الماتىدا ق ر پرەمەر-مينيسترىنىڭ ورىنباسارى بەردىبەك ساپاربايەۆتىڭ قاتىسۋىمەن مۇگەدەكتەردى الەۋمەتتىك قورعاۋ سالاسىنداعى ۇيلەستىرۋ كەڭەسىنىڭ وتىرىسى ءوتتى، دەپ جازادى اكىمدىكتىڭ باسپا ءسوز قىزمەتى.

القالى شاراعا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، بالالار قۇقىقتارى جونىندەگى ۋاكىل ارۋجان ساين، ورتالىق جانە جەرگىلىكتى اتقارۋشى مەملەكەتتىك ورگاندار، ۇكىمەتتىك ەمەس سەكتوردىڭ وكىلدەرى، مۇگەدەكتەردىڭ قوعامدىق بىرلەستىكتەرىنىڭ مۇشەلەرى مەن وڭالتۋدىڭ تەحنيكالىق قۇرالدارىن وندىرۋشىلەر قاتىستى.

وتىرىسقا قاتىسۋشىلار شارا باستالار الدىندا الماتى اكىمدىگىنىڭ عيماراتىندا ۇيىمداستىرىلعان مۇگەدەكتەردى وڭالتۋدىڭ تەحنيكالىق قۇرالدارىنىڭ كورمەسىن ارالاپ كوردى.

«قازاقستاندا شامامەن 690 مىڭ مۇگەدەك تۇرادى، ولاردىڭ 90 مىڭعا جۋىعى بالالار. وسى جىلدىڭ مامىر ايىندا مۇگەدەكتەردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى 2025 جىلعا دەيىن ۇلتتىق جوسپار قابىلداندى. ۇلتتىق جوسپاردىڭ مىندەتتەرىنىڭ ءبىرى – جۇمىسپەن قامتاماسىز ەتۋ. بۇگىنگى تاڭدا مۇگەدەكتەردىڭ 67 پايىزى، ياعني 424 مىڭ ادام ەڭبەككە قابىلەتتى جاستا. الايدا، ونىڭ تەك 106،5 مىڭى نەمەسە 25 پايىزى عانا ەڭبەككە تارتىلعان. جۇمىس بەرۋشىلەر مۇگەدەكتەردى جۇمىسقا ورنالاستىرۋ كۆوتاسىن ورىنداماي وتىر»، - دەپ اتاپ ءوتتى ب. ساپاربايەۆ.

وسىعان بايلانىستى ول مۇمكىندىگى شەكتەۋلى ازاماتتاردىڭ ءومىرى مەن جۇمىسىنا قولايلى جاعداي تۋعىزۋ ءۇشىن مەملەكەت پەن بيزنەستىڭ كۇش-جىگەرىن بىرلەسىپ جۇمساۋعا شاقىردى.

ەڭبەك ءمينيسترى ب.نۇرىمبەتوۆ ەكونوميكالىق ىنتىماقتاستىق پەن دامۋ ۇيىمى (ەىدۇ) ەلدەرىندە مۇگەدەكتەردى جۇمىسقا ورنالاستىرۋ دەڭگەيى شامامەن 40 پايىزدى قۇرايتىنىن اتاپ ءوتتى. «ەڭبەك» مەملەكەتتىك باعدارلاماسى اياسىندا 47 مىڭ مۇمكىندىگى شەكتەۋلى ادامعا قولداۋ كورسەتىلدى، ونىڭ ىشىندە 40 مىڭ ادام جۇمىسقا ورنالاستىرىلدى، 900 ميكروكرەديت بەرىلدى.

«2020-2021 جىلدارى بۇل كورسەتكىشتى 30 پايىزعا جەتكىزۋ مىندەتى تۇر. ول ءۇشىن قوسىمشا 20 مىڭ ادامدى جۇمىسپەن قامتۋ قاجەت»، - دەپ اتاپ ءوتتى ب. نۇرىمبەتوۆ

بۇلاردان وزگە، مۇگەدەكتىكتىڭ الدىن-الۋ، ولاردى كاسىپكەرلىككە تارتۋ، وڭالتۋ ورتالىقتارىن قۇرۋ، ءبىلىم الۋعا، الەۋمەتتىك ماڭىزدى نىساندارعا قولجەتىمدىلىك، الەۋمەتتىك قىزمەتتەر پورتالىن قۇرۋ، وڭالتۋ قۇرالدارىمەن قامتاماسىز ەتۋ جانە باسقا دا ماسەلەلەر قارالدى.

ءدال وسى كۇنى پرەمەر-مينيستردىڭ ورىنباسارى ب. ساپاربايەۆ، اقپارات جانە قوعامدىق دامۋ ءمينيسترى داۋرەن ابايەۆ، ءبىلىم جانە عىلىم ءمينيسترى اسحات ايماعامبەتوۆ جانە الماتى اكىمىنىڭ ورىنباسارى ەرجان باباقۇماروۆ جاستاردىڭ «مەن جاستارعا سەنەمىن!» رەسپۋبليكالىق فورۋمىنا قاتىستى.