2023 جىلعا قاراي وبلىس تۇرعىندارى تولىقتاي تازا اۋىزسۋمەن قامتىلادى. قازىرگى تاڭدا وڭىردەگى 377 ەلدى مەكەننىڭ 55 پايىزى ورتالىقتاندىرىلعان اۋىزسۋىنا قوسىلعان بولسا، الداعى 4 جىل ىشىندە بۇل كورسەتكىش كەزەڭ-كەزەڭىمەن 100 پايىزعا تەڭەسەدى، دەپ جازادى Qamshy.kz اقپارات اگەنتتىگى. 

بۇگىندە وبلىستاعى 205 ەلدىمەكەندە ورتالىقتاندىرىلعان اۋىزسۋعا قوسىلعان. دەگەنمەن زەردەلەۋ بارىسىندا ونداعى 129 مىڭنان اسا حالىقتىڭ تازا اۋىزسۋ جۇيەسىنە قول جەتكىزە الما وتىر. وسى ورايدا ءبىرقاتار مەملەكەتتىك كاسىپورىندارعا ليزەنسيا الىپ بەرۋ ناتيجەسىندە كۇنى بۇگىنگە دەيىن 81 مىڭنان استام تۇرعىن اۋىزسۋعا قوسىلعان. جىل سوڭىنا دەيىن بۇل كورسەتكىش تاعى 24 مىڭ ابونەنتپەن تولىعادى دەپ كۇتىلۋدە. سونداي-اق وبلىستاعى 10 ەلدى مەكەنگە جاڭادان سۋ قۇبىرىن تارتۋ جۇمىستارى دا جۇرگىزىلىپ جاتىر. كەلەر جىلى 18، 2021 جىلى 41، 2022 جىلى 47 ەلدى مەكەنگە اۋىزسۋ جۇيەسىن تارتىلادى.

وبلىس اكىمىنىڭ تاپسىرماسىمەن تۇرعىندار سانى 200-گە دەيىنگى 49 ەلدى مەكەندى جەرگىلىكتى بيۋدجەت ەسەبىنەن ءبىرىڭعاي وپەراتور ارقىلى اۋىزسۋمەن قامتۋ شارالارى ۇيىمداستىرىلادى.

مۇنان بولەك وبلىس تۇرعىندارىن تابيعي گازبەن قامتۋ ماسەلەسى دە باستى نازارعا الىندى. بۇگىندە وڭىردەگى ەلدى مەكەندەردىڭ 48 پايىزى نەمەسە 181ء-ى گازداندىرىلعان. 2027 جىلعا دەيىن 196 ەلدى مەكەندى كەزەڭ-كەزەڭىمەن تولىقتاي گازداندىرىلادى. گازداندىرۋ كەزىندە ەلدى مەكەنگە تارتىلعان گاز جۇيەسى بولا تۇرىپ، قوسىلۋ قۇنىنىڭ قىمباتتىعىنا بايلانىستى كوگىلدىر وتىنعا قولى جەتپەي وتىرعان 31 مىڭ تۇرعىننىڭ ماسەلەسى دە باستى نازاردا.

بۇل ورايدا ءوڭىر باسشىسىنىڭ باستاماسىمەن «گاز جانە گازبەن جابدىقتاۋ» زاڭىنا وزگەرىس ەنگىزىلىپ، كوگىلدىر وتىنعا قوسىلۋ باعاسى 2-3 ەسە تومەندەتىلگەن سوڭ، اتالعان تۇرعىندار كوگىلدىر وتىنعا قول جەتكىزۋگە مۇمكىندىك العان. سونىمەن قاتار تاراز قالاسى ماڭىنداعى 35 ساياجاي مەن تۇرعىن القابىنىڭ 20-سىنا گاز تارتۋ جۇمىستارى قارقىن العان. 2019-2021 جىلدارى وبلىستاعى 81 ەلدىمەكەندى گازبەن قامتۋعا رەسپۋبليكالىق بيۋدجەتتەن ءتيىستى قارجى قاراستارىلعان.

جالپى وڭىردەگى الەۋمەتتىك-ەكونوميكالىق ورلەۋىندەگى نەگىزگى كورسەتكىشتەردى تۇزۋدە جەرگىلىكتى تۇرعىنداردىڭ تازا اۋىز سۋمەن جانە كوگىلدىر وتىنمەن قامتىلۋ ماسەلەسى باستى نازارعا الىنادى. سوندىقتان جەرگىلىكتى بيلىك بۇل جۇمىستاردى جۇيەلى ۇيىمداستىرۋدى ءجىتى نازاردا ۇستايدى. وعان وبلىس اۋماعىنداعى اتالعان سەكتوردا اتقارىلعان جانە تاياۋ بولاشاققا تۇزىلگەن جوسپار ناقتى مىسال بولا الادى.