ق ر ۇلتتىق كىتاپحاناسىندا «جاساندى ينتەللەكت جانە ادەبيەت» اتتى عىلىمي كونفەرەنسيا ءوتتى. اتالعان جيىن قازىرگى زامانداعى وزەكتى ماسەلەلەردىڭ ءبىرى – جاساندى ينتەللەكتتىڭ ادەبيەت پەن مادەنيەت سالالارىنا ىقپالىن عىلىمي تۇرعىدا زەردەلەۋگە ارنالدى. بۇگىندە جاڭا تەحنولوگيالار دامىپ، جاساندى ينتەللەكت شىعارماشىلىق ۇدەرىستەرگە بەلسەندى ارالاسا باستادى. وسى ورايدا ونىڭ كوركەم ادەبيەتكە تيگىزەر اسەرى، مۇمكىندىكتەرى مەن تۋىنداۋى مۇمكىن تاۋەكەلدەر تەرەڭ تالداۋدى قاجەت ەتەدى.
وسى ماسەلەلەرگە وراي مەملەكەت تاريحى ينستيتۋتىنىڭ عىلىمي-اقپارات ءبولىمىنىڭ باسشىسى امانعوسوۆ ەركەبۇلان رۋسلانبەك ۇلى ءوز بايانداماسىندا جاساندى ينتەللەكتىنى پايدالانۋعا بايلانىستى ماڭىزدى تاريحي اسپەكتىلەرگە توقتالدى. ول ءجي-دىڭ تاريحي دەرەكتەردى وڭدەۋ بارىسىندا ورىن الۋى ىقتيمال بۇرمالاۋشىلىقتار مەن اقپاراتتىق قاتەلىكتەردىڭ قاۋىپتىلىگىنە نازار اۋدارىپ، اسىرەسە فولك-حيستوري مەن جالعان نارراتيۆتەردىڭ تارالۋ ءقاۋپىن اتاپ ءوتتى. گەنەراتيۆتى ءجي-دىڭ «ەسكى فوتو» نەمەسە «ارحيۆ قۇجاتى» سياقتى جاساندى ماتەريالدار تۋدىرۋى قوعامنىڭ تاريحي ساناسىنا كەرى اسەر ەتۋى مۇمكىن ەكەندىگىن ايتتى. ءدال وسى سەبەپتى ءبىرقاتار ەلدەردە ارحيۆتەر مەن مۋزەيلەر جانىنان جي ناتيجەلەرىن كاسىبي تاريحشىلار ساراپتايتىن ارنايى كەڭەستەر جۇمىس ىستەيتىنى، ال يۋنەسكو مەن ەۋروپالىق كوميسسيا تاريحي دەرەكتەردى تەكسەرۋ مەن ەتيكالىق شەكتەۋلەر ەنگىزۋ تەتىكتەرىن ۇسىنىپ وتىرعانى باياندالدى. عالىم قورىتىندىلاي كەلە، جاساندى ينتەللەكتپەن جۇمىس «تاريحشى – جي – قوعام» ءۇشتاعانى نەگىزىندە قۇرىلۋى ءتيىس ەكەنىن، تاريحي پايىم جاساۋ مىندەتى ادام ماماندارعا عانا تيەسىلى بولۋ كەرەكتىگىن اتاپ ءوتتى.
كونفەرەنسيانىڭ باستى ماقساتى – جاساندى ينتەللەكت پەن ادەبي شىعارماشىلىقتىڭ ءوزارا بايلانىسىن سارالاپ، اۆتورلىق قۇقىق پەن تىلدىك-ەستەتيكالىق نورمالارعا قاتىستى جاڭا سۇراقتارعا جاۋاپ ىزدەۋ بولدى. سونىمەن قاتار ءجي-دىڭ ادەبي تىلگە، كوركەم ويلاۋعا جانە ۇلتتىق ادەبيەت دامۋىنا ىقپالى دا نازارعا الىندى.
ءىس-شارا بارىسىندا ادەبيەتتانۋشىلار، قالامگەرلەر، زەرتتەۋشىلەر مەن سالا ماماندارى بايانداما جاساپ، اشىق پىكىر الاڭى ۇيىمداستىرىلدى. ولار جاساندى ينتەللەكت اكەلەتىن تىڭ مۇمكىندىكتەر مەن سىن-قاتەرلەردى، سونداي-اق شىعارماشىلىق ەركىندىك پەن ەتيكالىق جاۋاپكەرشىلىك ماسەلەلەرىن تالقىلادى.
كونفەرەنسياعا قازاقستان جازۋشىلار وداعىنىڭ مۇشەلەرى، م. اۋەزوۆ اتىنداعى ادەبيەت جانە ونەر ينستيتۋتىنىڭ عالىمدارى، ۇلتتىق مەملەكەتتىك كىتاپ پالاتاسى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىنىڭ وقىتۋشىلارى جانە جاس زەرتتەۋشىلەرى قاتىستى.
