ق ر پرەمەر-مينيسترىنىڭ ورىنباسارى بەردىبەك ساپاربايەۆتىڭ جامبىل وبلىسى تۇرعىندارىنىڭ تۇرمىستىق تابىسىن ارتتىرۋ جوباسىنىڭ جۇزەگە اسىرىلۋ بارىسىمەن تانىستى. ول بويىنشا پيلوتتىق جوباعا ەنگەن ون اۋىلدىق وكرۋگتىڭ ءبىرى – بايزاق اۋدانى قوستوبە اۋىلىنىڭ تۇرعىندارىمەن كەزدەستى.

كەزدەسۋ بارىسىندا ۆيسە-پرەمەرگە اۋقىمدى جوبا اياسىندا اۋىلدا اتقارىلىپ جاتقان جۇمىستار جايى باياندالدى. بۇگىندە اتالمىش جوبانىڭ ءبىرىنشى باعىتى – قوسالقى شارۋاشىلىقتى ءتيىمدى تابىس كوزىنە اينالدىرۋ بويىنشا  وكرۋگتەگى  862 اۋلا ايانباي جۇمىس جاساپ، ەكى اينالىمدا ءونىم الۋعا دايىن. ال،  ەكىنشى باعىت بويىنشا 224 اۋلا جوباعا قاتىسۋعا نيەت ءبىلدىرىپ، جالپى 7 697 باس ءتورت تۇلىك مال الۋ ءۇشىن قۇجاتتارىن وتكىزگەن. قوستوبە اۋىلدىق وكرۋگىندە «قوستوبە-2019» اۋىل شارۋاشىلىق وندىرىستىك كووپەراتيۆى بارلىق سالانى قامتۋ باعىتىمەن قۇرىلدى.

ءوز كەزەگىندە ۇكىمەت باسشىسىنىڭ ورىنباسارى جەكە قوسالقى شارۋاشىلىقتى دامىتۋ ارقىلى، ءتيىمدى تابىس كوزىن قالىپتاستىرۋعا باعىتتالعان باياندى باستامانىڭ ماڭىزدىلىعىنا توقتالىپ، ونىڭ مەملەكەت باسشىسى مەن ۇكىمەت تاراپىنان دا زور قولداۋعا يە بولىپ وتىرعاندىعىن جەتكىزىپ، قوستوبەلىكتەردى جۇمىلا جۇمىس جاساۋعا شاقىردى.

«بۇل جوبانى جۇزەگە اسىرۋدا اۋىلدىڭ ءار تۇرعىنىنىڭ قاتىسۋى ماڭىزدى. بارلىق ۇيىمداستىرۋ ماسەلەلەرى جان-جاقتى قاراستىرىلعان. اسىرەسە،  ءۇي ىرگەسىندەگى، اۋىل ماڭىنداعى جەرلەردى ءتيىمدى پايدالانۋ، تەحنيكا، مال ساتىپ الۋ، كووپەراتيۆ قۇرۋ شارالارى جوبا اياسىندا شەشىمىن تابۋدا. بۇل ورايدا ءاربىر وتباسىنىڭ الەۋمەتتىك كارتاسى بولۋى كەرەك. حالىقتىڭ يگىلىگىنە نەگىزدەلگەن بۇل جوبانى مەملەكەت باسشىسى، ۇكىمەت تاراپىنان قولداۋعا يە بولىپ وتىر. ەندى  تەك جۇمىس ىستەۋگە كەرەك، – دەدى بەردىبەك ساپاربايەۆ.

سونداي-اق، اۋىل تۇرعىندارى وزدەرىن تولعاندىرىپ جۇرگەن ساۋالدارىن قويىپ، ۇسىنىستار ايتتى.

«بارلىق جاڭالىقتى بىردەن قابىلداۋ وڭاي بولمايدى. ءبىراق ءبىز قورىقپاي، تاۋەكەل ەتسەك، بارلىق قيىندىقتاردى ەڭسەرۋگە بولادى. ويتكەنى مەملەكەت ءوز حالقىن ءاردايىم قولدايدى. قوستوبە اۋىلىنىڭ باسقا تۇرعىندارى سياقتى، مەن جامبىل وبلىسى حالقىنىڭ تابىسىن ارتتىرۋ جونىندەگى جوبانى تولىق قولدايمىن. ونىڭ ارقاسىندا اۋىلداردا قوسىمشا تابىس تابۋ مۇمكىندىگى پايدا بولادى. مەنىڭ وتباسىم دا وسى جوباعا قاتىسۋعا نيەتتى. قۇس شارۋاشىلىعىمەن اينالىسقىمىز كەلەدى، ەت جانە جۇمىرتقا ءۇي شارۋاشىلىعىمەن اينالىسقىمىز كەلەدى. مەنىڭ ويىمشا، ءوز تابىسىن 300 مىڭ تەڭگەگە دەيىن ارتتىرا الامىز»،- دەپ اتاپ ءوتتى ءوز سوزىندە قوستوبە اۋىلىنىڭ تۇرعىنى، ءبىلىم بەرۋ ارداگەرى ماريا تولەۋعالييەۆا.