اۋىل شارۋاشىلى – حالىقتىڭ نەگىزگى تابىس كوزى، اۋليەاتا ءوڭىرىنىڭ اسىراۋشى سالاسى. ونى دامىتۋ ارقىلى ايماق ەكونوميكاسىن كوتەرىپ، تۇرعىندار تۇرمىسىنىڭ تىكتەلۋىنە جول اشا الامىز. مۇنى شۋلىقتار جەتە تۇسىنەدى. سوندىقتان، اتالمىش سالاداعى جۇمىس قارقىنىن جىل ساناپ ارتتىرىپ كەلەدى.

بۇعان دالەل – شۋ اۋدانىندا 2019 جىلدىڭ 9 ايىنىڭ قورىتىندىسى بويىنشا اۋداندا مال باسىنىڭ سانى ءىرى قارا مالى – 33977 باس، قوي-ەشكى – 384814 باس،  جىلقى – 12947 باس، تۇيە – 68 باس، شوشقا – 1464 باس جانە ءۇي قۇستارى – 104785 باسقا جەتكەن.

– مال شارۋاشىلىعى بويىنشا 30727،1 توننا ءسۇت ساۋىلىپ، وتكەن جىلمەن سالىستىرعاندا 100،3 پايىزعا ورىندالدى. وندىرىلگەن ەت 6347 تونناعا جەتىپ، 103،3 پايىزعا نەمەسە 204،2 تونناعا كوبەيدى. ال، الىنعان جۇمىرتقا سانى 8118،5 مىڭ داناعا جەتىپ، 100،9 پايىزعا ورىندالدى.

اۋداندا 7 مال بورداقىلاۋ الاڭى جانە قوي شارۋاشىلىعى باعىتىندا – 7، جىلقى شارۋاشىلىعى باعىتىندا – 1 اسىل تۇقىمدى اۋىل شارۋاشىلىعى تاۋار وندىرۋشىلەرى  جۇمىس جۇرگىزۋدە.

شۋ اۋدانى بويىنشا  سۋ ۇنەمدەۋ تەحنولوگيالارىن قولدانۋ كورسەتكىشى 3405،5 گا، ونىڭ ىشىندە تامشىلاتىپ سۋارۋ جۇيەسى 3365،5 گەكتاردى، جاڭبىرلاتىپ سۋارۋ جۇيەسى 40 گەكتاردى قۇراپ وتىر، – دەيدى اۋدان اكىمى جارىلقاسىن ايتاقوۆ.

جالپى، سۋارمالى جەر كولەمىن ارتتىرۋ ماقساتىندا اۋداندا 3 سۋ قويماسى – تاسوتكەل، اقسۋ، سارعاۋ جانە 5 سۋ بوگەتى – تاسوتكەل، بۇلانباي، كوكوزەك، التاي، قايىڭدى حالىققا تابىستى قىزمەت ەتۋدە. «قازسۋشار» رمك جامبىل فيليالى «تاسوتكەل سۋ قويماسى» وندىرىستىك بولىمشەسىنىڭ تەڭگەرىمىندە 3 ماگيسترالدى كانال جانە وسى ماگيسترالدى كانالداردان باستاۋ الاتىن 93 شارۋا ارالىق كانالدار ورنالاسقان.

– بۇگىنگى كۇنگە شۋ اۋدانى بويىنشا 4 فەرمەرلىك جىلىجاي جۇمىس ىستەۋدە. بۇل اۋدان تۇرعىندارىنا جىل ون ەكى اي كوكونىس جەتكىزۋ جولىندا جاسالىپ جاتقان جۇمىستىڭ ناتيجەسى. بۇدان بولەك، اۋىل شارۋاشىلىعى وندىرىستىك كووپەراتيۆتەرىن كوبەيتۋ جۇمىستارى جالعاسۋدا. اتاپ ايتقاندا، 2018 جىلدىڭ قورىتىندىسىمەن 8 كووپەراتيۆ تىركەلگەن. ونىڭ 6-ى ناتيجەلى جۇمىس اتقارۋدا، 2ء-ۋى نەسيە الا الماۋىنا بايلانىستى جۇمىستارى ۋاقىتشا توقتاپ تۇر.

2019 جىلى شۋ اۋدانى بويىنشا 15 كووپەراتيۆ قۇرۋ جوسپارلانعان. ونىڭ ەكەۋى ءسۇت باعىتىندا، ون ەكىسى ەت باعىتىندا، بىرەۋى ەگىن شارۋاشىلىعى باعىتىندا. اتالعان كووپەراتيۆتەردىڭ ءسۇت باعىتى بويىنشا اقسۋ، تولە بي جانە ءوندىرىس اۋىلدىق وكرۋگتەرىندە 3 كووپەراتيۆ، ەت باعىتى بويىنشا ەسكى شۋ جانە كوكقاينار، بىرلىكۇستەم، تاسوتكەل، قوراعاتى اۋىلدىق وكرۋگتەرىندە 5 كووپەراتيۆ، ەگىن شارۋاشىلىعى باعىتى بويىنشا بىرلىكتە 1 كووپەراتيۆ قۇرىلدى، – دەيدى اۋدان اكىمى.