الماتى قالالىق جوسپارلاۋ جانە ۋربانيستيكا باسقارماسىنىڭ باسشىسى الماسحان احمەتجانوۆ تەلەورتالىق – اپپاراتتىق ستۋديا كەشەنىن (اسك-2 ) قايتا قالپىنا كەلتىرۋ جۇمىستارى تۋرالى ايتىپ بەردى.

«نەگىزى عيمارات كەلبەتى ايتارلىقتاي وزگەرگەن جوق. تەك اينەكتىڭ ءتۇسى ءسال قوڭىرلاۋ بولىپ شىقتى. ءقازىر اينەك جىلتىراپ تۇر، كۇنگە شاعىلىسقان كەزدە كوزگە اسەر ەتەدى. مەن بۇل عيماراتتى جاقسى بىلەمىن. ونىڭ قالاي سالىنعانىن، قالاي پايدالانۋعا بەرىلگەنىن، قالاي جۇمىس ىستەيتىنىن ءبارىن جاقسى بىلەمىن. ەگەر بۇل عيمارات قوعام ءۇشىن اشىق بولاتىن بولسا، شىنىمەن دە جاقسى بولار ەدى»، - دەيدى باسقارما باسشىسى الماسحان احمەتجانوۆ.

ونىڭ ايتۋىنشا، قايتا قالپىنا كەلتىرۋ جۇمىستارىنان كەيىن دە، ساۋلەت ەلەمەنتتەرى وزگەرگەن جوق جانە ارحيتەكتۋرالىق سىزبا بويىنشا عيماراتتىڭ قاسبەتى بۇرىنعىداي قالپىنا كەلتىرىلدى. ونىڭ بەينەسى، ءستيلى ءتىپتى ولشەمدەرىنىڭ ءپىشىنى دە باستاپقى تۇرىندە ساقتالعان. بۇل جوبا وسى عيماراتتىڭ اۆتورىمەن بىرگە جاسالدى.

«بۇگىنگى كۇنى اپپاراتتىق ستۋديا كەشەنى (اسك-2 ) جوباعا سايكەس، باستاپقى قالپىنا كەلتىرىلدى. ءبىز 100 پايىز ارحيتەكتۋرالىق قۇرىلىمدى ساقتادىق»، - دەپ تولىقتىردى ا. احمەتجانوۆ.

«تەلەورتالىق» تيميريازيەۆ جانە جەلتوقسان كوشەلەرىنىڭ قيىلىسىندا ورنالاسقان. بۇل - الماتى ءۇشىن بىرەگەي نىسان. تەليەۆيزيا ءۇشىن اپپاراتتىق ستۋديا كەشەنىن سالۋ تۋرالى شەشىم 1970 جىلى قابىلدانعان بولاتىن.