قازاقستان "بەينەۋ – سەكسەۋىل" جانە "بوزوي – شالقار" تراسسالارىنا 800 ملرد تەڭگەدەن استام قارىز الادى، دەپ حابارلايدى "اق جايىق" پورتالى.
سەرىك ءجۇمانعاريننىڭ توراعالىعىمەن حالىقارالىق قارجى ۇيىمدارىمەن جيىن ءوتتى. وتىرىس بارىسىندا قاتىسۋشىلار ءىرى ينفراقۇرىلىمدىق جوبالاردى مەملەكەتتىك كەپىلدىكپەن ىسكە اسىرۋ ءۇشىن ەۋروپالىق قايتا قۇرۋ جانە دامۋ بانكى (ەقدب)، حالىقارالىق قايتا قۇرۋ جانە دامۋ بانكى (حقدب)، ازيا ينفراقۇرىلىمدىق ينۆەستيسيالار بانكى (ابيي) جانە يسلام دامۋ بانكىنەن (يدب) قارجى تارتۋ ماسەلەلەرىن تالقىلادى.
ترانسكاسپيي حالىقارالىق كولىك مارشرۋتىنىڭ قۇرامىنا كىرەتىن "بەينەۋ - سەكسەۋىل" اۆتوموبيل جولىنىڭ قۇرىلىسىنا ەرەكشە نازار اۋدارىلدى. مەملەكەت باسشىسىنىڭ تاپسىرماسى بويىنشا جاقىن ارادا "بەينەۋ – سەكسەۋىل" جانە "بوزوي – شالقار" ۋچاسكەلەرىن قوسا العاندا، جالپى ۇزىندىعى 765 كم جاڭا اۆتوجول قۇرىلىسىن باستاۋ كەرەك. كولىك مينيسترلىگى تەحنيكالىق-ەكونوميكالىق نەگىزدەمەنى اياقتاۋ جانە قۇرىلىس جۇمىستارىن باستاۋ الداعى كەزەڭگە جوسپارلانعانىن حابارلادى. ەۋروپالىق قايتا قۇرۋ جانە دامۋ بانكى مەن حالىقارالىق قايتا قۇرۋ جانە دامۋ بانكى 800 ملرد تەڭگەدەن استام قاراجات بولەتىنى تۋرالى مانداتتىق حاتتار جىبەرىپ، جوبانى قولداۋعا دايىن ەكەندىكتەرىن راستادى.
سونداي-اق قتج "ۇك "اق ترانسكازاقستاندىق تەمىرجول ءدالىزىن دامىتۋ بويىنشا" جوباسىن حالىقارالىق قايتا قۇرۋ جانە دامۋ بانكى جانە ازيا ينفراقۇرىلىمدىق ينۆەستيسيالار بانكىمەن بىرلەسىپ ىسكە اسىرۋ ماسەلەسى تالقىلاندى.
ارنايى ەكونوميكالىق جانە يندۋستريالىق ايماقتاردا ينجەنەرلىك-كوممۋنيكاسيالىق ينفراقۇرىلىم سالۋ ماسەلەسى بويىنشا يسلام دامۋ بانكىمەن ىنتىماقتاستىق جەكە قارالدى.
بۇل ينفراقۇرىلىمدىق جوبالاردى ىسكە اسىرۋ ەلدىڭ حالىقارالىق ترانزيتتىك ءدالىز رەتىندەگى الەۋەتىن ەداۋىر نىعايتۋعا مۇمكىندىك بەرەدى، سونداي-اق ەكونوميكالىق تارتىمدىلىقتى ارتتىرۋعا جانە ىسكەرلىك ورتانى دامىتۋعا ەلەۋلى ۇلەس قوسادى.
