نەگىزىنەن وندىرىستىك، يندۋستريالدى ايماققا جاتاتىن سارىسۋ اۋدانىندا سوڭعى جىلدارى اگرو سالانىڭ قارقىندى دامۋى بايقالادى. اۋدانداعى اگروسەكتورداع نەگىزگى كورسەتكىشتەر ەگىن شارۋاشىلىعىنا تيەسىلى بولعانىمەن ايماقتاعى مال شارۋاشىلىعىنىڭ تابىستىلىعى ەسەلەپ ارتقان. جىل باسىنان بەرى ءدال وسى باعىتتا جۇمىس جاسايتىن شارۋاشىلىقتاردىڭ ەسەبىنەن جالپى سوماسى 4 ميلليارد 500 ميلليون تەڭگە بولاتىن اۋىل شارۋاشىلىق ءونىمى ءوندىرىلدى، دەپ جازادى Qamshy.kz اقپارات اگەنتتىگى. 

مال شارۋاشىلىعىنىڭ تابىستىلىعىنىڭ مىسالى رەتىندە ايماقتاعى مال باسىنىڭ سانى دا جىل ساناپ ۇلعايا تۇسكەنىن اتاپ وتۋگە بولادى. ماسەلەن جىل باسىنان بەرى ايماقتاعى ءمۇيىزدى ءىرى قارانىڭ جالپى سانى 20 784 باستى قۇرادى. ءوز كەزەگىندە ءىرى قارا مال باسىنىڭ سانى وتكەن جىلدىڭ ەسەپتى كەزەڭىمەن سالىستىرعاندا 1053 داناعا كوبەيگەن. سول سەكىلدى ءوسىم قامبار اتا تۇلىگىنىڭ ۇيىرىندە دە بايقالادى. ماسەلەن سارىسۋداعى قازىرگى جىلقىنىڭ جالپى سانى 6567 دانا بولسا، وسىمدىلىك 334 باستى قۇراعان. اۋداندا ءقازىر 239 509 باس قوي-ەشكى جانە 2 122 باس تۇيە بار ەكەن.

ءتورت تۇلىگى قاراتاۋدىڭ توسكەيىن جايىلاعان اۋداندا مال شارۋاشىلىعى ونىمدەرىن ءوندىرۋ ىسىندە دە تولايىم تابىسقا قول جەتكىزىلگەن.قاڭتار ايىنان بەرى ايماقتاعى مال شارۋاشىلىعى باعىتىندا جۇمىس جاسايتىن اگروقۇرىلىمدار 5 312 توننا ەت جانە 4 484 توننا ءسۇت ءوندىردى. بيىل سارىسۋلىق شارۋالار ەت ونىمدەرىن 171،4 تونناعا، ءسۇتتى 100،6 تونناعا ارتىق ءوندىردى. سونداي-اق بيىل اۋدانداعى قۇس شارۋاشىلىعى باعىتىندا جۇمىس جاسايتىن شارۋاشىلىقتارمەن 3 ميلليون 129 مىڭ دانا جۇمىرتقا دايىندالعان.

جالپى مال شارۋاشىلىعى سالاسىنداعى جوعارى ەڭبەك ونىمدىلىگىن ەسەپتەۋدە اۋدان شارۋالارىنىڭ ەكسپورتتىق الەۋەتى دە ەسكەرىلەدى. بۇل فاكتور بويىنشا سارىسۋلىق شارۋالاردىڭ اۋىز تولتىرىپ ايتۋعا بولاتىن جەتىستىكتەرى دە بار. اعىمداعى جىلى جەرگىلىكتى فەرمەرلەرگە 50 توننا سيىر ەتىن ەكسپورتتاۋ مەجەسى قويىلدى. 9 ايدىڭ قورىتىندىسىنىڭ وزىندە شارۋالار بۇل مەجەنى 100 پايىز ورىنداي الدى. ال قوي ەتى ەكسپورتى بويىنشا بەكىتىلگەن جوسپار 160 تونناعا تەڭ. جىل باسىنان بەرى سارىسۋلىقتار شوپان اتا تۇلىگى ەتىنىڭ 43 تونناسىن ەكسپورتقا جونەلتكەن. سالاداعى كورسەتكىشتەرگە قاراپ وتىرىپ فەرمەرلەردىڭ جىل سوڭىنا دەيىن بۇل مەجەنىڭ ۇدەسىنەن شىعۋدىڭ بارلىق مۇمكىندىكتەرى قاراستىرىلىپ جاتقانى اڭعارىلادى.

جالپى اۋدانداعى مال باسى سانىنىڭ ۇلعايۋى جانە ونىڭ ونىمدىلگىن ارتتىرۋىنا مەملەكەت تاراپىنان كورسەتىلەتىن قولداۋدىڭ كومەگى كولدەي. تەك «قۇلان»، «التىن اسىق» باعدارلامالارىنىڭ ءوزى شارۋالاردىڭ ەكىنشى تىنىسىن اشاتىن باستامالارعا مۇمكىندىك بەردى.