تاراز مەملەكەتتىك پەداگوگيكالىق ۋنيۆەرسيتەتىنىڭ ءماجىلىس زالىندا «ورلەۋ» باۇو» اق فيليالى جامبىل وبلىسى بويىنشا پق باي ۇيىتقى بولۋىمەن «لاتىن الىپبيىنە كوشۋ كەزەڭدەرىنە سايكەس پەداگوگ بىلىكتىلىگىن ارتتىرۋدى جۇيەلەۋ» تاقىرىبىندا رەسپۋبليكالىق سەمينار-كەڭەس وتكىزىلدى.

لاتىن گرافيكاسىنا كوشۋ كەزەڭدەرىنە سايكەس، پەداگوگ قىزمەتكەرلەردىڭ بىلىكتىلىگىن ارتتىرۋدا ءالىپبيدىڭ ادىستەمەلىك ماسەلەلەرى مەن ەملە ەرەجەلەرىن مەڭگەرتۋدىڭ ءتيىمدى جولدارىن تالقىلاۋعا ارنالعان باسقوسۋدى «ورلەۋ» باۇو» اق فيليالى جامبىل وبلىسى بويىنشا پق باي ديرەكتورىنىڭ وقۋ ءىسى جونىندەگى ورىنباسارى جۇلدىز وسكەنبايەۆا كىرىسپە سوزبەن اشتى. ول ءوز سوزىندە سەمينار-كەڭەستىڭ مازمۇنىنا جان-جاقتى توقتالىپ، وسى باعىتتاعى اتقارىلىپ جاتقان جۇمىستاردىڭ جەمىستى ەكەنىن تىلىنە تيەك ەتتى. بۇدان سوڭ وبلىس اكىمدىگى ىشكى ساياسات باسقارماسى باسشىسىنىڭ ورىنباسارى بەرىك بەگالييەۆ ءسوز الدى.

-جيىرماسىنشى عاسىردىڭ قىرقىنشى جىلدارىندا كيريلليسا ەنگىزىلگەنى بارشاعا ءمالىم. ونىڭ يدەولوگيالىق نەگىزدەرىن مەن دە ءبىر كىسىدەي زەردەلەدىم. ول كەزدەگى يدەولوگيانىڭ باعىتى بارشاعا ءمالىم عوي. تاۋەلسىزدىكتىڭ العاشقى جىلدارىندا «الدىمەن ەكونوميكا، ودان كەيىن ساياسات» دەگەن ۇستانىم بولدى. لاتىن گرافيكاسىنا كوشۋدىڭ نەگىزىندە يدەولوگيالىق مازمۇن بار.

وبلىستاعى بۇقارالىق اقپارال قۇرالدارى دا بۇگىنگى كۇنى لاتىن گرافيكاسىنا باسا نازار اۋدارىپ وتىر. بۇل رەتتە جۇرتشىلىقتىڭ كوز داعدىسىن قالىپتاستىرۋ باستا ماقسات ەكەنى ايان. قازىرگى تاڭدا اۋداندىق 10، تاراز قالالىق 1، وبلىستىق 3 باسىلىم بار. گازەتتەردىڭ دەنى اتاۋلارىن لاتىن قارپىنە اۋىستىردى. بۇل دا ءبىرشاما جۇمىس. ويتكەنى گازەت اتاۋى ءجاي وزگەرىسكە ۇشىرامايدى، كۋالىگىن دە الۋ كەرەك. ودان بولەك باسىلىم وقىرماندارىنىڭ كوزىن ۇيرەتۋ، وقۋ داعدىسىن جۇيەلەۋ ماقساتىندا بارلىق باسىلىمداردا ءبىر ماقالا لاتىن جازۋىمەن بەرىلىپ كەلەدى. اتالعان جۇمىستار كەزەڭ-كەزەڭىمەن جالعاسىن تابا بەرەدى. سونىمەن قاتار تەلەارنالاردىڭ دا اتاۋلارى، باعدارلامالارىنىڭ اتتارى لاتىن قارپىندە جازىلعان،-دەگەن بەرىك بەگالييەۆ وزگە دە ماسەلەلەر تۋرالى كەڭىنەن تولعادى.

رەسپۋبليكالىق دەڭگەيدە وتكەن سەمينار-كەڭەستە ماماندار دا ءوز پىكىرلەرىن ورتاعا سالىپ جاتتى. «ورلەۋ» باۇو» اق فيليالى شىمكەنت قالاسى بويىنشا پق باي ديرەكتورىنىڭ عىلىمي ىستەر بويىنشا ورىنباسارى مۇحتار اقتايەۆ، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى ادىستەمە باسقارماسىنىڭباسشىسى، فيلولوگيا عىلىمدارىنىڭ كانديداتى سوفيا وماروۆا، فيلولوگيا عىلىمدارىنىڭ كانديداتى اينۇر دوڭبايەۆا جاڭا قازاق الىپبيىنە قاتىستى ءتۇرلى ويلارى مەن ۇسىنىستارىن كەڭىنەن ايتتى.