الماتىدا ءۇش قاباتتى جەكەمەنشىك ۇيدە گاز جارىلىپ، 3 ادام اۋىر جاراقات الدى، – دەپ Qamshy.kz اقپارات اگەنتتىگى حابارلايدى.

"قازترانسگاز ايماق" اق باسپا ءسوز قىزمەتىنىڭ مالىمدەۋىنشە، پەرۆومايكا اۋىلىنداعى پوستىشيەۆ، 64 "ۆ" مەكەنجايىندا باراك تيپتەس 3 قاباتتى جەكەمەنشىك ۇيدە جارىلىس بولدى. وندا جالدامالى بولمەلەردە 12 وتباسى تۇرىپ جاتقان.

وقيعا ورنىنا جەتكەن اپاتتىق-ديسپەچەرلىك قىزمەتتىڭ حابارلاۋىنشا، جارىلىس ءبىرىنشى قاباتتاعى №3 پاتەردە ورىن العان. سونداي-اق قاتتى ءدۇمپۋ ۇيدەگى ەسىك-تەرەزەنى، ىشكى قابىرعالاردى قيراتقان.

"36 جاستاعى ەر ادامنىڭ دەنەسىن 100 پايىز كۇيىك (3-دارەجەلى) شالعان. ول جاساندى تىنىس الۋ اپپاراتىنا قوسىلعان. ناۋقاستىڭ جاعدايى وتە اۋىر. 19 جاستاعى قىزدىڭ دەنەسىنىڭ 85 پايىزىن كۇيىك (3-دارەجەلى) شالعان. جاعدايى وتە اۋىر. 23 جاستاعى جىگىتتىڭ بەتى، اياق-قولدارى كۇيگەن (1-دارەجەلى). دەنەسىنىڭ 22 پايىزى زاقىمدانعان. بۇل پاسيەنتتىڭ دە جاعدايى وتە اۋىر"، –  دەيدى باسقارمانىڭ باسپا ءسوز قىزمەتى.

مامانداردىڭ ايتۋىنشا، ۇيدەگى گاز قازاندىعى قيراماعان. 

ال قالالىق قوعامدىق دەنساۋلىق ساقتاۋ باسقارماسىنىڭ اقپاراتىنا سۇيەنسەك، جەدەل جاردەم بريگاداسى №4 اۋرۋحاناعا 3 پاسيەنتتى جەتكىزدى. ۇشەۋى دا ءقازىر جانساقتاۋ بولىمىندە جاتىر.