مەملەكەت باسشىسى ق.توقايەۆ قازاقستان حالقىنا العاشقى جولداۋىندا شاعىن جانە ورتا كاسىپكەرلىكتى دامىتۋعا باسا نازار اۋدارىلاتىندىعىن ايتقان بولاتىن. بيزنەستىڭ العا باستىرۋدا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ بەرەرى مول. بۇگىندە اتالمىش باعدارلاما اياسىندا جامبىل وبلىسىندا ءوز ءىسىن دوڭگەلەتىپ اكەتكەن جاستار جەتەرلىك. سونىڭ ءبىرى-جامبىل اۋدانىنىڭ تۇرعىنى ءمولدىر قۇرمانالييەۆا. ول اتالمىش باعدارلاما ارقىلى 505 مىڭ تەڭگە قايتارىمسىز گرانتقا قول جەتكىزىپتى. بۇل قارجىعا ول سۇلۋلىق سالونىنا قاجەتتى قۇرال-جابدىقتار ساتىپ الىپ، جەكە كاسىبىن باستاپ كەتكەن. بۇگىندە 3 ادامدى تۇراقتى جۇمىسپەن قامتىپ وتىرعان جەكە كاسىپكەر ۆيزاجيست بولعىسى كەلەتىن قىز-كەلىنشەكتەردى وقىتۋدى قولعا الىپتى. الداعى ۋاقىتتا وسى باعدارلاما ارقىلى وقىتۋ ورتالىعىنا اشۋدى جوسپارلاپ وتىر ەكەن.

راسىندا، بۇگىندە وقۋ ورنىن ءبىتىرىپ الىپ، تۇراقتى جۇمىس تاپپاي جۇرگەن جاستار جەتەرلىك. بۇل ورايدا، اتالعان باعدارلامانىڭ ءۇشىنشى باعىتى بويىنشا «جاستار پراكتيكاسى» كوپتەگەن جاستاردىڭ تۇراقتى جۇمىسپەن قامتىلۋىنا ماڭىزدى ءرول اتقارىپ كەلەدى. وسىلايشا، «جاستار پراكتيكاسى» ارقىلى ءوزىن جاقسى قىرىنان تانىتقان ماماننىڭ ءبىرى ءازيز كادىرحان ۇلى. اسا اۋىلدىق وكرۋگىنىڭ اكىمدىگىندە اتالعان باعدارلاما بويىنشا تاجىريبەدەن وتۋگە كەلگەن ول نەبارى 1،5 ايدىڭ ىشىندە تۇراقتى جۇمىسقا قول جەتكىزىپتى. قازىرگى تاڭدا ستاتيست بولىپ قىزمەت ەتىپ جاتقان جاس مامان تۋرالى اۋىل اكىمىنىڭ ورىنباسارى ەرتاي بوزىمبەكوۆ تەك جاقسى پىكىردە.

تاستوبە اۋىلىنىڭ تۇرعىنى جانسەيىت مەيىرحانوۆ اتالعان «ەڭبەك» مەملەكەتتىك باعدارلاماسىنىڭ ەكىنشى باعىتى بويىنشا جاپپاي كاسىپكەرلىكتى دامىتۋ اياسىندا «اۋىل شارۋاشىلىعىن قارجىلاي قولداۋ قورى» ارقىلى 3،5 ميلليون تەڭگە مولشەرىندە جىلقى شارۋاشىلىعىنا نەسيە الىپتى. بۇل قارجىعا 10 جىلقى العان ول قوسىمشا 5،5 ميلليون تەڭگە تاعى نەسيە راسىمدەپ، 20 جىلقى ساتىپ العان. قازىرگى تاڭدا قوراسىندا 30 جىلقى بورداقىلاپ جاتقان جانسەيىت الداعى ۋاقىتتا بيە بايلاپ، قىمىز ءوندىرۋدى جوسپارلاپ وتىر ەكەن.

– باعدارلامانى ىسكە اسىرۋ ماقساتىندا كەشەندى جوسپار بەكىتىلىپ، 2740 ادامدى جۇمىسپەن قامتۋ مەجەسى قويىلدى. قازىرگى تاڭدا 2324 ادام ءۇش باعىت بويىنشا جۇمىسپەن قامتىلدى. ءبىرىنشى باعىت قاتىسۋشىلاردى تەحنيكالىق جانە كاسىپتىك، قىسقا مەرزىمدى وقۋمەن قامتاماسىز ەتۋ بويىنشا 220 ادامعا قارجى بولىنگەن ەدى. دەگەنمەن ءبىز 258 ادامدى وقىتىپ، 126-سى تۇراقتى جۇمىسقا ورنالاستى. ەكىنشى جاپپاي كاسىپكەرلىكتى دامىتۋ باعىتى اياسىندا 140 ادامعا نەسيە بەرۋ ءۇشىن 590 ميلليون تەڭگە قاراجات قارالعان بولاتىن. بۇگىندە ونىڭ 105ء-ى الىپ ۇلگەردى. ياعني، قارجىنىڭ 80 پايىزى يگەرىلدى. سونداي-اق بيىل كوپبالالى انالار مەن جاستارعا مەملەكەتتىك گرانتتار بولىنە باستاعانى بەلگىلى. ناقتىراق ايتقاندا، 100 اەك مولشەرىندە 3 ادام گرانت السا، 40 ادام 200 اەك كولەمىندە گرانتقا قول جەتكىزدى. ال ءۇشىنشى باعىتىمىز حالىقتى جۇمىسپەن قامتۋعا جاردەمدەسۋ جانە ەڭبەك رەسۋرستارى ارقىلى الەۋمەتتىك جۇمىس ورىندارىنا 100 ادامعا قارجى بولىنگەنىمەن، ناقتى ۋاقىتتا 109 ادام تۇراقتى جۇمىسقا ورنالاستى. سونداي-اق جاستار پراكتيكاسىنا 220 ادام جولداۋ جوسپارلانعانىمەن 236 ادام جولدانىپ، ونىڭ 128ء-ى تۇراقتى جۇمىسپەن قامتىلدى. سونىمەن قاتار مۇمكىندىگى شەكتەۋلى 41 ازاماتتى جۇمىسقا ورنالاستىرۋ بەكىتىلگەن بولسا، 66 ادامدى جۇمىس تاپتى، – دەيدى جامبىل اۋدانىنىڭ جۇمىسپەن قامتۋ ورتالىعىنىڭ ديرەكتورى اسقار جانقورازوۆ.