الماتى وبلىسى جامبىل اۋدانىنداعى № 01098 اسكەري بولىمدە قازا بولعان 19 جاستاعى سارباز دىنمۇحامەد شىناربەكتى تۋىستارى ونىڭ وز-وزىنە قول جۇمساعانىنا سەنبەيدى. ساربازدى بۇگىن تۋىستارى جەر قوينىنا تاپسىردى دەپ حابارلايدى Ulysmedia.

مارقۇم دىنمۇحامەد شىناربەكتىڭ اپكەسى توعجان قوشانبايەۆا ءىنىسىنىڭ اسىلىپ ولگەنىنە سەنبەيدى. ول اسكەري بولىمدەنى ساربازدارمەن سويلەسكەن. سوزىنشە، ساربازداردىڭ بارلىعى دىنمۇحامەد وز-وزىنە قول جۇمسايتىن جاعدايدا بولعان جوق دەگەن.

«قاسىندا جۇرگەن قىرىق ساربازدىڭ بارلىعىمەن مەن كەشە سويلەستىم. ول ءومىرىن ءوزى قياتىن بالا ەمەس دەدى. بۇل جەردە ءبىر جاعداي بولدى. ءولتىردى. ودان كەيىن ونى ءىلدى. وفيسەرلىك قۇرامنىڭ دا ىشىنەن شىعىپ جاتىر، «جاپ-جاقسى بالا، اشىق-جارقىن. ەشقانداي قينالىس، ونداي كورسەتپەگەن بالا. كۇلىپ، بورىشىن جاقسى اتقارىپ جۇرگەن بالا» دەپ. ولارعا ايتتىم، نەگە وندا وسىنداي بولدى... ولاي بولسا سەندەر ولتىردىڭدەر. ونداي جاعداي بولسا، ءولتىرىپ، اسىپ قويدىڭدار. ول بالا ءوزى بارىپ، اسىلاتىن جاعداي ەمەس. كەشە ماعان كورسەتكەن، ايتقان جاعدايدا، ادام ءوزى بارىپ، قولىن بايلاپ، ءوزى ۇلكەن دىڭگەك اعاشقا اسىلۋى مۇمكىن ەمەس. ول بالا ونداي نارسەنى ىستەي المايدى. بۇنىڭ بارلىعى قولدان جاسالىپ وتىرعان نارسە»، – دەيدى ول.

ەسكە سالايىق، بۇگىن اسكەردە تاعى تراگەديا ورىن الدى. ءماتىبۇلاق اۋىلىندا ورنالاسقان №01098 اسكەري بولىمىندە 19 جاستاعى مەرزىمدى قىزمەتتەگى سارباز دىنمۇحاممەد شىناربەك ءولى تابىلدى. جاقىندارىنىڭ ايتۋىنشا، جاس جىگىتتىڭ ولىمىنە قاتىستى شىنايى جاعدايلار مۇقيات جاسىرىلىپ وتىر. اپكەسىنىڭ سوزىنشە، 2024 جىلدىڭ كۇزىندە اسكەرگە دانيال شىناربەك شاقىرىلسا، كوكتەمدە ونىڭ ەگىزى دىنمۇحاممەد اسكەر قاتارىنا الىنعان. ەكەۋى دە وتار گارنيزونىندا قىزمەت ەتكەن.

17 قىركۇيەكتە تۋىستارىنا دىنمۇحاممەدتىڭ وزىنە قول جۇمساعانى تۋرالى حابار كەلگەن.