الماتى اكىمى دارحان ساتىبالدى اۋەزوۆ اۋدانىنا جۇمىس ساپارىمەن بارىپ، اۋلالاردى كوركەيتۋ، نارىقتى قايتا جاڭعىرتۋ جانە الەۋمەتتىك مەديسينالىق نىسان سالۋ جوبالارىنىڭ جۇزەگە اسۋ بارىسىمەن تانىستى.
جۇمىس ساپارى 10-شاعىناۋدانداعى «حالىق قاتىساتىن بيۋدجەت» باعدارلاماسى اياسىندا كوركەيتىلگەن سكۆەردەن باستالدى. اۋماعى 3،89 گەكتار بولاتىن جوبانى اۋدان تۇرعىندارى ۇسىنعان. جۇمىس بارىسىندا 4،5 مىڭ شارشى مەتردەن استام كەسپە تاس توسەلدى، 8،5 مىڭ شارشى مەتر اۋماق كوگالداندىرىلدى، 550 بۇتا جانە 30 اعاش وتىرعىزىلدى. سونداي-اق اۆتوسۋارۋ جۇيەسى، 83 جارىقتاندىرۋ تىرەگى، 45 قوقىس جاشىگى جانە 24 بەينەباقىلاۋ كامەراسى ورناتىلدى. ورىندىقتار مەن ويىن الاڭدارىنىڭ ءبىر بولىگى قايتا قالپىنا كەلتىرىلدى.
بۇدان كەيىن قالا اكىمى 4-شاعىناۋداندا ورنالاسقان «سارىارقا» بازارىنىڭ قايتا جاڭعىرتىلۋ بارىسىمەن تانىستى. جۇمىس «ماركەت پلازا» ءجشس-نىڭ 1،5 ملرد تەڭگە جەكە ينۆەستيسياسى ەسەبىنەن جۇرگىزىلۋدە. 2025 جىلدىڭ جەلتوقسانىندا اياقتالۋى جوسپارلانعان جوبا ناتيجەسىندە 0،84 گەكتار اۋماقتا زاماناۋي ساۋدا كەشەنى اشىلىپ، جۇمىس ورىندارىنىڭ سانى 250-گە دەيىن ارتادى.
ساپار بارىسىندا دارحان ساتىبالدى №2 قالالىق بالالار كلينيكالىق اۋرۋحاناسىنا باردى. مۇندا ەسكى كورپۋس ءسۇرىلىپ، 67 توسەك-ورىنعا ارنالعان جاڭا عيماراتتىڭ قۇرىلىسى جوسپارلانعان. قۇرىلىس-مونتاج جۇمىسى 2025 جىلدىڭ قاراشاسىندا باستالىپ، 2027 جىلدىڭ اقپانىندا اياقتالۋعا ءتيىس.
«دەنساۋلىق ساقتاۋ سالاسىن دامىتۋعا ەرەكشە كوڭىل ءبولىپ وتىرمىز. قۇرىلىستىڭ ساپاسى مەن مەرزىمىن قاتاڭ ساقتاۋ ماڭىزدى»، – دەدى قالا اكىمى.
ساپار سوڭىندا دارحان ساتىبالدى التىنسارين داڭعىلى، 1 مەكەنجايىنداعى كوگالداندىرۋ وبەكتىلەرىن جانە قابدولوۆ كوشەسى، 6 بويىنداعى كوركەيتىلگەن اۋماقتى قارادى. بۇل نىساندار دا «حالىق قاتىساتىن بيۋدجەت» باعدارلاماسى اياسىندا جۇزەگە اسقان جانە بۇگىندە تولىق اياقتالعان. مۇندا زاماناۋي جارىقتاندىرۋ، ورىندىقتار، قوقىس جاشىكتەرى، بالالار ويىن الاڭدارى مەن بەينەباقىلاۋ جۇيەلەرى ورناتىلعان.
قالا اكىمى جوبالاردى تۇرعىندار سۇرانىسىن ەسكەرە وتىرىپ جۇزەگە اسىرۋدىڭ ماڭىزدىلىعىن اتاپ ءوتتى. سونىمەن قاتار كوركەيتىلگەن اۋماقتاردى ءتيىستى دەڭگەيدە كۇتىپ ۇستاۋدى جانە قالادا ءبىرىڭعاي ساۋلەتتىك ءستيلدى ساقتاۋ – جاسىل جەلەك، كوشەدەگى شاعىن ارحيتەكتۋرالىق نىساندار جانە جارىقتاندىرۋ ەلەمەنتتەرىنە دەيىن بىرىزدەندىرۋدى تاپسىردى.
