29 قازان كۇنى الماتىداعى ىقىلاس دۇكەن ۇلى اتىنداعى مۋزىكالىق اسپاپتار مۇراجايىندا «التىن قالام» ادەبي جۇلدەسىنىڭ جەڭىمپازدارىن ماراپاتتاۋ ءراسىمى ءوتتى. بيىل اتالمىش بايقاۋعا 10 جىل. وسى ارالىقتا جۇلدە 8 مارتە بەرىلىپتى.

تازا ەنتۋزيازمنان تۋعان جوبانىڭ عۇمىرى كەلتە بولماي، قالام تەربەۋشى جانداردى قولداپ، وتاندىق ادەبيەتتىڭ دامۋىنا ۇلەس قوسىپ كەلە جاتقانى قۋانتادى. تالاي قالامگەردى شابىتتاندىرىپ، وقىرمانعا ساپالى شىعارمالار ۇسىنىلۋىنا سەبەپكەر بولعان بايقاۋعا كەلىپ تۇسكەن تۋىندىلار بيىل دا از ەمەس. جۇلدە ءۇشىن ۇزىن-ىرعاسى 397 اۆتوردان 778 شىعارما سىنعا تۇسكەن. ونىڭ اراسىندا شەتەلدىك شىعارمالار دا بار. ۇيىمداستىرۋشىلاردىڭ ايتۋىنشا، بيىل دوداعا ۋكراينا، رەسەي، اقش، گەرمانيا، يزرايل، مولدوۆا، وزبەكستان سىندى ەلدەردىڭ ۇمىتكەرلەرىنەن دە جۇمىستار ءتۇسىپتى.

شىعارمالار ۇستىمىزدەگى جىلعى 15 ناۋرىزدان، 15 قىركۇيەككە دەيىن قابىلدانعان. مۇنان سوڭ 1 قازانعا دەيىن وقىرمانداردان داۋىس قابىلدانعان. جۇلدەنىڭ ۇيىمداستىرۋ كوميتەتى مەن قازىلار القاسى ساپىنا دوسىم ساتپايەۆ، ايدوس سارىم، ارمان شورايەۆ، نۇرجان مۇحامەدجانوۆا، راسۋل جۇمالى، كەنجە جۇمان ۇلى، قۋات دومباي، بەكنۋر قيسىقوۆ، بايعالي ەسەنالييەۆ، دىلداگۇل نۇرماحانبەت، تاتيانا فيليپچيك جانە باسقالار ەنگەن.

ادەبي جۇلدەنىڭ سەرىكتەسى “ZHERSU” ينۆەستيسيالىق-وندىرىستىك كورپوراسياسى ۇسىنعان 1 ملن تەڭگەلىك باستى قارجىلاي سىيلىق بيىل بالالار جازۋشىلارىنا تاعايىندالىپتى. ۇيىمداستىرۋشىلار وسكەلەڭ ۇرپاقتىڭ ءتول ادەبيەتپەن سۋسىنداۋىنا ماڭىز بەرىپ، وسىنداي توقتامعا كەلگەن.

سونىمەن، بالالار جازۋشىلارىنا ارنالعان «دارابوز» بايقاۋىنىڭ باس جۇلدەسىن قارلىعاش سارىبايەۆا جەڭىپ الدى.

«جىلدىڭ ۇزدىك پوەزياسى» اتالىمىندا داۋرەن تىلەۋحان (اقتوبە)، «جىلدىڭ ۇزدىك پروزاسى» نوميناسياسىندا گۇلنار ىزتايەۆا (شىمكەنت) ۇزدىك دەپ تانىلدى. «جىلدىڭ ۇزدىك كينوسەنارييى جانە دراماتۋرگياسى» جۇلدەسى قۋانىش جيەنبايدىڭ (استانا) شىعارماسىنا بەرىلسە، «جىلدىڭ ۇزدىك ساتيراسى» جۇلدەسى اتىراۋلىق اماندىق ساعىنتايۇلىنا، «جىلدىڭ ۇزدىك فانتاستيكاسى جانە دەتەكتيۆى» سىيلىعى ورالبەك بەكبولاتقا (كەنتاۋ) تاپسىرىلدى.

سونداي-اق ۇيىمداستىرۋشىلار ادەبي جۇلدە اتىنان قازاقتىڭ حالىق جازۋشىسى، كورنەكتى قالامگەر ءابدىجامىل نۇرپەيىسوۆكە «قازاق ادەبيەتىنە قوسقان ەلەۋلى ەڭبەگى ءۇشىن» اتالىمىنىڭ بەرىلگەنىن حابارلادى.

ورىس تىلىندەگى شىعارمالار بويىنشا جەڭىمپازدار ءتىزىمى تومەندەگىدەي:

«لۋچشايا پوەزيا گودا» – ولگا كۋۆشيننيكوۆا (ۋست-كامەنوگورسك)؛ «لۋچشايا پروزا گودا» – قۋانىش جيەنباي (استانا)؛ «لۋچشايا دەتسكايا ي پودروستكوۆايا ليتەراتۋرا گودا «دارابوز» – كسەنيا ەۆدوكيمەنكو (الماتى)؛ «لۋچشايا ساتيرا گودا يمەني ەسەنجولا دومباي» – ەرلان كوشكينبايەۆ (الماتى)؛ «لۋچشايا فانتاستيكا ي دەتەكتيۆ گودا» – النۋرا كۋرمانگالي (الماتى)؛ لۋچشيي كينوسەناريي ي دراماتۋرگيا گودا» – كسەنيا ەۆدوكيمەنكو (الماتى).

جۇلدەگەر شىعارمالار مەن وزگە دە تۋىندالاردى www.akalam.kz سايتىنان وقۋعا بولادى.