وبلىستىق توتەنشە جاعدايلار دەپارتامەنتىنىڭ جەكە قۇرامى مەن وقىس وقيعا ورنىنا جەتەتىن قۇرىلىم وكىلدەرى «قىس-2019» رەسپۋبليكالىق كوماندالىق-شتابتىق وقۋ-جاتتىعۋ جيىنىن كەزىندە ءوز دايىندىقتارىن كەزەكتى رەت پىسىقتادى. جالپى بۇعان دەيىن قۇتقارۋ قىزمەتىنىڭ كوماندالارى 2019 - 2020 جىلدارعا ارنالعان ءبىرقاتار ۇيىمداستىرۋ جانە ماشىقتانۋ ءىس-شارالارىن وتكىزگەن بولاتىن، دەپ جازادى Qamshy.kz اقپارات اگەنتتىگى. 

ارنايى-تاكتيكالىق وقۋ-جاتتىعۋعا وبلىس اكىمى اپپاراتىنىڭ جۇمىلدىرۋ دايىندىعى جانە اۋماقتىق قورعانىس ءبولىمىنىڭ باسشىسى مەيىربەك پرالييەۆ قاتىسىپ، توتەنشە جاعداي كەزىندە ورىن العان كەلەڭسىزدىكتەردى جويۋعا مۇددەلى ورگاندارداردىڭ دايىندىعىمەن تانىستى. سونىمەن قاتار وقىس وقيعانىڭ زاردابىن جويۋعا جۇمىلدىرىلاتىن قۇرىلىمداردىڭ تەحنيكالاردىڭ الەۋەتتىك دەڭگەيىن سارالاندى.

– كوماندالىق-شتاتتىق وقۋ جاتتىعۋعا جەرگىلىكتى اتقارۋشى ورگانداردىڭ، وبلىستىق تج دەپارتامەنتىنىڭ ءورت ءسوندىرۋ جانە اۆاريالىق قۇتقارۋ جۇمىستار قىزمەتى، وبلىس بويىنشا اپاتتار مەديسيناسى ورتالىعى مەملەكەتتىك مەكەمەسىنىڭ فيليالى، وبلىستىق پوليسيا دەپارتامەنتى، ۇلتتىق گۆارديانىڭ 5513 اسكەري ءبولىمى، «كازاۆتودور» جاۋاپكەرشىلىگى شەكتەۋلى سەرىكتەستىگى مەن «جامبىل ەلەكتر جەلىلەرى» جاۋاپكەرشىلىگى شەكتەۋلى سەرىكتەستىگىنىڭ، مەديسينا جانە كولىك قىزمەتىنىڭ وكىلدەرى قاتىسۋدا. ونىڭ ماقساتى – قىس مەزگىلىندەگى تىرشىلىكتى قامتاماسىز ەتۋ وبەكتىلەرىنىڭ دايىندىعىن باعالاۋ، ازاماتتىق قورعاۋ مەملەكەتتىك جۇيەسىنىڭ باسقارۋ ورگاندارى مەن كۇشتەرىن قىسقى كەزەڭدە تاپ كەلگەن توتەنشە جاعدايدى جويۋ جونىندەگى ءىس-قيمىلدارعا دايارلاۋ، – دەيدى وبلىستىق توتەنشە جاعدايلار دەپارتامەنتى باسشىسىنىڭ ورىنباسارى، پولكوۆنيك ماقسات قوسىبايەۆ.

وقۋ-جاتتىعۋ جيىنى الدىن الا دايىندالعان سەنارييگە ساي ءوتتى. وڭىردە اياق استىنان اۋا رايى بۇزىلدى. قاتتى قار جاۋىپ جانە جەلدىڭ جىلدامدىعى 30 م/س دەيىن كۇشەيدى سايكەسىنشە جۋالى اۋدانى اۋماعىنداعى رەسپۋبليكالىق ماڭىزى بار «باتىس ەۋروپا – باتىس جۇڭگو» اۆتوجولىنىڭ 515 شاقىرىمىنىڭ ماڭىندا (كۇيىك اسۋى) قارلى بوران پايدا بولدى. اق تۇتەكتەن تاياق تاستام جەردى كورۋ مۇڭ بولىپ، سالدارىنان قالاارالىق باعىتتاعى اۆتوبۋس پەن ءبىر جەڭىل اۆتوكولىك قاقتىعىسىپ، جەڭىل اۆتوكولىك جول جيەگىنە قۇلاپ كەتتى. ورىن العان جول كولىك وقيعاسى وزگە كولىكتەردىڭ دە كەپتەلىسكە ۇشىراۋىنا تۇرتكى بولدى. ولاردىڭ اراسىندا 85 جولاۋشىسى بار 2 قالاارالىق اۆتوبۋس، 16 جۇك بىرلىگى جانە 31 جەڭىل اۆتوكولىگى كەپتەلىستە قالدى. وسى كەزدە وبلىستىق تج دەپارتامەنتىنىڭ ءورت ءسوندىرۋ جانە اۆاريالىق قۇتقارۋ جۇمىستار قىزمەتى، وبلىس بويىنشا اپاتتار مەديسيناسى ورتالىعى مەملەكەتتىك مەكەمەسى فيليالىنىڭ، وبلىستىق پوليسيا دەپارتامەنتىنىڭ ماماندارى كەلىپ، جولاۋشىلاردى باسقا كولىككە وتىرعىزىپ، جاراقات العاندارعا مەديسينالىق كومەك كورسەتىپ، ورتكە ورانعان جەڭىل اتوكولىككە سۋ شاشىپ، ءتىلسىز جاۋدى لەزدە اۋىزدىقتادى.