يننوۆاسيالىق جوبالاردىڭ يگىلىگىن كورۋدەن مەركىلىكتەر دە شەت قالمايدى. اتاپ ايتقاندا قازاقستان رەسپۋبليكاسىنىڭ يندۋستريالدى-يننوۆاسيالىق دامۋىنىڭ 2015-2019 جىلدارعا ارنالعان مەملەكەتتىك باعدارلاماسى اياسىندا اۋداندا ەكى بىردەي يننوۆاسيالىق جوبا جۇزەگە اسىرىلا باستادى، دەپ جازادى Qamshy.kz اقپارات اگەنتتىگى. 

جالپى قۇنى 1 ميلليارد 712 ميلليون 200 مىڭ تەڭگەنى قۇرايتىن 2 ينۆەستيسيالىق جوبا اياسىندا 38 جاڭا جۇمىس ورنى اشىلماق. بۇل قوس جوبادا كۇللى وبلىس تۇرعىندارىنىڭ قانتقا دەگەن سۇرانىسىن وتەپ كەلە جاتقان «ورتالىق ازيا قانت كومپانياسى» جاۋاپكەرشىلىگى شەكتەۋلى سەرىكتەستىگىنىڭ مەركى فيليالىندا جۇزەگە اسىرىلدى. ونىڭ العاشقىسى بولىپ، ءوندىرىس وشاعىندا 2016 جىلى شىرىندى تازالايتىن سەحتى قايتا جانعىرتۋ جۇمىستارى جۇرگىزىلدى. جوبالىق قۋاتتىلىعى 698 ميلليون تەڭگەگە باعالانعان بۇل جوبانى ىسكە اسىرۋ ناتيجەسىندە كاسىپورىن جىلىنا قوسىمشا 101 مىڭ توننا قانت شىعارۋعا قاۋقارلى بولدى. ال وسى جوبادان سوڭ قانت زاۋىتىندا 18 جاڭا جۇمىس ورنى اشىلدى.

كەلەسى كەزەكتە قازاقستان رەسپۋبليكاسىنىڭ يندۋستريالدى-يننوۆاسيالىق دامۋىنىڭ 2015-2019 جىلدارعا ارنالعان مەملەكەتتىك باعدارلاماسى اياسىندا «ورتالىق ازيا قانت كومپانياسى» جاۋاپكەرشىلىگى شەكتەۋلى سەرىكتەستىگىنىڭ قانت زاۋىتىن قايتا جاڭارتۋ جوباسى قولعا الىندى. جوبالىق قۇنى 1 ميلليارد 14ميلليون 200 مىڭ تەڭگەنى قۇراعان قايتا جاڭارتۋ جۇمىستارى ناتيجەسىندە ءوندىرىس وشاعىنىڭ جىلدىق قۋاتتىلىعى 140 مىڭ تونناعا دەيىن ۇلعايدى.

سوڭعى جىلدارى توعىز جولدىڭ تورابىندا ورنالاسقان مەركى اۋدانىندا كاسىپكەرلىك ەرەكشە قارقىنمەن دامىدى. سونىڭ ارقاسىندا شاعىن جانە ورتا سۋبەكتىلەرىنىڭ سانى 4901-كە جەتتى. مۇنداعى 1646 نىسان اۋىل شارۋاشىلىعى ءونىمىن ءوندىرۋشى بولسا، 3021ء-ىن جەكە كاسىپكەرلەر قۇرايدى. سونداي-اق وڭىردە 234 شاعىن جانە ورتا كاسىپكەرلىكتەگى زاڭدى تۇلعا تىركەلگەن.

مۇنان بولەك قازاقستان رەسپۋبليكاسىنىڭ تۇڭعىش پرەزيدەنتى–ەلباسى نۇرسۇلتان نازاربايەۆ ايرىقشا ءمان بەرىپ، قولدانىس اياسىن 5 جىلعا دەيىن ۇزارتقان «بيزنەستىڭ جول كارتاسى 2020» مەملەكەتتىك باعدارلاماسى اسىندا جالپى سوماسى 192،7 ميلليون تەڭگە بولاتىن 5 جوبا ماقۇلداندى. باعدارلامانىڭ تاعى ءبىر باسىم باعىتى سانالاتىن كاسىپكەرلىك ءۇشىن الىنعان نەسيەنىڭ مولشەرلەمەسى سۋبسيديالاۋ بويىنشا كاسىپكەرلىك جانە يندۋستريالدى-يننوۆاسيالىق دامىتۋ باسقارما تاراپىنان جالپى سوماسى 49 ميلليون تەڭگەنى قۇرايتىن جوبالاردى ىسكە اسىرۋ جوسپارلانىپ وتىر.