الماتى قالاسىنىڭ اكىمى باقىتجان ساعىنتايەۆتىڭ قالاداعى بىرنەشە موبيلدىك پۋنكتەردى ەسكەرتۋسىز ارالاعان ساتىندە پۋنكتتەردىڭ باسىم كوپشىلىگىندە كەزەكشى پوليسيا قىزمەتكەرىنىڭ وتىرماعانى انىقتالدى.

بۇل تۋرالى ب.ساعىنتايەۆ ءوزىنىڭ instagram-داعى پاراقشاسىندا جازدى.

«پوليسيانىڭ ءموبيلدى پوستىلارى جونىندەگى باستامانى جاقسى قابىلداعان قالالىقتار ءوز جازبالارىندا ۋچاسكەلىك ينسپەكتورلاردىڭ پوستىلاردان كورىنبەيتىنىنە شاعىمدانۋدا.

كەشە كەشكىسىن ەش ەسكەرتۋسىز «اتاكەنتتە»، «مەرەي» سو، كوكبازاردا، ارباتتا، مەڭدىقۇلوۆ – بەكتۇروۆ كوشەلەرىنىڭ بۇرىشىندا، گاندي پاركىندە ورنالاسقان ءموبيلدى پۋنكتتەردى تەكسەردىم. ولاردىڭ تەك بىرەۋىندە عانا ۋچاسكەلىك ينسپەكتور بولدى. ال قالعاندارىندا جارىق جانعانىمەن، كەزەكشى بولعان جوق، پوليسيا قىزمەتكەرىنىڭ ورنىنا سو-نىڭ كۇزەتشىلەرى وتىردى.

قوعامدىق قاۋىپسىزدىكتى قامتاماسىز ەتۋگە بۇلايشا نەمقۇرايدى قاراۋعا بولمايدى! سوندىقتان بۇگىن اپپاراتتىق جيىندا قالانىڭ ءپد-نىڭ باسشىسى س. كۇدەبايەۆقا ەسكەرتۋ جاسادىم. مەدەۋ، المالى، بوستاندىق، جەتىسۋ اۋداندارىنىڭ پوليسيا باسشىلارىنا سوگىس جاريالاۋدى تاپسىردىم. اۋدان اكىمدەرىنە دە باقىلاۋدىڭ جوقتىعى ءۇشىن ەسكەرتۋ ايتىلدى.

اتقارىلاتىن جۇمىستار جونىندە قالالىقتاردىڭ ەسكەرتۋلەرى نازارعا الىنادى. الماتىلىقتاردىڭ قاۋىپسىزدىگى – ءبىزدىڭ جۇمىسىمىزدىڭ باستى باعىتتارىنىڭ ءبىرى»، – دەلىنگەن اكىم جازباسىندا.