ت. رىسقۇلوۆ اۋدانىنىڭ مەملەكەتتىك قىزمەتشىلەرى جامبىل وبلىسى اكىمىنىڭ ادەپ جونىندەگى ۋاكىلى ءمادي ماتەن جانە قازاقستان رەسپۋبليكاسى مەملەكەتتىك قىزمەت ىستەرى جونىندەگى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسقارما باسشىسى، ادەپ جونىندەگى ۋاكىلى ازامات انۋاربەكوۆپەن كەزدەستى. شارا بارىسىندا اۋداندىق مەملەكەتتىك قىزمەتكەرلەرمەن كەزدەسىپ، ولارعا قاتىستى اقپاراتتارمەن ءبولىستى.
جيىن بارىسىندا مىنبەرگە ءبىرىنشى بولىپ كوتەرىلگەن اۋدان اكىمىنىڭ ورىنباسارى، ادەپ جونىندەگى ۋاكىل رۋسلان ورازحان اۋداندا اتقارىلىپ جاتقان جۇمىستار تۋرالى بايانداپ، قىسقاشا حابارلاما جاسادى. ودان سوڭ ق ر مەملەكەتتىك قىزمەت ىستەرى جونىندەگى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسقارما باسشىسى ازامات انۋاربەكوۆ مەملەكەتتىك قىزمەتكەرلەرگە قاتىستى كودەكستىڭ ماقسات-مىندەتتەرىن، ولارعا قويىلاتىن تالاپتاردى، مىنەز-قۇلىقتىڭ جالپى ستاندارتتارىن، قارىم-قاتىناس نورمالارىن، ىسكەرلىك كيىمنىڭ ۇلگىسىن، قىزمەتتەن تىس ءوزىن-وزى ۇستاۋ تارتىپتەرىن كەڭىنەن اڭگىمەلەپ بەردى.اتالمىش نورمالار جايىندا وبلىس اكىمىنىڭ ادەپ جونىندەگى ۋاكىلى ءمادي ماتەن دە وي ءبولىسىپ، مەملەكەتتىك قىزمەتشىلەردىڭ ادەپ كودەكسى تالاپتارىن قاتاڭ تۇردە ساقتاۋ كەرەكتىگىن ايتتى. «مەملەكەتتىك قىزمەتكەرگە قويىلعان تالاپتار وتە قيىن. ولاردى ورىنداۋ جانە قاتاڭ تۇردە ساقتاۋ ءبىزدىڭ تىكەلەي مىندەتىمىز. جاسىراتىن نەسى بار، سول ءبىر كەي تالاپتار وكىنىشكە وراي ءوز دەڭگەيىندە ورىندالماي جاتادى. ولاردىڭ كوبىسى قىزمەتتەن تىس ۋاقىتتا ورىن الۋدا» دەپ بىرنەشە قويىلاتىن تالاپتارعا توقتالىپ ءوتتى. اتاپ ايتار بولساق، جۇمىس بارىسىنان تىس ۋاقىتتا مەملەكەتتىك كولىكتى پايدالانۋ نەمەسە ونى ماس كۇيىندە باسقارۋ، الەۋمەتتىك جەلىنى ءجيى قولدانۋشىلارعا سىپايى، ناقتى دالەلدەرمەن جاۋاپ قايتارۋ، توي-تومالاقتا ءوزىن-وزىن دۇرىس ۇستاۋ، الەۋمەتتىك جەلىنى ساپالى ءارى دۇرىس قولدانۋ كەرەكتىگىن ايتتى. ءمادي مەيىربەك ۇلى ءتىپتى تەلەفونمەن سويلەسۋ بارىسىندا دا بايىپتى جاۋاپ قايتارا ءبىلۋدىڭ ءوزى اسا ماڭىزدى ەكەنىن ءتۇسىندىرىپ، جيىندى قورىتىندىلادى. كەزدەسۋ سوڭىندا مەملەكەتتىك قىزمەتشىلەردەن ساۋالناما الىندى.
ءىس-ساپار بارىسىندا ادەپ جونىندەگى ۋاكىلدەر اۋدان اكىمدىگىنىڭ ۇلكەن ءماجىلىس زالىندا جەكە قابىلداۋ وتكىزدى. قابىلداۋ كەزىندە مەملەكەتتىك قىزمەتكەرلەر تاراپىنان قويىلعان ساۋالدارعا ناقتى جاۋاپ قايتارىلىپ، ءار ءتۇرلى كەڭەستەر بەرىلدى.
