«اۋىل شارۋاشىلىعى – ءبىزدىڭ نەگىزگى رەسۋرسىمىز، ءبىراق ونىڭ الەۋەتى تولىق پايدالانىلماي وتىر.

ەل ىشىندە عانا ەمەس، شەتەلدە دە سۇرانىسقا يە ورگانيكالىق جانە ەكولوگيالىق تازا ءونىم ءوندىرۋ ءۇشىن زور مۇمكىندىكتەر بار.

ءبىز سۋارمالى جەر كولەمىن كەزەڭ-كەزەڭمەن 2030 جىلعا قاراي 3 ميلليون گەكتارعا دەيىن ۇلعايتۋىمىز كەرەك.

بۇل اۋىل شارۋاشىلىعى ءونىمىنىڭ كولەمىن 4،5 ەسە ارتتىرۋعا مۇمكىندىك بەرەدى.

ساۋدا جانە ينتەگراسيا، اۋىل شارۋاشىلىعى مينيسترلىكتەرى فەرمەرلەرگە ءوز ءونىمىن سىرتقا شىعارىپ ساتۋ ءۇشىن بارىنشا قولداۋ كورسەتۋى ءتيىس.

وسىعان وراي ۇكىمەتكە ءتيىستى تاپسىرما بەرىلدى. بۇل – ماڭىزدى مىندەت،

اۋىل شارۋاشىلىعى ءونىمىن ەكسپورتتاۋ ىسىندە شيكىزاتقا نەگىزدەلۋدەن باس تارتۋ كەرەك». مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا وسىلاي دەپ اتاپ كورسەتىپ، اگروونەركاسىپ كەشەنىن دامىتۋ ماسەلەسىنەن باسا نازار اۋدارعان بولاتىن.

بۇگىندە جامبىل وبلىسىنداعى ءاربىر ەلدى مەكەندە اۋىل شارۋاشىلىعىن دامىتۋعا ارنالعان جوبالار جۇزەگە اسۋدا. اسىرەسە، جامبىل وبلىسى تۇرعىندارىنىڭ تۇرمىستىڭ تابىسىن ارتتىرۋ جوباسىنىڭ بەرەرى مول بولماق. باياندى باستاماعا ءۇن قوسقان ەلدى مەكەننىڭ ءبىرى-تالاس اۋدانىنداعى ءۇشارال اۋىلدىق وكرۋگى.

اۋىل اكىمى راحىمجان ايتۋوۆتىڭ سوزىنشە، وكرۋگتە باستى پروبلەما اعىندى سۋ ەكەن. سوندىقتان ونداعى تۇرعىندار جوبانىڭ العاشقى باعىتى بويىنشا اسا قۇلشىنىس تانىتا قويماپتى. ويتكەنى، ەگىن ەگۋدە سۋ تاپشىلىعى ادىم اتتاپ باستىرمايتىن كورىنەدى. ماسەلەن، وتكەن جىلى ءۇشارالدىقتار «جەتى عاسىر» ەگىستىگىنە ەگىن ەككەنىمەن ءوندىرىپ ءونىم الا الماعان. سايىپ كەلگەندە سۋعا تويماعان كوكونىس شارۋالاردى شىعىنعا باتىرىپ، تىعىرىققا تىرەپتى. وندا سۋ بارماۋىنىڭ سەبەبى دە بەلگىلى. تالاس وزەنىنىڭ جوعارى ساعاسىندا ورنالاسقان بايزاق، جامبىل اۋداندارىنىڭ نەگىزگى اينالىساتىن شارۋاشىلىعى وسى ەگىنشىلىك. ءۇشارالدى ايتپاعاننىڭ وزىندە اتالعان اۋدانداردىڭ ءوزى كەيدە سۋدان تارىعىپ قالاتىنى جاسىرىن ەمەس. دەگەنمەن اۋىلدى سۋمەن قامتاماسىز ەتۋ كورشى قىرعىز ەلىمەن بايلانىستى. سوعان قاراماستان اۋىلداعى ازاماتتار ءۇي ىرگەسىندەگى جەرلەردى ءتيىمدى پايدالانۋعا ارەكەتتەنىپ وتىر.

–جالپى، جوبانىڭ ماقساتى – ءۇي ىرگەسىندەگى جەرلەردى ءتيىمدى پايدالانۋ. سوندىقتان تۇرعىندار ءوز اۋلالارىنا كوكونىس ەگۋدى قولعا الىپ وتىر. اشىعىن ايتقاندا، ءۇي ىرگەسىندەگى جەردى ءتيىمدى پايدالانۋ ءۇشىن تۇرعىندار «تاراز» الەۋمەتتىك كاسىپكەرلىك كورپوراسياسىنان نەسيە الۋعا قۇلشىنىس تانىتىپ وتىرعان جوق. سەبەبى ولار ساپالى تۇقىم مەن تىڭايتقىشتار الۋى ءۇشىن كوپ قاراجاتتى قاجەت ەتپەيدى. ءوز كەزەگىندە

تۇقىم مەن تىڭايتقىش الۋ بويىنشا ولار جاڭادان قۇرىلعان اۋىل شارۋاشىلىعى كووپەراتيۆىمەن كەلىسىمگە كەلىپ، سولاردان ساتىپ الاتىن بولادى. بۇل جۇيە تۇرعىندار ءۇشىن ءتيىمدى بولىپ وتىر، – دەيدى اۋىل اكىمى راحىمجان ورىنباسار ۇلى.