كيپر ەلىنە ۇشقالى تۇرعان جەرىنەن ساپارىنان قالىپ قويعان الەكساندر ميلكو اپەللياسيالىق سوتتا جەڭىپ شىقتى. تالدىقورعاندىق تۇرعىننىڭ ەشقانداي قارىزى بولماسا دا، اۋەجايداعى ماماندار ونى ۇشاققا وتكىزبەي قويعان. سەبەبى، مالىمەتتەر بازاسىندا وعان شەتەلگە شىعۋعا تىيىم سالىنعانى جونىندە اقپارات شىققان، – دەپ Qamshy.kz اقپارات اگەنتتىگى حابارلايدى.

سوت بارىسىندا الەكساندر ميلكونىڭ ەشقانداي دا بەرەشەگى جوق بولىپ شىقتى. ال ميلكوعا شەت ەلگە شىعۋعا شەكتەۋ 2012 جىلى قويىلىپ، 2014 جىلى الىنىپ تاستالعان. شەكتەۋ الىنعاننان كەيىن ول بىرنەشە رەت شەت ەلگە بارعان. ءبىراق 2018 جىلى اياق استى وعان 6 جىل بۇرىن قويىلعان شەكتەۋدىڭ نەلىكتەن قايتادان بازاعا شىعىپ كەتكەنى بەلگىسىز.

"الماتى وبلىستىق ادىلەت دەپارتامەنتىنەن الەكساندر ميلكونىڭ پايداسىنا 378 716 تەڭگە ماتەريالدىق شىعىن، 50 مىڭ تەڭگە مورالدىق وتەماقى جانە 9126 تەڭگە سوت شىعىندارى ءوندىرىلسىن"، – دەدى سوت القاسىنىڭ شەشىمىن وقىعان الماتى وبلىستىق اپەللياسيالىق سوت القاسىنىڭ سۋدياسى قارلىعاش جاپساربايەۆا.

الەكساندر ميلكو ءوزىنىڭ كىناسىزدىگىن ءبىر جىلدان اسا ۋاقىت بويى دالەلدەدى.

ول ۇلتتىق قاۋىپسىزدىك قىزمەتى، ادىلەت مينيسترلىگى مەن الماتى وبلىستىق ادىلەت دەپارتامەنتىن سوتقا بەرگەن بولاتىن.

"كونستيتۋسيالىق قۇقىعىمنىڭ بۇزىلعانىن دالەلدەۋ ءۇشىن ءبىر جىلدان اسا ۋاقىت كەتتى. قازاقستاندا ادىلدىك بار ەكەنىنە ايتەۋىر كوزىم جەتتى. ەڭ باستىسى، مەنىڭ بەرەشەگىم جوق، ال شەكتەۋدىڭ بازادا قايتا شىعىپ كەتكەنىنە مەن كىنالى ەمەسپىن. الماتى وبلىستىق اپەللياسيالىق سوت القاسىنا ءىستى جان-جاقتى، ادىلەتتى قاراعانى ءۇشىن العىس ايتامىن. سوت شەشىمىمەن تولىقتاي كەلىسەمىن"، – دەدى الەكساندر ميلكو.

ەسكە سالساق، جەكە سوت ورىنداۋشىلاردىڭ رەسپۋبليكالىق پالاتاسىنىڭ رەسمي مالىمدەۋىنشە، قازاقستاندا سالىق، اليمەنت، نەسيە سىندى ءتۇرلى بەرەشەگى بار 1 ملن 300 مىڭنان اسا ادامعا ەلدەن شىعۋعا تىيىم سالىنعان.