الماتى اكىمى باقىتجان ساعىنتايەۆ ماسكەۋ ۇكىمەتىنىڭ ءمينيسترى، سىرتقىەكونوميكالىق جانە حالىقارالىق بايلانىستار دەپارتامەنتىنىڭ باسشىسى سەرگەي چەرەميندى قابىلدادى، دەپ جازادى اكىمدىكتىڭ رەسمي سايتى.
س. چەرەمين الماتىعا ماسكەۋدىڭ مادەنيەت كۇندەرىنە رەسەيدىڭ استاناسىنان كەلگەن دەلەگاسيانى باسقارادى. كەزدەسۋ بارىسىندا مينيستر دامۋدىڭ قالالىق باعدارلامالارىن، قوعامدىق كەڭىستىكتى وزگەرتۋدىڭ، دەنساۋلىق ساقتاۋ مەن ءبىلىم سالاسىنداعى رەفورمالاردى جۇزەگە اسىرۋدىڭ تاجىريبەلەرى تۋرالى ايتتى. سونىمەن قاتار، قوناق تۇرعىن ءۇي قورىن، كولىك ينفراقۇرىلىمىن مودەرنيزاسيالاۋ جانە كوممۋنالدىق شارۋاشىلىقتى سيفرلاندىرۋ، مەگاپوليستىڭ تىنىس-تىرشىلىگىن قامتاماسىز ەتۋ جونىندەگى اقپاراتپەن ءبولىستى.
الماتى اكىمى باقىتجان ساعىنتايەۆ قالانى باسقارۋ جۇيەسىنە جاڭا تەحنولوگيالار مەن يننوۆاسيانى ەنگىزۋدە ماسكەۋدىڭ دامۋ تاجىريبەسىنىڭ ۇتىمدى ەكەنىن اتاپ ءوتتى.
«ءبىزدىڭ قالالاردا ىنتىماقتاستىقتى جانە دەنساۋلىق ساقتاۋدى، ءبىلىمدى، كولىك ينفراقۇرىلىمىن، تكش جانە سيفرلاندىرۋدى مودەرنيزاسيالاۋ ماسەلەلەرى بويىنشا تاجىريبە الماسۋدا جاقسى پەرسپەكتيۆالار بار»، - دەدى ب. ساعىنتايەۆ جانە ماسكەۋ سياقتى الماتىنىڭ دا ورتالىقتاندىرۋ بويىنشا داميتىنىن اتاپ ءوتتى.
الماتىدا «شەتسىز قالا» قاعيداسى بويىنشا تۇراتىن جەرىنە قاراماستان جايلى ءومىر ءسۇرۋ جانە الەۋمەتتىك قىزمەتتەردى الۋ ءۇشىن بارلىق جاعدايلار جاسالاتىن بولادى.
