وتكەن سەنبى-جەكسەنبى كۇندەرى تاراز قالاسىنىڭ ورتالىق الاڭىندا جامبىل وبلىسىنىڭ 80 جىلدىعى جانە اۋىل شارۋاشىلىعى ەڭبەككەرلەرىنىڭ كۇنىنە وراي اۋىل شارۋاشىلىعى ونىمدەرىنىڭ جارمەڭكەسى ءوتتى. جارمەڭكەدە وبلىسىمىزدىڭ 10 اۋدانى مەن تاراز قالاسىنىڭ تاۋار وندىرۋشىلەرى جانە تۇراقتاندىرۋ قورى جالپى قۇنى 89، 9 ميلليون تەڭگەنى قۇرايتىن 314 توننا ءونىم تۇرلەرىن نارىق باعاسىنان 10-20 پايىزعا تومەن باعادا ۇسىندى.

اۋىلشارۋاشىلىعى تاۋارلارىن وندىرۋشىلەر وزدەرىنىڭ ءوسىرىپ، وندىرگەن تابيعي تازا، قۇنارلى دا ساپالى ونىمدەرىن ەل كوڭىلىنەن شىعاتىنداي ەتىپ ۇسىندى. سول كۇنى ورتالىق الاڭعا حالىق ادەتتەگىدەن كوپ جينالدى. اۋا رايى دا جايماشۋاقتىعىمەن ەرەكشەلەنىپ، ساۋدا كورىگى قىزدى. ونىمدەردىڭ نەگىزىن 20 توننا ەت (جىلقى، سيىر، قوي، شوشقا جانە تاۋىق ەتى)، 8 توننا ءسۇت ونىمدەرى، 6 توننا شۇجىق ونىمدەرى، 8 مىڭ دانا جۇمىرتقا، 4 توننا بالىق، 2 توننا بال، 1،5 توننا كونديتەرلىك ونىمدەر مەن 4 توننا ماكارون ونىمدەرى، 0،8 توننا تۇز جانە 266،7 توننا جەمىس-جيدەك پەن كوكونىس جانە تاعى باسقالارى قۇرادى.

ەكى كۇنگە جوسپارلانعان جارمەڭكەنىڭ العاشقى كۇنى بايزاق، جۋالى، تالاس، مويىنقۇم، شۋ اۋداندارى مەن تاراز قالاسىنىڭ اۋىل شارۋاشىلىعى تاۋار وندىرۋشىلەرىنىڭ جانە تۇراقتاندىرۋ قورىنىڭ جانە ەكىنشى كۇنى جامبىل، مەركى، قورداي، ت.رىسقۇلوۆ، سارىسۋ اۋداندارى مەن تاراز قالاسىنىڭ تاۋار وندىرۋشىلەرىنىڭ جانە تۇراقتاندىرۋ قورىنىڭ ونىمدەرى ۇسىنىلدى.

ايتا كەتۋ كەرەك، جالپى رەسپۋبليكا بويىنشا، ونىڭ ىشىندە جامبىل وڭىرىندە دە اۋىل شارۋاشىلىعى سالاسى قارقىندى دامۋدا. ايماقتا اعىمداعى جىلى 10 ايدا 275،6 ميلليارد تەڭگەنىڭ اۋىل شارۋاشىلىعى ءونىمى ءوندىرىلىپ، وتكەن جىلمەن سالىستىرعاندا ءوسىم 104،4 پايىزدى قۇرادى. بۇل رەسپۋبليكا بويىنشا ەڭ جوعارى كورسەتكىش.

مەملەكەتتىك باعدارلامالاردىڭ ءساتتى جۇزەگە اسۋى ناتيجەسىندە وبلىستىڭ وندىرىستىك كورسەتكىشتەرىندە تۇراقتى ءوسىم قالىپتاستى، اۋىل حالقىنىڭ تۇرمىس دەڭگەيى كوتەرىلىپ كەلەدى.

اتالعان جۇمىستا سالا قىزمەتكەرلەرى – اۋىل شارۋاشىلىعى ەڭبەككەرلەرىنىڭ ەڭبەكتەرى وراسان زور.

جامبىل ءوڭىرى اۋىل شارۋاشىلىعىن جۇرگىزۋگە وتە قولايلى ايماق ەكەنى بەلگىلى. اۋليەاتالىق شارۋالاردىڭ اعىمداعى جىلى مول ءونىم العانىن دا ماقتانىشپەن ايتا الامىز.

بيىلعى جىلى 333،5 مىڭ گەكتار ءداندى جانە ءداندى بۇرشاقتى داقىلدار ەگىن وراعىنا ءتۇسىپ، ءار گەكتاردان الىنعان ورتاشا ءونىم 25،0 سەنتنەردى قۇرادى جانە 763،2 مىڭ توننا استىق باستىرىلىپ، 92،2 مىڭ توننا ءونىم ارتىق الىندى.

سونداي-اق، وبلىس شارۋالارى 270،5 مىڭ توننا كارتوپ، 1 034،6 مىڭ توننا كوكونىس جينادى. 48،5 مىڭ توننادان استام مايلى داقىل ونىمدەرى ەل ىرىزدىعىنا اينالدى.