الماتى يننوۆاسيالىق ەكونوميكانى دامىتۋ ءۇشىن قولايلى ورتا قالىپتاستىرۋدا. قالادا تەحنوپاركتەر، اكسەلەراتورلار، IT-ورتالىقتار جۇمىس ىستەيدى. Astana Hub Almaty جاساندى ينتەللەكت، روبوتوتەحنيكا جانە بيوتەحنولوگيا سالالارىندا ستارتاپتارعا مەنتورلىق جانە قولداۋ كورسەتەدى.

الداعى جىلدارى 300-گە جۋىق پەرسپەكتيۆالى جوبانى قولداۋ، قالالىق ينفراقۇرىلىمعا كەمىندە 15 يننوۆاسيالىق شەشىستى ەنگىزۋ جوسپارلانىپ وتىر. جەكە ينۆەستيسيالار كولەمى 100 ملن دوللاردان كەم ەمەس.

ۋنيۆەرسيتەتتەر – سيفرلىق ەۆوليۋسيانىڭ سەرىكتەستەرى

الماتىنىڭ جوعارى وقۋ ورىندارى – قالانىڭ سيفرلىق ترانسفورماسياسىنىڭ نەگىزگى كادر ورتالىعى. ءال-فارابي اتىنداعى قازۇۋ جانە الماتىلىق تەحنولوگيالىق ۋنيۆەرسيتەت اكسەلەراسيالىق باعدارلامالارعا قاتىسادى، زەرتحانالار اشادى، ستۋدەنتتەردىڭ يننوۆاسيالىق جوبالارىن قولدايدى.

بۇل ۋنيۆەرسيتەتتەر قالانىڭ بيزنەس-ەكوجۇيەسىمەن تىعىز بايلانىستا جۇمىس ىستەپ، ستۋدەنتتەرگە ناقتى داعدىلار مەن تاجىريبە بەرەدى.

تۇرعىندار – سيفرلىق وزگەرىستەردىڭ بەلسەندى قاتىسۋشىلارى

الماتىدا سيفرلاندىرۋ – تەك تەحنولوگيا ەمەس، تۇرعىنداردىڭ قاتىسۋى. قالا زاماناۋي داعدىلاردى ۇيرەتۋگە باعىتتالعان كۋرستار وتكىزەدى. TUMO Almaty، Tomorrow School سياقتى جوبالار جاستارعا باعدارلامالاۋ، جي جانە كيبەرقاۋىپسىزدىك سالالارىن مەڭگەرۋگە مۇمكىندىك بەرەدى. Umit.kz جانە Open Almaty سياقتى پلاتفورمالار تۇرعىندارعا ۇسىنىستار ايتۋعا، شاعىم قالدىرۋعا جانە قالانىڭ دامۋىنا تىكەلەي اسەر ەتۋگە مۇمكىندىك بەرەدى.

مۇنداي كەشەندى كوزقاراس تەحنولوگيالىق تۇرعىدان ساۋاتتى ءارى بەلسەندى تۇرعىنداردى قالىپتاستىرادى. ولار قالانىڭ ومىرىنە جان-جاقتى قاتىسىپ، بيلىكپەن بىرلەسە وتىرىپ يننوۆاسيالىق شەشىمدەردى ەنگىزە الادى. بۇل ءوز كەزەگىندە الماتىنى شىن مانىندە بولاشاقتىڭ «اقىلدى» قالاسىنا اينالدىرادى.