جامبىل وبلىسىندا بيىل 65 العاشقى مەديسينالىق-سانيتارلىق كومەك كورسەتۋ نىسانىنىڭ قۇرىلىسى جۇرگىزىلۋدە. سونداي-اق وڭىردە ىرگەلى دەنساۋلىق ساقتاۋ ۇيىمدارىنىڭ دا قۇرىلىسى قارقىن العان. بۇل ورايدا، «اۋىل-ەل بەسىگى!» جوباسى دا وڭتايلى كادەگە جاراپ كەلەدى، دەپ جازادى Qamshy.kz اقپارات اگەنتتىگى.
وبلىستا مەديسينالىق نىساندارمەن قامتاماسىز ەتۋ جوباسىنا 2 ميلليارد 13 ميلليون 7 مىڭ تەڭگە جۇمسالدى. مۇندا بيۋدجەتتى وڭتايلاندىرۋ باعدارلاماسىنا ساي مەديسينالىق پۋنكتتەرگە 26 ميلليون تەڭگە، فەلدشەرلىك-اكۋشەرلىك پۋنكتتەر 30 ميلليون تەڭگە، دارىگەرلىك امبۋلاتوريالار 35 ميلليون تەڭگە جۇمسالدى. مەديسينالىق ۇيىمداردىڭ عيماراتتارىنا قاجەتتىلىكتى قاناعاتتاندىرۋدا ونى ساتىپ الۋ ءادىسى دە قولدانىلۋدا. سونىمەن بىرگە، 2018 جىلى 200 توسەكتىك وبلىستىق ونكولوگيالىق ديسپانسەر عيماراتىنىڭ قۇرىلىس باستالدى. قۇرىلىس جۇمىستارىنىڭ جالپى قۇنى 13 ميلليارد 900 ميلليون تەڭگەنى قۇرايدى.
–«اۋىل-ەل بەسىگى!» اتتى جوبا اياسىندا بايزاق اۋداندىق ورتالىق اۋرۋحاناسىندا كۇردەلى جانە اعىمداعى جوندەۋ جۇمىستارى جۇرگىزىلدى. جانە دە شۋ اۋدانىنداعى ەڭبەكشى جانە جاڭا جول اۋىلدىق دارىگەرلىك امبۋلاتورياسىنا كۇردەلى جوندەۋ جۇمىستارى جۇرگىزىلدى. شۋ اۋدانىنىڭ ورتالىق اۋداندىق اۋرۋحاناسىنا ەمحانا عيماراتىن جاپسارلاس سالۋ جۇمىستارى «اۋىل ەل بەسىگى» جوباسى اياسىندا جۇزەگە اسىرىلۋدا. جالپى قۇنى 410 ميلليون تەڭگەدەي بولاتىن جوبانى 2019-2020 جىلدار ارالىعىندا ىسكە اسىرۋ مەجەلەنىپ وتىر.بايزاق اۋدانىندا 250 كەلۋشىگە ارنالعان ەمحانا قۇرىلىسىن قولعا الۋ جوسپارلانۋدا. قۇرىلىس جۇمىستارى مەرزىمى 2022-2023 جىلدار ارالىعىندا جۇرگىزىلەدى. سونداي-اق مۇنداي ەمحانا جانە اۋرۋحانا قۇرىلىسى قورداي اۋدانىندا دا قولعا الىنباق. نىسانداردىڭ قۇرىلىسى جۇمىستارىنىڭ جوبالاىق سمەتالىق قۇجاتتارىن ازىرلەۋگە 22 ميلليون 400 مىڭ تەڭگە قارجى قاراستىرىلدى. مەردىگەر «ليدەر پروەكت ديزاين» جاۋاپكەرشىلىگى شەكتەۋلى سەرىكتەستىكتىگى جوبالاۋ قۇجاتتامالارىن مەملەكەتتىك ساراپتاماعا تاپسىردى. ناتيجەسىندە الداعى ۋاقىتتا قورداي اۋدانىندا 250 ورىندىق ەمحانا جانە 270 توسەكتىك اۋرۋحانا قۇرىلىسى قولعا الىنادى. بۇل ماقساتتا 9 ميلليارد 200 ميلليون تەڭگە قارجى جۇمسالماق. ءقازىر قۇرىلىس جۇمىستارىن جۇرگىزۋگە قورداي اۋىلىنىڭ «باتىس» مولتەك اۋدانىنان 4،8 گا جەر تەلىمى بەلگىلەندى. قۇرىلىس جۇمىستارى مەرزىمى 2020-2023 جىلدار ارالىعىندا جۇرگىزىلمەك، –دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.
