ساۋالناما نەگىزىندە ستۋدەنتتەر جەمقورلىق فاكتىلەرى ورىن الادى دەپ كورسەتكەن بەس جوو رەيتينگى جاسالدى:

1.ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى؛ 

2. اتىراۋ مۇناي گاز ۋنيۆەرسيتەتى؛ 

3. قاراعاندى مەملەكەتتىك مەديسينالىق ۋنيۆەرسيتەت؛

4. م. وسپانوۆ اتىنداعى باتىس قازاقستان مەملەكەتتىك مەديسينالىق ۋنيۆەرسيتەتى؛  

5. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى. 

–  ساۋالنامانىڭ ناتيجەسىندە، ستۋدەنتتەر وقۋ ورىندارىنداعى جەمقورلىقتى تۋدىراتىن سەبەپتەر رەتىندە مىنالاردى اتادى: پروفەسسورلىق-وقىتۋشىلىق قۇرامنىڭ جالاقىسىنىڭ تومەندىگى، ستۋدەنتتەردە ءوز بەتىنشە ءبىلىم الۋعا دەگەن قىزىعۋشىلىقتىڭ بولماۋى، مۇعالىمدەردىڭ دە، ستۋدەنتتەردىڭ دە جۇكتەمەسىنىڭ كوپتىگى، جاتاقحانالاردا ورىنداردىڭ بولماۋى، –  دەدى داۋلەت كارىبەك.

قوعامدىق كەڭەس مۇشەلەرى جوعارى ءبىلىم سالاسىنداعى سىبايلاس جەمقورلىققا قارسى شارالاردى ءتيىمدى جۇزەگە اسىرۋ ستۋدەنتتەر مەن وقىتۋشىلاردىڭ بەلسەندى قاتىسۋىنسىز جۇزەگە اسپايتىنىن اتاپ ءوتتى. جەمقورلىققا قارسى ءىس-قيمىلدىڭ تابىستى جۇرگىزىلۋىنە مەملەكەت قانا ەمەس، ءاربىر ازامات، قوعام، سونىمەن قاتار جاستار دا جاۋاپتى. شىنىندا دا، كوپتەگەن سالادا، سونىڭ ىشىندە ءبىلىم بەرۋ مەن ەڭبەك نارىعىنىڭ باعىتتارىن بەلگىلەيتىن وسى جاس بۋىن.

ءوز كەزەگىندە قوعامدىق كەڭەس ءتوراعاسى ومارحان وكسىكبايەۆ ءبىلىم جانە عىلىم مينيسترلىگىنە، جوعارى وقۋ ورىندارىنىڭ رەكتورلارىنا ۋنيۆەرسيتەتتەردەگى سىبايلاس جەمقورلىقتىڭ الدىن الۋ ءۇشىن كەشەندى شارالار قابىلداپ، جان-جاقتى الەۋمەتتىك زەرتتەۋلەر جاساپ، سول زەرتتەۋلەر نەگىزىندە سىبايلاس جەمقورلىق دەڭگەيى بويىنشا جوعارى وقۋ ورىندارىنىڭ قوعامدىق رەيتينگىن ەنگىزۋ قاجەت ەكەنىن ايتتى.