شۋ اۋدانىنىڭ ساۋىتبەك اۋىلى مەن شۋ قالاسىنىڭ باتىس مولتەك اۋدانىندا جاڭا مەشىت جاماعاتقا ەسىگىن ايقارا اشتى، دەپ جازادى Qamshy.kz اقپارات اگەنتتىگى. 

ءسان-سالتاناتى جاراسقان ساۋلەتتى عيماراتتىڭ بوي كوتەرۋىمەن وبلىستاعى يماندىلىق ۇيلەرىنىڭ قاتارى تولىعا ءتۇستى. كوك كۇمبەزى كوك تىرەگەن اللانىڭ جەردەگى ءۇيىنىڭ ءبىرىنىڭ قۇرىلىسى بىرنەشە جىل بۇرىن باستالعان ەكەن. الايدا قولدىڭ قىسقالىعىنان مەشىتتى ۋاقىتتىلى پايدالانۋعا بەرۋ مۇمكىن بولماعان. جالپى ەكى مەشىتتى دە اۋىل تۇرعىندارى ءوز كۇشتەرىمەن تۇرعىزعان. مەشىتكە قاجەتتى قۇرىلىس ماتەريالدارىنا تۇرعىنداردان اقشا جينالعان، ال ونىڭ قۇرىلىسىنا اۋىل تۇرعىندارى تايلى-تۇياعى قالماي اتسالىسقان. تەك ساۋىتبەك اۋىلىنان بوي كوتەرگەن مەشىتتىڭ قۇرىلىسىنا وسى ەلدى مەكەندە تۋىپ-وسكەن جەكە كاسىپكەر جاقسىعۇل ديقانبايەۆ كومەك قولىن سوزعان.

كۇندەردىڭ سۇلتانى جۇمادا اشىلعان ساۋىتبەك اۋىلىنداعى مەشىتكە قۇت تىلەگەن اۋىل جۇرتشىلىعى كاسىپكەر جاقسىعۇل ديقانبايەۆقا ات مىنگىزىپ، شاپان جاپتى. ال كاسىپكەر دە ءوز كەزەگىندە قاراپ قالماي قۇرىلىس جۇمىستارىنا اتسالىسقان اۋىلداستارىنا سىي-سياپات جاسادى. كەلەسى ساتتە مەشىتتىڭ جانىنان كيىز ۇيلەر تىگىلىپ، اس تاراتىلىپ، قۇران وقىلدى. سوڭىنان كوكپار تارتىلىپ، 1 ميلليون تەڭگە جۇلدە قورى جەڭىمپازدارعا بەرىلدى.

كەلەسى كۇنى اشىلعان شۋ قالاسىنىڭ باتىس مولتەك اۋدانىنداعى جاڭا مەشىتكە كارىباي مولدا ەسىمى بەرىلدى. كارىباي مولدا وسى وڭىردە العاشقى يمام بولعان، ءدىني ءىلىم تاراتقان ۇستاز.

يسلامنىڭ يگىلىك جولىن ناسيحاتتاپ، بارشا جاماعاتتى جاراتۋشى حاق تاعالاعا عيبادات ەتۋگە شاقىراتىن قوس مەشىتتىڭ اشىلۋىمەن قۇتتىقتاپ وبلىستىڭ باس يمامى قانات جۇماعۇل مەن اۋدان اكىمىنىڭ ورىنباسارى ءاليحان بالقىبەكوۆ كەلىپ، تىلەكتەرىن ءبىلدىردى.

ءدال بۇگىنگىدەي ءدىن ماسەلەسىنە ايرىقشا نازار اۋدارىلعان تۇستا تۇتاس قوعامدى يماندىلىق پەن ىزگىلىككە شاقىراتىن مەشىتتەردىڭ كوپتەپ سالىنۋى قۋانتارلىق جاي. ءارى ونىڭ قۇرىلىس جۇمىستارىنا اۋىل-ايماقتىڭ تۇگەل قاتىسۋى اعايىننىڭ باسىن بىرىكتىرىپ، ساۋاپتى ىسكە جۇمىلدىرا العان اۋىز بىرشىلىكتى اڭعارتادى. قالاي دەسەك تە حالىقتىڭ دىنگە سەنىمىنىڭ نىعايۋى، دىنگە قۇرمەت كورسەتۋ سانامىزدىڭ ازامات ەتىلگەنىنىڭ انىق بەلگىسىنە اينالدى. ءوز كەزەگىندە بۇل ءدىني ورىندار ۇرپاق ساناسىنا يسلام ءدىنىنىڭ بار اسىل قاسيەتىن ءسىڭىرىپ، يماندىلىققا باۋليتىن ورىنعا اينالاتىندىعى ەش كۇمان تۋعىزبايدى.