قازاقستان رەسپۋبليكاسىنىڭ پرەزيدەنتى قاسىم-جومارتتوقايەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ءتىلدىڭ ۇلكەن ساياسات قۇرالى ەكەنىن ەسكەرىپ، قازاق ءتىلىنىڭ مەملەكەتتىك ءتىل رەتىندەگى مارتەبەسىن ارتتىرۋعا ايرىقشا ءمان بەردى. سايكەسىنشە، ستراتەگيالىق ءمانى زور قۇجاتتا مارتەبەسى ارتقان قازاق ءتىلىن كەزەڭ-كەزەڭىمەن ۇلتارالىق قاتىناس تىلىنە اينالدىراتىن كەز كەلگەنى دە ايتىلادى. بۇل باعىتتا وبلىستا اۋقىمدى جۇمىستار قولعا الىنىپ، مەجەلى مىندەتتەرگە قول جەتكىزىلۋدە، دەپ جازادى Qamshy.kz اقپاراتتىق اگەنتتىگى.
وڭىردە اعىمداعى جىلى كورنەكى اقپاراتتاردا مەملەكەتتىك ءتىلدىڭ پايدالانىلۋ كورسەتكىشىن 100 پايىزعا جەتكىزۋ بەلگىلەنگەن. ۇستىمىزدەگى جىلى وبلىس اكىمدىگىنىڭ تىلدەردى دامىتۋ باسقارماسى اۋداندار مەن تاراز قالاسى اكىمدەرى اراسىندا كەلىسىمدەر جاسالىپ، كورنەكى اقپاراتتاردا مەملەكەتتىك ءتىلدىڭ پايدالانىلۋ دارەجەسىن نىسانالى كورسەتكىش رەتىندە كورسەتىپ، ءار توقسانعا ناقتى مەجە بەلگىلەندى. اتالعان كەلىسىمدەگى توقساندىق مەجەگە ساي اعىمداعى جىلداڭ ءىىى توقساننىڭ قورىتىندىسىمەن 95 پايىزدىق مەجەنى ەڭسەرۋ كوزدەلگەن. بۇل ينديكاتورلىق ماقسات بارلىق اۋداندار مەن تاراز قالاسىندا 0،2 پايىزعا اسىرا ورىندالدى. سونداي-اق مەملەكەتتىك مەكەمەلەردەگى مەملەكەتتىك تىلدەگى شىعىس قۇجاتتاردىڭ ۇلەسى 99،2 پايىزعا تەڭەستى.
سونىمەن بىرگەن وبلىس اكىمدىگى تىلدەردى دامىتۋ باسقارماسى جانىنداعى تىلدەردى وقىتۋ ورتالىعىندا جىل باسىنان بەرى 2024 تىڭداۋشى وقىسا ونى 776-سى مەملەكەتتىك ءتىلدى مەڭگەرۋگە كۇش سالدى. سايكەسىنشە وڭىردە پرەزيدەنت تاپسىرماسىنا ساي قازاق ءتىلىن ۇلتارالىق قاتىناس تىلىنە اينالدىرۋ جۇمىستارى ەڭ اۋەلى وبلىس اۋماعىندا تۇراتىن ەتنوستارعا قازاق ءتىلىن ۇيرەتۋدەن باستالعالى وتىر. بۇل ورايدا وبلىستىق تىلدەردى وقىتۋ ورتالىعى مەن وبلىستىق قازاقستان حالقى اسسامبلەياسى جانە 22 ەتنومادەني بىرلەستىكتەر اراسىندا ءوزارا ىنتىماقتاستىق تۋرالى مەموراندۋم جاسالدى. اتالعان مەموراندۋم اياسىندا 595 وزگە ۇلت وكىلى قازاق ءتىلىن تەگىن ۇيرەنىپ جاتىر.
قازاق ءتىلى ءبىزدىڭ ەلىمىزدەگى مەملەكەتتى قۇراۋشى ۇلتتىڭ ءتىلى. سوندىقتان مەملەكەتتىك ءتىل رەتىندە قازاق تىلىنە قۇرمەتتىڭ ارتۋى ەلدەگى ساياسي تۇراقتىلىق پەن ساباقتاستىقتىڭ ءوز دەڭگەيىندە جولعا قويىلعانىن كورسەتەدى. ال وزگە ۇلت وكىلدەرىنىڭ وزدەرى تۋىپ وسكەن مەملەكەتتىڭ ءتىلىن وقىپ ۇيرەنۋگە دەگەن قۇلشىنىسىنىڭ ارتۋى ولاردىڭ قازاق حالقىنا دەگەن شەكسىز قۇرمەتىنىڭ سيمۆولى سانالادى.
