ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنا ارنالعان قازاقستان رەسپۋبليكاسى ۇكىمەتىنىڭ 2016 جىلعى 29 جەلتوقسانداعى № 919 قاۋلىسىندا باعدارلامانىڭ نەگىزگى ماقساتى رەتىندە حالىقتى ناتيجەلى جۇمىسپەن قامتۋعا جاردەمدەسۋ جانە ازاماتتاردى كاسىپكەرلىككە تارتۋ دەپ كورسەتىلگەن. باعدارلاما ماقساتى بۇگىنگى كۇننىڭ ەڭ وزەكتى تاقىرىپتارىنىڭ ءبىرى جانە بىرەگەيى ەكەنى تالاس تۋدىرمايدى. ەل ازاماتتارى ءۇشىن ءبىرىنشى كەزەكتە تۇراقتى جۇمىسپەن قامتىلۋ ماڭىزدى سانالادى. ال جەكە كاسىبىن اشىپ، ءوزىن جانە اعايىن-تۋىستارىن جۇمىسپەن قامتىپ جاتسا نۇر ۇستىنە نۇر. بۇگىندە مەملەكەتىمىزدىڭ الەۋمەتتىك-ەكونوميكالىق احۋالىنىڭ جاقسارۋىنا ۇلكەن ۇلەس قوسىپ وتىرعان سالا دا وسى كاسىپكەرلىك ەكەنى انىق.

اتالعان باعدارلامانىڭ ماقساتى – حالىقتى ناتيجەلى جۇمىسپەن قامتۋعا جاردەمدەسۋ جانە ازاماتتاردى كاسىپكەرلىككە تارتۋ. باعدارلامانىڭ ماقساتى مەن ينديكاتورلارىنا قول جەتكىزۋ ءۇشىن جۇمىس ءۇش باعىت بويىنشا جۇرگىزىلەدى. اتاپ ايتقاندا، ءبىرىنشى باعىت – باعدارلاماعا قاتىسۋشىلاردى تەحنيكالىق جانە كاسىپتىك بىلىممەن جانە قىسقا مەرزىمدى كاسىپتىك وقۋمەن قامتاماسىز ەتۋ، ەكىنشى باعىت – جاپپاي كاسىپكەرلىكتى دامىتۋ، ال ءۇشىنشى باعىت – حالىقتى جۇمىسپەن قامتۋعا جاردەمدەسۋ ارقىلى ەڭبەك نارىعىن دامىتۋ جانە ەڭبەك رەسۋرستارىنىڭ ۇتقىرلىعى.

بۇگىندە جامبىل وبلىسىندا «ەڭبەك» باعدارلاماسى اياسىندا 2019 جىلعا بارلىعى 11،6 ميلليارد تەڭگە، ونىڭ ىشىندە رەسپۋبليكالىق بيۋدجەتتەن 7،4 ميلليارد تەڭگە، جەرگىلىكتى بيۋدجەتتەن 4،2 ميلليارد تەڭگە ءبولىنىپتى. اعىمداعى جىلدىڭ 1 قازانىنا جۇمىسپەن قامتۋدىڭ بەلسەندى شارالارىنا 30504 ادام تارتىلسا، سونىڭ ىشىندە ۆاكانتتىق بوس جۇمىس ورىندارىنا – 14210 ادام، قىسقا مەرزىمدى كاسىپتىك وقۋعا – 3299 ادام، الەۋمەتتىك جۇمىس ورىندارىنا – 1477 ادام، جاستار پراكتيكاسىنا 2297 تۇلەك جولدانعان. سونداي-اق اقىلى قوعامدىق جۇمىستارعا 4868 جۇمىسسىز تارتىلسا، 1292 ادام «باستاۋ-بيزنەس» جوباسىمەن كاسىپكەرلىك نەگىزدەرىنە وقىسا، «جاس كاسىپكەر» جوباسى بويىنشا 649 ادام وقۋعا جولدانىپ، 959 ادام شاعىن نەسيە، 683 ادام گرانت الىپتى.

اتالعان باعدارلامانىڭ شاراپاتىن كوبىنە اۋىل ازاماتتارى كورىپ جاتىر. باعدارلامانىڭ دا باستى ماقساتى وسى. ماسەلەن، وبلىس ورتالىعىنا جاقىن ورنالاسقان جامبىل اۋدانىنىڭ تۇرعىنى گۇلسىم ۇسەنوۆا اتالعان باعدارلامانىڭ ءۇشىنشى باعىتى اياسىندا ەدەن جۋۋشى بولىپ، تۇراقتى جۇمىسقا ورنالاسقان. بۇگىندە 53 مىڭ تەڭگە ايلىق-جالاقىسى بار تۇرعىن دەنساۋلىعىنا بايلانىستى تۇراقتى جۇمىستان قول ءۇزىپ قالعانىن ايتادى. جۇمىسپەن قامتۋ ورتالىعىنا قايرىلعان ول بۇگىندە اسا اۋىلىنداعى ب.مومىش ۇلى اتىنداعى مەكتەپ-گيمنازياسىندا قىزمەت ەتۋدە. سول سەكىلدى اتالعان اۋىلدىڭ تۇرعىنى وسى باعدارلاما ارقىلى قىسقا مەرزىمدى وقۋ وقىپ، ءۇيىنىڭ ماڭىنان شاشتاراز اشىپ العان. الداعى ۋاقىتتا ول مەملەكەتتىڭ شاعىن بيزنەسكە دەگەن قولداۋىن پايدالان وتىرىپ، شاشتارازىن ۇلكەيتىپ، بىرنەشە ادامدى جۇمىسپەن قامتۋدى جوسپارلاپ وتىر.