ەستەرىڭىزگە سالا كەتەيىك، 1 قاراشادان باستاپ قازاقستاندا مەكەنجاي انىقتاماسى مەملەكەتتىك كورسەتىلەتىن قىزمەتتەر تىزىلىمىنەن الىنىپ تاستالدى.
ەندى مەملەكەتتىك ورگاندار، مەكتەپتەر مەن مەديسينالىق مەكەمەلەر ازاماتتاردان مەكەنجاي انىقتاماسىن تالاپ ەتە المايدى. انىقتامانى ونى «ازاماتتارعا ارنالعان ۇكىمەتتىڭ» فيليالدارىنان دا، ەلەكتروندى ۇكىمەت پورتالىنان دا الۋ مۇمكىندىگى بولمايدى.
قاجەت بولعان جاعدايدا قازاقستاندىقتار تىركەۋگە تۇرعان مەكەنجايلارىن egov.kz ەلەكتروندى ۇكىمەت پورتالى مەن eGovmobile قوسىمشاسىنداعى جەكە كابينەتى ارقىلى تەكسەرە الادى. جوبالاۋشىلاردىڭ ايتۋىنشا، eGovmobile جاڭا باعدارلاماسى ارقىلى ەلەكتروندى-سيفرلى قولتاڭبانى (ەسق) پايدالانۋ ءتيىمدى. ەسق-نى ءتورت تاڭبالى PIN-كود بويىنشا ورناتۋعا بولادى. سونداي-اق eGovmobile باعدارلاماسى ۇيالى تەلەفون ارقىلى قولدانۋعا مۇمكىندىك بار.
اتالمىش باعدارلامانىڭ العاشقى بەتىندە قولدانۋشىعا ارنالعان نۇسقاۋلىقتار بار. سونىمەن قاتار وندا قاجەتتى قىزمەتتەر الۋعا بولادى. ول ءۇشىن «بارلىق قىزمەت» نەمەسە «قىزمەتتەر» بولىمىنە كىرۋ قاجەت. ال «بەيىن» بولىمىندە ءارتۇرلى مەملەكەتتىك قىزمەتتەردىڭ بازاسى ساقتالعان. وندا وتباسى تۋرالى، جەكە قۇجاتتار، الەۋمەتتىك ستاتۋس، زاڭدى تۇلعا جونىندە اقپارات، جىلجىمايتىن مۇلىك تۋرالى ت.ب.مالىمەتتەردى الۋعا رۇقسات ەتىلگەن.
ەستەرىڭىزگە سالا كەتەيىك، eGov سايتىنداعى جەكە كابينەت اۆتوماتتى تۇردە ءسىز تۋرالى مالىمەتتەرمەن تولىعىپ وتىرادى. بۇل ەلەكتروندى ۇكىمەت باعدارلاماسىن Play Market پەن AppStore ءموبيلدى قولدانباسىنان جۇكتەپ الۋعا بولادى.
مەملەكەتتىك ورگاندارعا كەلەتىن بولساق، ولار بۇل مالىمەتتى ىشكى ىستەر مينيسترلىگىنىڭ دەرەكتەر بازاسىمەن ينتەگراسيالانعان اقپاراتتىق جۇيەلەرى ارقىلى الاتىن بولادى.
سونىمەن بىرگە، ازاماتتاردىڭ مەكەنجاي تىركەۋى تۋرالى اقپاراتتى سۇراتۋى مۇمكىن باسقا ۇيىمدار، سونىڭ ىشىندە جەكە كومپانيالار egov.kz ەلەكتروندىق ۇكىمەت پورتالىنداعى ءۇشىنشى تۇلعالارعا انىقتاما بەرۋگە مۇمكىندىك بەرەتىن سەرۆيستى پايدالانا الادى. بۇل تەك ازامات ءبىر رەت اقپارات الۋعا رۇقسات بەرەتىن SMS-كەلىسىم بەرگەندە عانا جۇزەگە اساتىن وپەراسيا. مۇنداي SMS الۋ ءۇشىن ازامات «ءموبيلدى ازاماتتار» بازاسىندا تىركەلۋى ءتيىس.
تىركەۋدى ءار ازامات ءوزى جۇرگىزە الادى (egov.kz پورتالىنداعى «جەكە كابينەتكە» كىرىپ، «تەلەفون» باعانىندا ءوز تەلەفونىنىڭ ءنومىرىن كورسەتۋ نەمەسە وزگەرتۋ قاجەت جانە ونى ءوزىنىڭ ەسق-مەن راستاۋى كەرەك) نەمەسە حقكو-نىڭ كەز كەلگەن بولىمشەسىنە جۇگىنسە بولادى (قىزمەت تەگىن كورسەتىلەدى جانە 5 مينۋت ۋاقىتىڭىزدى الادى).
