلى ەڭبەك ەتىپ كەلەدى. ەت، ءسۇت، جۇمىرتقا سىندى اۋىل شارۋاشىلىعى ونىمدەرىن وندىرۋدە دە اۋىز تولتىرىپ ايتارلىقتاي كورسەتكىش بار.

–وتكەن جىلدىڭ 8 ايىندا مال شارۋاشىلىعى بويىنشا 2 ميلليارد 312 ميلليون 400 مىڭ تەڭگەنىڭ ءونىمى وندىرىلسە، بيىلعى جىلدىڭ 8 ايىندا بۇل كورسەتكىش 2 ميلليارد 818 ميلليون 300 مىڭ تەڭگەگە دەيىن ۇلعايعان. سونداي-اق مال باسى سانىندا وتكەن جىلمەن سالىستىرعاندا ءوسىم بار. مىسالى ءمۇيىزدى ءىرى قارا سانى 3872 باسقا ، قوي-ەشكى 2919 باسقا، جىلقى 302 باسقا، تۇيە 226 باسقا، ءۇي قۇستارى 3320 باسقا وسكەنىن ماقتانىشپەن ايتۋعا بولادى. ناتيجەسىندە ەت، ءسۇت، جۇمىرتقا سىندى اۋىل شارۋاشىلىعىن ونىمدەرىن وندىرۋدە جوعارى ناتيجەگە قول جەتكىزىلدى،–دەيدى اۋدان اكىمى مادەن مۇسايەۆ.

مال باسى سانىن ارتتىرىپ، ونىڭ ونىمدىلىگىن ارتتىرۋ جولىندا شارۋا قوجالىقتارىنىڭ ەڭبەگى ەرەن. ولار ءوز مالدارىنىڭ ساپالى جەم-شوپ قورىمەن قامتىلۋمەن بىرگە ءتۇرلى جۇقپالى ىندەتتەرگە قارسى ەگۋ شارالارىن جۇيەلى ۇيىمداستىرا الدى. ناتيجەسىندە مال باسى سانى ءوز ءتولىنىڭ ەسەبىنەن كوبەيدى. وعان قوسا ءشوبى شۇيگىن، قىسى-جازى مالعا قولايلى ايماق سانالاتىن مويىنقۇم ءوڭىرىنىى كليماتىن دا مال شارۋاشىلىعىن دامىتۋ ەش قيىندىق تۋدىرا قويمايدى. ءارى بۇعان مەملەكەت تاراپىنان شارۋالار قاراستىرىلعان وڭتايلى جاعدايدى قوسساڭىز مويىنقۇمداعى مال شارۋاشىلىعى زامان اعىمىمەن دامۋدىڭ داڭعىلىنا تۇسكەنىن اڭعارا الاسىز.