قالا اكىمى باقىتجان ساعىنتايەۆ ق ر تۇڭعىش پرەزيدەنتى – ەلباسى قورىنىڭ اتقارۋشى ديرەكتورى اسەت يسەكەشيەۆپەن بىرگە «ەل ءۇمىتى» دارىندى جاستار فورۋمىنىڭ ەستافەتاسىن قابىلدادى.
«ەل ءۇمىتى» جوباسى ەل بويىنشا 1000 تالانتتى، دارىندى ءارى ىسكەر جاستاردى ىرىكتەۋگە كومەكتەسەدى. ولار ءوز تاجىريبەسىمەن بولىسە وتىرىپ، ءوزىنىڭ ۇلگىسىندە قۇرداستارىن تابىسقا ۇمتىلۋعا جىگەرلەندىرىپ، وزىنە سەنۋگە، تالانتىن پاش ەتۋگە كومەكتەسەدى. «سىزدەردىڭ ءارقايسىلارىڭىزدىڭ جەتىستىكتەرىڭىزدى سارالاي كەلە، ءبىز ەلىمىزدىڭ بارلىق جاستارىنا ۇنەمى وزدىگىنشە جۇمىس ىستەپ، جاڭا بەلەسكە قول جەتكىزىپ، كوممۋنيكابەلدى ءارى بەلسەندى بولۋعا شاقىرامىز. اركىمنىڭ تاعدىرى ءوز قولىندا. كوشباسشى بولۋعا، بولاشاققا باتىل ماقساتتار قويىپ، سوعان قول جەتكىزىڭىزدەر»، – دەدى قالا اكىمى باقىتجان ساعىنتايەۆ فورۋمعا قاتىسۋشىلارعا ارناعان سوزىندە.
الماتىدا 700 مىڭعا جۋىق جاس ادام تۇرادى، ياعني قالانىڭ ءاربىر ءۇشىنشى تۇرعىنى – جاستار. ونىڭ 230 مىڭنان استامى – ستۋدەنتتەر. ولار 39 جوعارى وقۋ ورنىندا جانە قالانىڭ 81 كوللەدجىندە ءبىلىم الادى.
«تالانت پەن ەنەرگيا، كرەاتيۆتى قابىلەتتەر قالامىزدىڭ باسەكەگە قابىلەتتى ەڭ كۇشتى ارتىقشىلىعى بولىپ تابىلادى. ءبىز مۇنى تۇسىنەمىز جانە باعالايمىز. الماتى جاستاردىڭ ماسەلەلەرىن شەشەدى، ياعني جۇمىسقا ورنالاستىرادى، كاسىبي داعدىلار بەرەدى، بيزنەس باستامالاردى قولدايدى. ءبىز قالانى جاس ۇرپاقتىڭ ءوزىنىڭ «الماتىلىق ارمانىن» ىسكە اسىرا الاتىنداي ەتىپ دامىتاتىن بولامىز»، – دەپ اتاپ ءوتتى قالا اكىمى.
«ەل ءۇمىتى» فورۋمىندا الماتى، جامبىل، تۇركىستان وبلىستارىنىڭ، سونداي-اق شىمكەنت پەن الماتىنىڭ بەلسەندى جاستارى ەلباسىنىڭ عىلىم مەن ءبىلىم، بيزنەس پەن مەديسينا، مادەنيەت جانە سپورت، ەكونوميكا جانە قوعامدىق ءومىر سالالارىنداعى قولداۋ باعدارلامالارىنىڭ ارقاسىندا قول جەتكىزگەن تابىستارى تۋرالى اڭگىمەلەدى.
