قازاقستاندا الەمدەگى قازاق دياسپورالارىن قولداۋدىڭ مەملەكەتتىك باعدارلاماسى ازىرلەنىپ جاتىر. ول ەتنيكالىق قازاقتارعا ارنايى كۋالىكتەر شىعارۋدى قاراستىرادى. بۇل تۋرالى ومبىداعى قازاقستان مەن رەسەيدىڭ ءوڭىرارالىق فورۋمى اياسىندا وتكەن بيزنەس-فورۋمدا "وتانداستار" قورىنىڭ ءبىرىنشى ۆيسە-پرەزيدەنتى تالعات ادۋوۆ ايتتى، دەپ جازادى Sputnik قازاقستان.
دياسپورالاردى قولداۋدىڭ مەملەكەتتىك باعدارلاماسىن 2020 جىلدىڭ كوكتەمىنە قاراي اياقتاۋ جوسپارلانۋدا. باعدارلاما ەل باسشىلىعى دەڭگەيىندە تانىستىرىلماق.
سونىمەن قاتار 2020 جىلدىڭ كوكتەمىندە «وتانداستار» قورى وتانداستار فورۋمىن وتكىزۋدى جوسپارلاپ وتىر، وندا مەملەكەتتىك باعدارلامانىڭ مۇمكىندىكتەرى جاريا ەتىلەدى.
"مەملەكەتتىك باعدارلامادا جاقسى تەتىكتەر بار، مىسالى، قازاقتىڭ كۋالىگى. بۇل شەتەلدەگى قانداستارىمىزعا قازاقستاندا ساياسي قۇقىقتاردان باسقا كوپتەگەن قۇقىقتى ءبىزدىڭ ەلدىڭ ازاماتتارىمەن تەڭ جاعدايدا پايدالانۋعا مۇمكىندىك بەرەتىن قۇجات"، – دەدى «وتانداستار» قورىنىڭ ءبىرىنشى ۆيسە-پرەزيدەنتى.
قازاقستان ازاماتتارىنىڭ ساياسي قۇقىقتارىنا قوعامدىق ۇيىمدار قۇرۋ، سايلاۋلار مەن داۋىس بەرۋگە، بەيبىت جينالىستار مەن ميتينگىلەرگە قاتىسۋ كىرەدى. «وتانداستار» قورى 2017 جىلى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ تاپسىرماسىمەن قۇرىلدى.
قوردىڭ ماقساتى – الەمدەگى وتانداستارعا قولداۋ كورسەتۋ، قازاق دياسپورالارىن بىرىكتىرۋ جانە دۇنيەجۇزىلىك قازاقتار قاۋىمداستىعىنىڭ ءرولىن كۇشەيتۋ.
پىكىر قالدىرۋ