«رۋحاني جاڭعىرۋ» باعدارلاماسى اياسىندا جامبىل وبلىسىندا كوپتەگەن يگى جۇمىستار جۇزەگە اسىرىلۋدا. اسىرەسە، اۋىلدان تۇلەپ ۇشىپ، جەتىستىككە جەتكەن ازاماتتاردىڭ تۋعان جەرىن ۇمىتپاي، وسكەن مەكەنىنە ءتۇرلى سىي-سياپات جاساۋى كوپتىڭ قولداۋىن تاپتى. وسى رەتتە، جۋىردا قازاقستان سۋرەتشىلەر وداعىنىڭ مۇشەسى، قوردايلىق قىلقالام شەبەرى وجەت نۇسىپبايەۆ قاراساي اۋىلىنداعى قازاق مەكتەبىنە ءوزىنىڭ جاڭا تۋىندىسىن تارتۋ ەتتى. بۇل – داڭقتى بابا قاراساي باتىردىڭ مايلى بوياۋمەن سالىنعان بەينەسى.

وجەت قازىكە ۇلىنىڭ شىعارماشىلىعى قوردايلىقتارعا كوپتەن ءمالىم. بالالىق شاعى المالىنىڭ تۇمسا تابيعاتى اياسىندا وتكەن وعان سۋرەتشىلىك ونەر اناسىنان دارىعان. ءۋازيپا انا ون ساۋساعىنان ونەرى تامعان ىسمەر، قولىنان قايشىسى تۇسپەي، بۇكىل اۋىلدىڭ تەكەمەت، سىرماق، تۇسكيىزدەرىنە كوزبەن-اق مولشەرلەپ نەبىر عاجاپ ويۋ-ورنەكتەردى سىزىپ شىعاتىن ەدى. وجەت 1970 جىلى فرۋنزەدەگى كوركەمسۋرەت ۋچيليششەسىن ۇزدىك ءبىتىرىپ شىقتى دا، سودان بەرى جۇرەگى قالاعان كاسىبىنەن قول ۇزگەن جوق. سۋرەت ونەرىنىڭ جيۆوپيس، گرافيكا، تەرىگە بەدەرلەپ بەينە سالۋ تۇرلەرىمەن اينالىستى. ۇنەمى جاڭا وبرازدار سومداۋمەن تىڭ  ىزدەنىس ۇستىندە  جۇرەدى. ونىڭ قازىرگى تۋىندىلارىنان ءومىردىڭ  ءمانى  تۋرالى سالماقتى  ويلار  اڭعارىلادى. باستى  تاقىرىبى «ۇلى دالا»، الەمدەگى  ماڭگى  قوزعالىس پەن  بىتىسپەس تارتىس. «ۇلى  دالانىڭ  سيمۆولى»، «دالا  نىشانى»، «جىل قۇستارى»، «ماڭگۇرت»، «ءتۇرلى-تۇستى الەم» ت.ب. اتاۋلارىنان-اق  سۋرەتشىنىڭ ايتار ويىن بىلۋگە  بولادى. ونىڭ  ءار  جىلداردا الماتى،  بىشكەك، تاراز  قالالارىندا تاقىرىپتىق كورمەلەرى وتكەن، ءبىرقاتار تۋىندىلارى تۇركيا، جۇڭگو، جاپونيا، المانيا، گرەكيا ءتارىزدى  شەتەلدەردە جەكە  كوللەكسيالاردا قويىلعان. اسىرەسە، تارازدىڭ 2000 جىلدىعىنا، قازاق حاندىعىنىڭ 550 جىلدىعىنا جانە «رۋحاني  جاڭعىرۋ» تاقىرىبىنا ارناعان «جىبەك  جولى»، «وركەنيەتتىڭ  دامۋى»، «حالىقتىڭ  رۋحاني قازىناسى» ءتارىزدى شىعارمالارى  دا كورەرمەندەر مەن ونەرتانۋشىلار  تاراپىنان جوعارى باعاسىن الدى.

وجەت قازىكە ۇلىنىڭ  قىلقالامىنان ءالى  دە نەبىر عاجايىپ تۋىندىلار جاسالۋدا. وتكەن  جىلى  «رۋحاني  جاڭعىرۋ» باعدارلاماسى  اياسىندا  قاراساي  اۋىلدىق  اكىمدىگىنىڭ  ۇيىمداستىرۋىمەن وتكەن  اۋىل تۇلەكتەرىمەن بولعان  كەزدەسۋگە  بارعاندا جاڭا سالىنعان «الامان بايگە» كارتيناسىن تارتۋ ەتتى. جەرلەستەرى دە قاراپ  قالماي، مۇنىڭ يىعىنا شاپان  جاۋىپ  قۇرمەتتەدى. سول كەزدەسۋدە ءوزى  بالا  كەزدە ءبىلىم  العان بايىرعى  قازاق  مەكتەبىنىڭ  ۇجىمى ءبىلىم  ورداسىنا قاراساي  باتىردىڭ ۇلكەن سۋرەتىن سالىپ  بەرۋدى وتىنگەن ەدى.  مىنە، جەرلەستەرىنىڭ  بۇل تاپسىرىسى دا ساتىمەن ورىندالدى.