ينتەراكتيۆتى RasInfo رەسۋرسى – عالىمدار، اناليتيكتەر، كيبەرقاۋىپسىزدىك جانە مەدياساۋاتتىلىق سالاسىنىڭ ماماندارىنان قۇرالعان كوماندانىڭ ءۇش جىل بويى جۇرگىزگەن جۇمىسىنىڭ ناتيجەسى. ونىڭ ماقساتى – پايدالانۋشىلارعا سيفرلىق ساۋاتتىلىقتى ارتتىرۋعا جانە دۇرىس ەمەس اقپارات ينديكاتورلارىن انىقتاۋعا كومەك كورسەتۋ، دەپ حابارلايدى Egemen.kz.

جوبا ناتيجەلەرى 25ء-شى ورتالىق ازيا مەديا كونفەرەنسياسىندا تاشكەنتتە، «اۋديتوريانى تارتۋ: مەدياساۋاتتىلىق – دەزينفورماسياعا الدىڭعى قاتارداعى جاۋاپ» سەسسياسى اياسىندا ۇسىنىلدى.

جوبانىڭ جەتەكشىسى، قازۇپۋ پروفەسسورى گۇلميرا سۇلتانبايەۆا ايتىپ وتكەندەي، ەۋروپاداعى قاۋىپسىزدىك پەن ىنتىماقتاستىق ۇيىمى وكىلدەرى ۇسىنىلعان زەرتتەۋلەردىڭ مەدياساۋاتتىلىقتى ارتتىرۋ تۇرعىسىنان وزەكتىلىگىن جوعارى باعالادى. كونفەرەنسيادا سيفرلىق تۇراقتىلىق پەن سىني ويلاۋ قابىلەتىن دامىتۋ ارقىلى دەزينفورماسيا مەن ديپفەيكتەرگە قارسى كۇرەسۋ بۇگىنگى تاڭدا بۇكىل الەم ءۇشىن ماڭىزدى ەكەنى ايتىلدى.

سونىمەن قاتار، RasInfo قولدانباسى، ونىڭ كىتاپحاناسى جانە زەرتتەۋ بازاسى ب ا ق ەركىندىگى مەن كيبەرقاۋىپسىزدىك سالاسىنىڭ ماماندارى تاراپىنان قولداۋ تاپتى. اۆتورلىق ۇجىم جوبانىڭ ناتيجەلەرىن ۆەنانىڭ ەقىۇ كەڭسەسىندە تانىستىرۋدى جوسپارلاپ وتىر.

گۇلميرا سۇلتانبايەۆانىڭ ايتۋىنشا، جوبا اياسىندا ۇلكەن عىلىمي-زەرتتەۋ جۇمىسى جۇرگىزىلدى. سونىڭ ىشىندە «قازاقستانداعى دۇرىس ەمەس اقپارات ينديكاتورلارى» اتتى كوللەكتيۆتىك مونوگرافيا جانە «سيفرلىق ساۋاتتىلىق كورسەتكىشتەرى: قازاقستانداعى اقپاراتتىق مادەنيەتتى دامىتۋ جۇيەسى» اتتى ادىستەمەلىك نۇسقاۋلىق دايىندالعان.

RasInfo ەڭ كەڭ اۋديتورياعا باعىتتالعان: مەكتەپ وقۋشىلارى مەن ولاردىڭ اتا-انالارىنان باستاپ جۋرناليستەر مەن مەملەكەتتىك قىزمەتكەرلەرگە دەيىن. قولدانبا بەس وقىتۋ مودۋلىنەن، سەرتيفيكاتتاۋ جۇيەسىنەن، اشىق دەرەكتەر بازالارى كاتالوگىنان جانە عىلىمي جاريالىمدار كىتاپحاناسىنان تۇرادى. ايتا كەتەتىن جايت، العاش رەت وتاندىق تاجىريبەدە باعدارلاماعا فاكچەك جاساۋ جانە دەزينفورماسيانى تانۋعا ارنايى ۇيرەتىلگەن جي ەنگىزىلدى.

