الماتى اكىمى باقىتجان ساعىنتايەۆ ىشكى ىستەر ءمينيسترى ەرلان تۇرعىمبايەۆتىڭ قاتىسۋىمەن قوعامدىق قاۋىپسىزدىكتى قامتاماسىز ەتۋ جانە جول-كولىك وقيعالارىنىڭ الدىن-الۋ ماسەلەلەرى بويىنشا كەڭەس وتكىزدى، دەپ جازادى اكىمدىكتىڭ باسپا ءسوز قىزمەتى.
نەگىزگى مىندەت – قىزمەت كورسەتۋدىڭ سەرۆيستىك ۇلگىسىنە باسىمدىق بەرە وتىرىپ، الماتى پوليسياسىنىڭ جۇمىسىن قايتا قۇرۋ. ۋچاسكەلىك ينسپەكتورلار، پاترۋلدەر قالا تۇرعىندارى مەن قوناقتارىنا ولاردىڭ ماسەلەلەرىن شەشۋگە كومەكتەسۋلەرى ءتيىس.
«قوعامنىڭ باستى تالابى – ساپالى جانە قولجەتىمدى مەديسينالىق قىزمەت، ءبىلىم مەن قوعامدىق قاۋىپسىزدىك. ءبىز وسىلاردى قامتاماسىز ەتۋگە ءتيىسپىز»، – دەدى كەڭەستى اشقان باقىتجان ساعىنتايەۆ.
ءىىم-نىڭ باسشىسى پوليسيانىڭ جەدەل باسقارۋ ورتالىعىن مودەرنيزاسيالاۋ جانە جبو-دا ۆيدەوباقىلاۋ جۇيەسىن ينتەگراسيالاۋ جوسپارلارى تۋرالى ايتتى. جول وقيعالارى ەرەكشە نازار اۋدارۋدى قاجەت ەتەدى. جىل باسىنان بەرى قاراي مەگاپوليستە 4 مىڭعا جۋىق جكو بولعان.
«ءبىز قازىرگى كەزدە حالىق سانى مەن اۆتوموبيل ترافيگىنىڭ كوپ بولۋىنا قاراماستان پارمەندى شارالاردى قولدانا وتىرىپ، جولدارداعى اپاتتار مەن ءولىم-جىتىمدى كۇرت ازايتقان شەتەلدىڭ تاجىريبەسىن بەلسەندى تۇردە ۇيرەنۋدەمىز»، – دەپ اتاپ ءوتتى ءىىم-نىڭ باسشىسى.
قالا اكىمدىگى قۇقىقتىق ءتارتىپتى قامتاماسىز ەتۋدە، ونىڭ ىشىندە زاماناۋي مەگاپوليستەردىڭ وزىق تاجىريبەسىن پايدالانا وتىرىپ، جول ينفراقۇرىلىمىن قايتا قۇرۋ جونىندە پوليسيانىڭ باستامالارىن قولدايتىن بولادى. بۇلار – «ۆافەلدى» بەلگىلەر، جولاقتار بويىنشا بۇرىلىستارداعى قوزعالىستاردىڭ نۇكتەلەرى، قوسىمشا باعدارشامدار جانە ماگيسترالدى كوشەلەردەگى بولگىش قورشاۋلار.
– ادام ءومىرىن اقشامەن ولشەۋگە بولمايدى. قالانىڭ كولىك ينفراقۇرىلىمى قوزعالىستىڭ بارىنشا قاۋىپسىزدىگىن قامتاماسىز ەتۋ ءۇشىن بارلىق جاعدايلاردى جاساۋى قاجەت، – دەپ اتاپ ءوتتى ب. ساعىنتايەۆ ءارى قالالىق موبيلدىلىك باسقارماسىنا بۇل ماسەلەنى پوليسيا دەپارتامەنتىمەن بىرگە شەشۋدى تاپسىردى.
پىكىر قالدىرۋ