قازاقستان رەسپۋبليكاسىنىڭ تۇڭعىش پرەزيدەنتىنىڭ «100 ناقتى قادام» ۇلت جوسپارىنداعى تاپسىرماسىن ورىنداۋ ماقساتىندا وتكەن جىلدىڭ قاڭتار ايىنان باستاپ وبلىستاعى 114 اۋىلدىق وكرۋگتە ءتورتىنشى دەڭگەيلى بيۋدجەت ەنگىزىلدى، دەپ جازادى Qamshy.kz اقپارات اگەنتتىگى. 

ءتورتىنشى نەمەسە دەربەس بيۋدجەت دەپ اتالاتىن بيۋدجەتتىڭ بۇل ءتۇرى حالقىنىڭ سانى 2 مىڭنان اساتىن اۋىلدىق وكرۋگتەرگە ەنگىزىلەدى. ماسەلەن وتكەن جىلى دەربەس بيۋدجەتى قالىپتاسقان 114 اۋىلدىق وكرۋگتىڭ كىرىس جوسپارى 12 ميلليارد 400 ميلليون تەڭگە سوماسىندا بەكىتىلدى. جىل سوڭىنا بۇل جوسپار اسىرا ورىندالىپ، بۇل اۋىلدىق وكرۋگتەردىڭ جالپى بيۋدجەتى 12 ميلليارد 700 ميلليون تەڭگە بولدى. سايكەسىنشە اۋىلدىق وكرۋگ اكىمدەرىنىڭ باسقارۋىنا بەرىلگەن بۇل قارجىنىڭ ەسەبىنەن ەلدى مەكەندەردىڭ اجارىن اشىپ، الەۋمەتتىك جاعدايىن جاقسارتۋ ماقساتىندا 786 ءىس شارا وتكىزىلدى. بۇل ماقساتقا 1 ميلليارد 700 ميلليون تەڭگە قارجى دا قاراستىرىلدى.

–ال بيىل دەربەس بيۋدجەت ەنگىزىلگەن 114 وكرۋگتىڭ كىرىس جوسپارى 12 ميلليارد 700 ميلليون تەڭگە كولەمىندە بەكىتىلدى. سايكەسىنشە ەسەپتى كەزەڭدە جوسپار 2،9 پايىزعا ارتىق ورىندالىپ وتىر. ونىڭ ىشىندە وزىندىك كىرىستەر 131،4 پايىزعا ورىندالدى. كەلەر جىلدىڭ 1 قاڭتارىنان باستاپ وبلىستىڭ قالعان 42 اۋىلدىق وكرۋگتەرىندە بيۋدجەتتىڭ 4 دەڭگەيى ەنگىزىلەتىن بولادى. سول ارقىلى دەربەس بيۋدجەت وبلىس اۋماعىنداعى بارلىق اۋىلدىق وكرۋگتە قالىپتاسپاق. دەربەس بيۋدجەتتى قالىپتاستىرۋ، ونى قولدانىسقا بەرۋ باعىتىندا بارلىق اۋدانداردا ءىس-شارالار جوسپارى ازىرلەنىپ، اۋدان اكىمدەرىمەن بەكىتىلگەن. اتالعان ءىس-شارالار جوسپارىنا ساي اۋىلدىق وكرۋگ اكىمدەرىنىڭ عيماراتىن ءتيىستى كەڭسە تەحنيكالارىمەن قامتاماسىز ەتۋ جوسپارلانىپ وتىر. سونداي-اق ءتورتىنشى بيۋدجەتتى قالىپتاستىرۋشى، وعان باقىلاۋ جاساۋشى مەكەمەلەر «ە-حالىق» ، «1س-مەكەمە» كومپيۋتەرلىك باعدارلاماسىمەن قامتاماسىز ەتىلگەن. اۋىلدىق وكرۋگتەردەگى اكىمدىك عيماراتتارىندا 512 كبيت/س تومەن ەمەس ينتەرنەت بايلانىس جانە «قازىناشىلىق-كليەنت» اقپاراتتىق جۇيەلەرى ورناتىلۋدا. ال ەسەپشى مامانداردىڭ جاڭا اقپاراتتىق جۇيەسىندە جۇمىس ىستەۋىنە دايىنىق جۇمىستارى جۇرگىزىلىپ جاتىر، –دەيدى وبلىس اكىمدىگىنىڭ ەكونوميكا جانە بيۋدجەتتى جوسپارلاۋ باسقارماسىنىڭ باسشىسى گۇلدانا جاۋىنبەكوۆا.

«100 ناقتى قادام» ۇلت جوسپارىنا ساي دەربەس بيۋدجەتى بار وكرۋگ اكىمدەرى ءبىرقاتار سالىقتىق تۇسىمدەردەن جينالعان قارجىنى اۋىلداعى وزەكتى ماسەلەلەردى شەشۋ جۇمساي الاتىن بولادى.