پرەزيدەنت قازاق-قىتاي ىسكەرلىك كەڭەسىنىڭ وتىرىسىندا ءسوز سويلەپ، ەلىمىزدىڭ ينۆەستيسيالىق الەۋەتىن تانىستىردى، دەپ حابارلادى اقوردا.
مەملەكەت باسشىسى جۇڭگو قازاقستاننىڭ تاعدىر قوسقان تاتۋ كورشىسى، جاقىن دوسى جانە ماڭگىلىك ستراتەگيالىق سەرىكتەسى ەكەنىن ايتتى. پرەزيدەنتتىڭ ايتۋىنشا، ورتاق تاريح، تەرەڭ بايلانىس پەن ءوزارا تۇسىنىستىك – حالىقتارىمىزدى بىرىكتىرەتىن مىزعىماس قۇندىلىقتار.
"بىلتىر ءبىزدىڭ ەلدەرىمىز اراسىنداعى ساۋدا اينالىمى 44 ميلليارد دوللارعا جەتتى. بۇل – ەكى ەل تاريحىندا بۇرىن-سوڭدى بولماعان ەڭ جوعارى كورسەتكىش. ءبىراق ءبىز مۇنىمەن توقتاپ قالماۋىمىز كەرەك. سوندىقتان قىتايلىق دوستارىمىزبەن وسى قارقىندى ودان ءارى ارتتىرىپ، الداعى بەس جىلدا ءوزارا ساۋدا كولەمىن ەداۋىر ۇلعايتۋدى جوسپارلاپ وتىرمىز. بۇعان الەۋەتىمىز جەتەدى. مەملەكەت باسشىلارى دەڭگەيىندە ءوزارا ساياسي ەرىك-جىگەر مەن ورتاق ۇمتىلىس بار"، – دەدى قاسىم-جومارت توقايەۆ.
مەملەكەت باسشىسى ەكى ەلدىڭ ينۆەستيسيالىق ىقپالداستىعى دا ۇدايى كەڭەيىپ كەلە جاتقانىنا نازار اۋداردى.
"جۇڭگو قازاقستان ەكونوميكاسىنا 27 ميلليارد دوللار ينۆەستيسيا سالدى. بۇل، شىن مانىندە، وتە جاقسى ۇدەرىس. سوندىقتان وسى جۇمىس تابىستى تۇردە جالعاسادى دەپ تولىق سەنىممەن ايتۋعا بولادى. ءبىزدىڭ ەلىمىزدە جۇڭگو كاپيتالى بار 6 مىڭنان استام كاسىپورىن جۇمىس ىستەپ جاتىر. ولاردىڭ اراسىندا CNPC، CITIC، SINOPEC، HUAWEI سياقتى الەمدىك دەڭگەيدەگى مىقتى كورپوراسيالار بار"، - دەدى پرەزيدەنت.
مەملەكەت باسشىسىنىڭ ايتۋىنشا، بۇگىنگى باسقوسۋ بيزنەس وكىلدەرى اراسىنداعى بايلانىستاردى ودان ءارى نىعايتۋعا زور سەپتىگىن تيگىزەرى انىق.
سونىمەن قاتار قاسىم-جومارت توقايەۆ ءوزارا ىنتىماقتاستىقتى ودان ءارى جانداندىرۋدىڭ ءبىرقاتار باسىم باعىتتارى جايىندا دا ايتتى.
"بيىل "دوستىق – مويىنتى" تەمىر جولىنىڭ ەكىنشى جەلىسى ىسكە قوسىلادى. سونىڭ ارقاسىندا قازاقستان ارقىلى وتەتىن "جۇڭگو – ەۋروپا" ترانزيت ءدالىزىنىڭ جۇك وتكىزۋ مۇمكىندىگى 5 ەسە ارتادى. سونىمەن بىرگە، قازاقستان ترانسكاسپيي حالىقارالىق كولىك باعدارىنىڭ الەۋەتىن كەڭەيتۋگە بارىنشا اتسالىسىپ جاتىر"، – دەدى مەملەكەت باسشىسى.
توقايەۆ سويلەگەن سوزىندە ەنەرگەتيكا سالاسىنداعى ىقپالداستىقتى كەلەسى باسىمدىق رەتىندە اتادى. ول قىتايدىڭ جاساندى ينتەللەكت سالاسىنداعى ىنتىماقتاستىق جونىندەگى جاھاندىق ۇيىم قۇرۋ باستاماسىن قولدايتىنىن جەتكىزدى.
