قورداي اۋدانىنىڭ اكىمدىگىندە اۋدان كاسىپكەرلەرىنىڭ الماتى قالاسىنان كەلگەن «Urbo Style» كومپانياسىنىڭ وكىلدەرىمەن كەزدەسۋى ءوتتى. قالا قۇرىلىسى، ساۋلەت جانە لاندشافتتىق جوبالاۋ سالاسىندا جوبالاۋ جۇمىستارىمەن اينالىساتىن كومپانيا اۋدان دامۋىنىڭ كەشەندىك جوبالاۋىن قولعا العان. كەزدەسۋگە جامبىل وبلىسى اكىمدىگىنىڭ كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى ج.سارييەۆ، اۋدان اكىمىنىڭ ورىنباسارى م.كۇزەربايەۆ، قورداي اۋدانى اكىمدىگىنىڭ كاسىپكەرلىك، ءوندىرىس جانە تۋريزم ءبولىمىنىڭ باسشىسى ق.مامەتوۆ قاتىستى.

جيىندا ءبىرىنشى بولىپ ءسوز العان ج.سارييەۆ ءىس-شارانىڭ ماقساتىن ءتۇسىندىرىپ، كاسىپكەرلەر اۋداننىڭ بولاشاق دامۋى تۋرالى ويلارىن ورتاعا سالىپ، كومپانيا وكىلدەرى ونى وبلىس باسشىلىعىنا جەتكىزىپ، اۋداننىڭ جانە جالپى وبلىس دامۋىنىڭ ءتيىمدى جولدارىن تاڭداۋ قاجەتتىلىگىن العا تارتتى. سونىمەن بىرگە، كاسىپكەرلەرگە ءوز ويلارىن اشىق ايتىپ، ولاردىڭ پىكىرلەرى ەسكەرىلەتىنى ايتىلدى. «ءىس-شارا جامبىل وبلىسىنىڭ اۋماعىندا قالا قۇرىلىسىن دامىتۋ جانە وبلىس اۋماعىن كەشەندى دامىتۋ شەڭبەرىندە وتكىزىلۋدە. بۇل اۋقىمدى جوبا اياسىندا دامۋ ستراتەگياسى ازىرلەنىپ، ەكونوميكالىق بازا، الەۋمەتتىك سالا، ينجەنەرلىك جانە كولىكتىك ينفراقۇرىلىمنىڭ دامۋى كوزدەلەدى»، - دەدى ءوز كەزەگىندە «Urbo Style» كومپانياسىنىڭ ديرەكتورى ليۋبوۆ نىسانبايەۆا.

جيىنعا قاتىسقان اۋدان كاسىپكەرلەرى پروبلەمالاردى تالقىلاۋدا بەلسەندىك تانىتقانىن ەرەكشە ايتۋعا بولادى. ماسەلەن، «سامعاۋ» شق باسشىسى ە.ترۋبنيكوۆ اۋىل شارۋاشىلىعى سالاسىن نەسيەلەندىرۋ ماسەلەسىن كوتەردى. كاسىپكەردىڭ ايتۋىنشا بانكتەر اۋىل شارۋاشىلىق تاۋار وندىرۋشىلەرىمەن جۇمىس ىستەگىلەرى كەلمەيدى، ال نەسيە العان جاعدايدا پايىزدارى ديقاندار ءۇشىن قولايسىز. سونىمەن بىرگە، سالا ءۇشىن كادرلار تاپشىلىعى ءسوز بولدى. جاستار اۋىلدا قالماي، قالاعا ۇمتىلىپ نەمەسە تاكسي جۇرگىزۋشى بولۋدى قالايدى. ال، اۋىلدا مەحانيزاتورلار اۋاداي قاجەت. «ۇمتىل» شق باسشىسى ب.سىرلىبايەۆ ءوز پىكىرىن ورتاعا سالىپ، مەملەكەتتىك كومەك الۋ بارىسىندا تۋىندايتىن قيىندىقتاردى جاسىرمادى. قاعازباستىلىق، مەملەكەتتىك قورلاردا ۇزاق جانە جالىقتىراتىن كەلىسىم الۋ ءراسىمى كاسىپكەرلەردىڭ مەملەكەتتەن جەڭىلدىكتىك نەسيەلەردى الۋ نيەتىن قايتارىپ جىبەرەدى.  دوڭگەلەك ۇستەل قاتىسۋشىلارى ارىپتەستىرىن قولداپ، بۇل ءراسىم 7-8 ايعا سوزىلاتىنىن اتاپ ءوتتى. كومپانيا وكىلدەرى كاسىپكەرلەردى مۇقيات تىڭداپ، ايتىلعان تالاپ-تىلەكتەر مەن پروبلەمالاردى وبلىس باسشىلىعىنا جەتكىزۋگە ۋادە بەردى.