قولدانبا قازاقستان اقپارات الاڭىندا بولعان جالعان جاڭالىقتاردىڭ ناقتى كەيستەرىمەن جۇمىس ىستەيدى. ءار فەيك قىسقاشا مازمۇنى، پايدا بولۋ كوزى، قولدانىلعان قۇرالدار، دەزينفورماسيا ءتۇرى مەن كاتەگورياسى جانە پايدالانۋشىعا ارنالعان پراكتيكالىق قورىتىندى ارقىلى تالدانادى.

بۇل فورمات فەيك قالاي پايدا بولاتىنىن جانە ونى قالاي تانۋعا بولاتىنىن ناقتى كورسەتەدى. بەس مودۋل بىرتىندەپ سيفرلىق ساۋاتتىلىق، مەدياقاۋىپسىزدىك جانە سىني ويلاۋ داعدىلارىن قامتيدى. كۋرس سوڭىندا QR-كودپەن سەرتيفيكات بەرىلەدى، بۇل وقۋشىلار مەن جاس ماماندار ءۇشىن قوسىمشا ىنتالاندىرۋ بولىپ سانالادى.

قولدانبادا بۇۇ-دان باستاپ دۇنيەجۇزىلىك بانككە دەيىن شامامەن 100 دەرەكتەر بازاسى جيناقتالعان. ءاربىر بازانىڭ قىسقاشا سيپاتتاماسى بەرىلىپ، پايدالانۋشى سىلتەمە ارقىلى تىكەلەي باستاپقى دەرەككوزگە وتەدى. 

قولدانبا ازىرشە تەست رەجيمىندە جۇمىس ىستەپ جاتىر، ءبىراق جەلتوقساندا ونىڭ كەڭ كولەمدە تانىستىرىلۋى جوسپارلانعان. گۇلميرا سۇلتانبايەۆانىڭ ايتۋىنشا، جوبا كومانداسى وقۋ-اعارتۋ مينيسترلىگىنە مەن عىلىم جانە جوعارى ءبىلىم مينيسترلىگىنە جۇگىنىپ، قولدانبانى مەكتەپتەردە، كوللەدجدەردە جانە ۋنيۆەرسيتەتتەردە پايدالانۋ مۇمكىندىگىن قامتاماسىز ەتۋدى جوسپارلاپ وتىر.

پروفەسسوردىڭ ايتۋىنشا، جوبانىڭ پراكتيكالىق ماڭىزى – قازاقستان عالىمدارىنىڭ جاساعان ەڭ باستى قۇندىلىعى – ادامعا اقپاراتتىق ورتادا باعدارلانۋعا جانە مانيپۋلياسيادان قورعانۋعا كومەكتەسەتىن قولجەتىمدى ءارى عىلىمي تۇرعىدا نەگىزدەلگەن قۇرال جاساۋ.

«بۇل كوممەرسيالىق قولدانبا نەمەسە فورمالدى وقۋ قۇرالى ەمەس. بۇل ءۇش جىلدىق فۋندامەنتالدى زەرتتەۋدىڭ ناتيجەسى، مەملەكەتتىك ساراپتامادان وتكەن، عىلىمي قوعامداستىق پەن حالىقارالىق اپروباسيادان وتكەن ءونىم. قولدانبا تەز جۇمىس ىستەيدى، اركىمگە قولجەتىمدى جانە قازاقستان تۇرعىندارى كەزىگەتىن ناقتى اقپاراتتىق قاۋىپتەردى ەسەپكە الادى»، دەيدى گۇلميرا سۇلتانبايەۆا.

ول قازىرگى اقپارات كەڭ تارالىپ، بارلىق سالادا سيفرلىق قارقىن دامىپ جاتقان كەزەڭدە وسىنداي ءموبيلدى رەسۋرس ۇلتتىق سيفرلىق قاۋىپسىزدىكتىڭ ماڭىزدى ەلەمەنتى بولا الاتىنىن اتاپ ءوتتى.