ماسكەۋدىڭ الماتىداعى كۇندەرى اياسىندا ەكى قالانىڭ باۋىرلاستىق قاتىناستارىنىڭ 25 جىلدىعىنا وراي ينۆەستيسيا، ساۋدا-ەكونوميكالىق جانە ىسكەرلىك ىنتىماقتاستىق ماسەلەلەرى بويىنشا كونفەرەنسيا ءوتتى، دەپ جازادى اكىمدىكتىڭ باسپا ءسوز قىزمەتى.

الماتى قالاسى اكىمىنىڭ ورىنباسارى ە. باباقۇماروۆ كونفەرەنسياعا قاتىسۋشىلارعا ارناعان قۇتتىقتاۋ سوزىندە ەكى قالانىڭ دوستىق قارىم-قاتىناسىنىڭ ومىرشەڭدىگىن ەرەكشە اتادى.

«كەزىندە الماتىدا تاريحي جانە مادەني تۇتاستىق بىرىكتىرگەن ەكى ەل اراسىندا ستراتەگيالىق ماڭىزى بار بايلانىستار تۋىنداعان بولاتىن. ءبىز زاماناۋي ماسكەۋدىڭ دامۋ ءۇردىسىن ءجىتى قاداعالايمىز، جەتىستىگىنە قۋانامىز، وزىق تاجىريبەسىن ۇيرەنەمىز»، - دەدى ەرجان باباقۇماروۆ جانە الماتىداعى ماسكەۋ كۇندەرىنىڭ ەكى قالانىڭ پايداسى ءۇشىن تاجىريبە الماسۋعا، جاڭا يدەيالار مەن جوسپارلاردى بولىسۋگە مۇمكىندىك بەرەتىنىن اتاپ ءوتتى.

قالا اكىمىنىڭ ورىنباسارى الماتى قازاقستاننىڭ مادەني جانە ىسكەرلىك ورتالىعى ەكەنىن قاداپ تۇرىپ ايتتى. ەڭ باستىسى، دامىعان ينفراقۇرىلىم، قالامىزدىڭ زياتكەرلىك جانە مادەني باي مۇراسى مەن ونداعان جىلدار بويىنا جيناقتالعان ادامي كاپيتال كرەاتيۆتى ەكونوميكانىڭ دامۋىنا كەڭىنەن جول اشادى.

«ايتا كەتەرلىگى، ءبىزدىڭ قالالارىمىز اراسىنداعى ىنتىماقتاستىقتى ودان ءارى نىعايتۋدا جەرگىلىكتى اكىمشىلىك، ىسكەر جاندار مەن شىعارماشىل ۇجىمدار دەلەگاسيالارىنىڭ پىكىر الماسۋ ساپارلارىنىڭ، كەزدەسۋلەرىنىڭ، كەلىسسوز جۇرگىزۋلەرىنىڭ ماڭىزى زور»، - دەدى ە. باباقۇماروۆ.

ءوز كەزەگىندە الماتىداعى رەسەيدىڭ باس كونسۋلى ەۆگەنيي بوبروۆ رەسەي مەن قازاقستان اراسىنداعى ىنتىماقتاستىقتا ماسكەۋ مەن الماتىنىڭ باستى ءرول اتقاراتىنىن اتاپ ءوتتى.

«الماتى مەن رەسەي اراسىنداعى تاۋار اينالىمى 2018 جىلدىڭ قورىتىندىسى بويىنشا 4،7 ملرد. دوللارعا جەتتى. ال، ماسكەۋ مەن قازاقستان اراسىنداعى تاۋار اينالىمى 4 ملرد. دوللاردى قۇرايدى»، - دەدى باس كونسۋل جانە الماتىداعى ماسكەۋ كۇندەرىنىڭ ىسكەرلىك مازمۇنعا باي ەكەنىن ءارى ەكى جاقتى بايلانىستى ودان ءارى نىعايتا تۇسەتىنىن اتاپ ءوتتى.

الماتى اكىمدىگى مەن ماسكەۋ ۇكىمەتى اراسىندا 2020-2023 جىلدارعا ارنالعان ىنتىماقتاستىق تۋرالى مەموراندۋمعا قول قويىلدى. قۇجات ساۋدا-ەكونوميكالىق، گۋمانيتارلىق جانە مادەني ىنتىماقتاستىقتا ەكىجاقتى قارىم-قاتىناستى ايقىندايدى.

الماتى اكىمدىگى تاراپىنان مەموراندۋمعا قالا اكىمىنىڭ ورىنباسارى ەرجان باباقۇماروۆ، ال ماسكەۋ ۇكىمەتى جاعىنان ماسكەۋ ۇكىمەتىنىڭ ءمينيسترى، سىرتقىەكونوميكالىق جانە حالىقارالىق بايلانىستار دەپارتامەنتىنىڭ باسشىسى سەرگەي چەرەمين قولدارىن قويدى.