شىمكەنتتەگى قۇرىلىس الاڭىندا 3 تەحنيكانى توپىراق باسىپ قالىپ، 2 جۇمىسشى قازا تاپتى. قايعىلى وقيعا كەشە تۇندە ساعات 21.15-تە ءنۇرسات مولتەك اۋدانىندا ورىن العان، – دەپ Qamshy.kz اقپارات اگەنتتىگى حابارلايدى.

قالالىق تجد باسپا ءسوز قىزمەتىنىڭ مالىمدەۋىنشە، توعىز قاباتتى ۇيگە 25 مەترلىك تەرەڭدىكتە شۇڭقىر قازۋ كەزىندە قابىرعاسى قۇلاپ كەتكەن.

وقيعا سالدارىنان شۇڭقىردى قازىپ، تەگىستەپ جاتقان ءۇش تەحنيكا (1 جۇك تيەگىش، 1 كران جانە 1 جول تەگىستەيتىن كاتوك) جۇرگىزۋشىلەرىمەن بىرگە ءۇيىندىنىڭ استىندا قالعان. قۇتقارۋ جۇمىستارىنا تجد (40 قىزمەتكەر، 11 تەحنيكا)، جەرگىلىكتى اتقارۋشى ورگان (10 جۇمىسشى، 2 تەحنيكا)، پد (15 قىزمەتكەر، 2 تەحنيكا)، "يۋگسترويسەرۆيس-ن" ج ش س (35 جۇمىسشى، 2 تەحنيكا)، "103" قىزمەتى (4 قىزمەتكەر، 2 تەحنيكا) جۇمىلدىرىلدى.

قۇتقارۋشىلار ءبىر تەحنيكانى شىعارىپ، ونىڭ جۇرگىزۋشىسى امان قالدى.