ت.رىسقۇلوۆ اۋدانى اكىمدىگىنىڭ جانە اۋداندىق جاستار ورتالىعىنىڭ باستاماسىمەن قولعا الىنعان «تۋعان جەردىڭ تاريحى – تۇنعان شەجىرە» اتتى تاريحي-تانىمدىق ەكسپەديسياسى قاراقىستاق شاتقالىندا ۇيىمداستىرىلدى. ەكسپەديسيا بارىسىندا تۇمسا تابيعاتتىڭ تاماشا كورىنىستەرىمەن جاقىن تانىسۋعا مۇمكىندىك تۋدى. ەلباسىنىڭ «بولاشاققا باعدار:رۋحاني جاڭعىرۋ» اتتى باعدارلاماسىن ىسكە اسىرۋ ماقساتىندا ۇيىمداستىرىلعان ءىس-شارا وتە جوعارى دەڭگەيدە ءوتتى.

اۋدان اكىمى ەربولات سادىرقۇلوۆ، اۋدان اكىمدىگىنىڭ اپپارات باسشىسى الىبەك تەرلىكبايەۆ، ىشكى ساياسات ءبولىمىنىڭ باسشىسى ءلاززات وتەۋلييەۆا، اۋداندىق تاريحي ولكەتانۋ مۇراجايىنىڭ ديرەكتورى ەلدار ۋتەمبايەۆ جانە اۋداننىڭ ءبىرقاتار بەلسەندى جاستارى قاتىسقان شارانىڭ قۇرمەتتى قوناعى تاريحشى، ولكەتانۋشى، «پارىز» قوعامدىق بىرلەستىگىنىڭ ءتوراعاسى بەكق ۇلى ءالى ۇلى بولدى.

شارانى ۇيىمداستىرۋداعى باستى ماقسات — جاستاردى اۋداننىڭ تاريحي-ارحەولوگيالىق ورىندارىمەن تانىستىرۋ. سونىمەن قاتار، ولاردىڭ تۋعان جەرگە دەگەن پاتريوتتىق سانا-سەزىمىن نىعايتۋ، تاريحي-تانىمدىق ءىس-شارالارعا قاتىستىرۋ ارقىلى قوعامدىق-ساياسي ومىرگە تارتۋ جانە مادەني، رۋحاني قۇندىلىقتارىمىزدى زەردەلەۋ، ناسيحاتتاۋ، وسكەلەڭ ۇرپاقتى ەل، جەر تاريحىن قۇرمەتتەۋگە ۇيرەتۋ بولىپ تابىلادى. مۇنىڭ ءبارىن جاستارعا شارا بارىسىندا ءسوز العان اۋدان باسشىسى ەربولات سادىرقۇلوۆ مالىمدەپ بەرىپ، جاستار كوتەرگەن ناقتى باستامالاردى قولدايتىنىن جەتكىزدى.

جيىنعا قاتىسۋشى جاستار ەڭ الدىمەنەن قاراقىستاق شاتقالىنداعى قورعان توبەلەردىڭ تاريحىمەن تانىستى. ءتۇس اۋا جاستار اراسىندا سپورتتىق-تانىمدىق ويىندار، سايىستار ۇيىمداستىرىلدى. جارىسقا قاتىسۋشى توپتار قاراقىستاق تاۋىنىڭ ەڭ بيىك جەرىندەگى بەلگى تاسقا جاياۋ ورمەلەپ شىعۋ، جۇگىرىپ جارىسۋ، تۇرار رىسقۇلوۆتىڭ تۋعانىنا 125 جىل تولۋىنا وراي ەڭ ۇزدىك ولەڭ وقۋ جانە «تۋعان جەرىم، قانداي كوركەم» توپتىق شىعارماشىلىق جۇمىس بويىنشا سىنعا ءتۇستى. جارىس سوڭىنا قاراي ۇزدىكتەر انىقتالىپ، جەڭىسكە جەتكەن جاستار ماراپاتتالدى.

اۋدان اكىمى مەن جاستار رەسۋرستىق ورتالىعىنىڭ اراسىنداعى كەلىسىم بويىنشا جالپى بەس باعىت اياسىندا اۋقىمدى جۇمىستار قولعا الىنعان. سولاردىڭ ءبىرى – ءتۋريزمدى ونىڭ ىشىندە ەكوتۋريزمدى دامىتۋ. سول ءۇشىن دە «تۋعان جەردىڭ تاريحى – تۇنعان شەجىرە» اتتى تاريحي-تانىمدىق ەكسپەديسياسى ۇيىمداستىرىلۋدا. اتالمىش ەكپەديسيا جىل بويى وتەتىن بولادى. دالىرەك ايتار بولساق، قاراشانىڭ 16-سىنان باستاۋ العان اۋقىمدى شارا كەلەر جىلدىڭ جەلتوقسان ايىندا اياقتالماق. وسى ارالىقتا جاستار بەلگىلەنگەن جوسپارعا سايكەس، اۋداننىڭ تاريحي جەرلەرىن ارالاپ، جاقىن تانىسادى.