باۋىرجان مومىش ۇلى اتىنداعى №131 مەكتەپ-ليسەيىنە بەكىتىلگەن جەر تەلىمىندە جاڭا ءۇش قاباتتى عيمارات بوي كوتەرەدى. مۇنداي شەشىمدى الماتى قالاسىنىڭ اكىمدىگى مەكتەپتىڭ شامادان تىس جۇكتەلۋىنە بايلانىستى اتا-انالار تاراپىنان تۇسكەن كوپتەگەن وتىنىشتەن كەيىن قابىلدادى.

مەكتەپ-ليسەي ورنالاسقان سامال شاعىناۋدانىندا حالىق سانى ءوسىپ كەلەدى، تۇرعىن ءۇي قۇرىلىسى دا قارقىندى ءجۇرىپ جاتىر. بۇل وقۋشىلار كوبەيەتى جونىندە بولجام جاساۋعا نەگىز بولىپ وتىر. وسىعان بايلانىستى مەكتەپ ينفراقۇرىلىمىن كەڭەيتۋ – وقۋشىلاردىڭ ءقاۋىپسىز ءارى جايلى جاعدايدا ءبىلىم الۋىنا باعىتتالعان ۋاقىتىلى جانە قاجەتتى ءىس-شارا.
 
جاڭا عيمارات 1-دەن 4-سىنىپتا وقيتىن شامامەن 300 بالاعا ارنالماق. 

كەشە الماتى قالالىق ءبىلىم باسقارماسى مەن مەدەۋ اۋدانى اكىمدىگى وكىلدەرىنىڭ اتا-انالار قاۋىمىمەن وتكەن كەزدەسۋىندە بارلىق ۇسىنىس-شاعىم تىڭدالدى. نەگىزگى ءوتىنىشتىڭ ءبىرى – قۇرىلىس جۇمىستارى كەزىندە بارلىق قاۋىپسىزدىك نورماسىنىڭ قاتاڭ ساقتالۋى.
 
قۇرىلىس جۇمىستارى ساباق ۋاقىتىنان تىس جۇرگىزىلەدى جانە سانيتارلىق تالاپتاعى شۋ دەڭگەيى نورمالارى ساقتالادى. بۇل وقۋ ۇدەرىسىنە كەدەرگى كەلتىرمەۋ جانە وقۋشىلارعا قولايسىزدىق تۋعىزباۋ ءۇشىن جاسالادى.
 
قۇرىلىس كەزەڭىندە وقۋشىلار مەن مەكتەپ قىزمەتكەرلەرىنىڭ قۇرىلىس ايماعىنا كىرۋى شەكتەلەدى، قۇرىلىس اۋماعى تولىق وقشاۋلانىپ، قورشالادى. ءىرى كولەمدى تەحنيكا تەك دەمالىس كۇندەرى كىرىپ-شىعا الادى، بۇل وقۋ كەزەڭىندە وقۋشىلار مەن جاقىن ماڭداعى تۇرعىندارعا تونەتىن قاۋىپ-قاتەردى بارىنشا ازايتادى.
 
مەكتەپ اۋماعىنا سنەگين، مەڭدىقۇلوۆ جانە دوستىق كوشەلەرى جاعىنان كىرۋگە بولادى. نىساندا ەسكەرتۋ جانە اقپاراتتىق بەلگىلەر، سونداي-اق ءقاۋىپسىز ءجۇرىپ ءوتۋ مەن ەۆاكۋاسيا سىزبالارى ورناتىلادى. قاۋىپسىزدىك پەن وتكىزۋ رەجيمىن ساقتاۋدى ليسەي اكىمشىلىگى مەن كۇزەت قىزمەتى بىرلەسىپ باقىلاپ وتىرادى.
 
الماتى قالاسىنىڭ ءبىلىم باسقارماسى مەن مەكتەپ اكىمشىلىگى بالالاردىڭ قاۋىپسىزدىگىن قامتاماسىز ەتۋ جانە وقۋ ۇدەرىسىن ۇيىمداستىرۋ ماسەلەسىن تۇراقتى باقىلاۋدا ۇستايدى. نىساندى پايدالانۋعا بەرۋ 2026 جىلى جەلتوقسان ايىنا جوسپارلانعان.

ايتا كەتەيىك، مەدەۋ اۋدانىنداعى وقۋشى ورىندارىنىڭ تاپشىلىعى ساقتالىپ وتىر. جالپى تاپشىلىق شامامەن 4400 ورىن. سولاردىڭ ىشىندەگى ەڭ كوپ جۇكتەلگەن ءبىلىم بەرۋ ۇيىمدارىنىڭ ءبىرى – №131 مەكتەپ-ليسەي. مەكتەپتىڭ جوبالىق قۋاتى 940 ورىنعا ەسەپتەلگەنىمەن، بۇگىندە مۇندا 2201 بالا ءبىلىم الىپ ءجۇر.